قازاقستاندىق ايەلدەردىڭ زەينەت جاسى تاعى دا ۇلعايتىلدى. ول 2019 جىلدىڭ 1 قاڭتارىنان باستاپ 59 جاس بولدى.

قازىرگى تاڭدا ەر ادامدار 63 جاستا زەينەتكە شىعاتىن بولسا، ايەل ادامداردىڭ زەينەت جاسى، زەينەتاقىمەن قامتاماسىز ەتۋ زاڭىنا سايكەس، التى ايعا ۇلعايتىلىپ كەلەدى.

وسىدان ءبىر جىل بۇرىن، ياعني 2018 جىلدىڭ 1 قاڭتارىندا ايەل ادامداردىڭ زەينەت جاسى 58،5ء-تى قۇراعان بولاتىن. ال 2019 جىلدىڭ 1 قاڭتارىنان باستاپ ول 59 جاس بولدى. 2020 جىلى 59،5-كە ۇلعاياتىن بولسا، 2021 جىلدىڭ 1 قاڭتارىنان باستاپ ايەلدەر زەينەتكە 60 جاسىندا شىعاتىن بولادى. وسى ۇردىسپەن، ايەل ادامداردىڭ زەينەت جاسىن 2027 جىلعا دەيىن 63 جاسقا ۇلعايتۋ كوزدەلگەن.

سونىمەن قاتار، قازاقستاندىقتار جەتكىلىكتى سومانى جيناعان جاعدايدا 50 جاسىندا زەينەتكە شىعۋعا قۇقىلى. 2018 جىلى بۇل سومانىڭ كولەمى 13،5 ميلليوندى قۇرادى.