كەشە عانا كەتكەن جىلدىڭ ەنشىسىندە ۇلكەن قازا بار، ۇلكەن قىلمىستىق وقيعا بۇل. ءۇش ادامنىڭ ءومىرىن جالماعان جانتۇرشىگەرلىك جول اپاتىندا قازا تاپقان اكتريسا شولپان ەلگەزەكوۆانى بارشا جۇرت بولىپ جوقتاپ، ونىڭ ارىپتەسى ايزادا حانىمنىڭ ساۋىعىپ كەتۋىن جاماعات بولىپ سۇراۋدا. ءيا، وتە قايعىلى جاعداي. دەگەنمەن بۇل وقيعانىڭ تاعى ءبىر قۇربانى بار، ول – تاكسي جۇرگىزۋشىسى. ءىشىپ الىپ كولىك باسقارعان قىلمىسكەر ءبىر ەمەس، ءۇش وتباسىعا جاڭا جىل مەرەكەسى قارساڭىندا ورنى تولماستاي قايعى الىپ كەلدى. امال نەشىك، كەتكەن ادامدى قايتارا المايمىز. ءبىراق...

كوز جۇمعان تاكسي جۇرگىزۋشىسى بولعان ازاماتتىڭ كىم ەكەنىن حالىق بىلمەيدى. بارشا جۇرتقا بەلگىلى اقپارات: جول اپاتىنان ءۇش ادامنىڭ زارداپ شەگىپ، ونىڭ ەكەۋىنىڭ كوز جۇمعانى. رەداكسيامىزعا حابارلاسقان تاكسيست جىگىتتىڭ دوستارى الاڭداپ، «باۋىرىمىز سۇراۋسىز كەتپەسە ەكەن...» دەيدى.

«شولپان اپكەمىزبەن بىرگە قازا تاپقان جول اپاتىنىڭ تاعى ءبىر قۇربانى – مەنىڭ دوسىم، باۋىرىم. ەسىمى – باقىتنۇر قۇناپيا ۇلى، ءوزى 1985 جىلى قىتايدىڭ ءۇرىمجى قالاسىندا دۇنيەگە كەلگەن. اتا-اناسى، باۋىرلارى ءالى دە سوندا تۇرىپ جاتىر، دوسىمنىڭ قازاقستاندا ەشقانداي تۋىسى جوق.

ول 2002 جىلى قازاقستانعا كەلىپ، ۇزىناعاشتا وقىدى. جوعارى وقۋ ورنىن قوستاناي قالاسىندا اياقتاپ، بۇگىندە الماتى وبلىسى قاسكەلەڭ قالاسىنداعى «اياجان» دەگەن كوللەدجدە دەنەشىنىقتىرۋ ساباعىنان ءمۇعالىم بولىپ جۇمىس ىستەپ جۇرگەن ەدى. نەسيەگە كولىك الىپ، جۇمىستان بوس ۋاقىتىندا قالادا تاكسيست بولىپ جۇرەتىن. ەكەۋىمىز - گرۋپپالاس دوستارمىز، بىرگە تۇردىق، بىرگە جۇردىك، باۋىرىمداي بولىپ كەتكەن ەدى»، - دەدى ءبىز  حابارلاسقان قانات ەسىمدى ازامات.

ايتۋىنشا، قايعىلى وقيعانىڭ سەبەپكەرى دۇنگەن ۇلتىنىڭ ازاماتى يلياس ءيسماروۆيچتىڭ ايەلى مەن تۋعان-تۋىستارى حابارلاسقان، ءمايىتحاناعا دا كەلگەن، كەشىرىم سۇراعان. باقىتنۇردىڭ قازاقستاندا تۋىسى جوق ەكەنىن ءبىلىپ، جەرلەۋىنە، اسىن وتكىزۋگە كومەك قولىن ۇسىنعان. الايدا، ودان باس تارتىپ، دوستارى ونى ۇزىناعاشقا اپارىپ جەرلەگەن.

«دوسىمىزدىڭ جەتىسىن، قىرقىن ءوزىمىز وتكىزەمىز، وعان ەشقانداي كومەكتىڭ قاجەتى جوق ەكەنىن ايتتىم. كەيىن ولار دا ۇزىناعاشقا كەلىپ، جەرلەۋ راسىمىنە قاتىسىپ كەتتى. ءبىراق، باقىتنۇردىڭ بانكتەن العان نەسيەسىن، باسقا دا قارىزىن وتەۋىمىز كەرەك. بۇل جاقتا تۋىستارى بولماعاندىقتان، ونى ءبىز ءوز موينىمىزعا الدىق. جول اپاتىنا كىنالى دۇنگەن ازاماتى وسى ماسەلەنى ءوز جاۋاپكەرشىلىگىنە الىپ، قارىزىن وتەپ بەرۋدى سوتتا مىندەتتەسە دەيمىز. 31 جەلتوقساندا ونىڭ سوتى بولىپ، ءقازىر ەكى ايعا ۋاقىتشا قاماۋعا الىندى، ارى قاراي سوتى جالعاسادى ەكەن.

ءقازىر باقىتنۇر باۋىرىزبەن ءبىر جەردەن كەلگەن جەرلەر اعالارى جانە تالدىقورعاننان كەلگەن ناعاشى اعاسى باسقا دا جۇمىستارىنا كومەكتەسىپ جاتىر»، - دەدى بىزگە قانات.

بەلگىلى بولعانداي، كوز جۇمعان تاكسي جۇرگىزۋشىسى باقىتنۇردىڭ اكەسى قايتىس بولىپ كەتكەن. ارتىندا ەكى اعاسى، ءبىر اپكەسى، ءبىر قارىنداسى جانە جاسى 75-كە جۋىقتاعان اناسى قالدى.  ءىنىسى ءبىراز جىل بۇرىن جۇمىس ورنىندا جۇمىس اپاتىنان قازا تاپقان ەكەن.

«سوڭعى كەزدەرى قىتايدان قازاقستانعا كەلۋ قيىنداپ كەتكەنى بەلگىلى عوي. سوندىقتان باۋىرلارى مەن اناسى ونىڭ جەرلەۋىنە كەلە المادى، ءبىراق تىم قۇرىعاندا قىرقىنا كەلىپ قاتىسۋى ءۇشىن قولىمىزدان كەلگەننىڭ ءبارىن جاسايمىز. ەڭ باستىسى، بۇل ەلدە ەشبىر تۋىسى جوق ەكەن دەپ باۋىرىمىز سۇراۋسىز كەتپەسە ەكەن...»، - دەيدى ونىڭ دوسى قانات.