2019 جىلدىڭ 1 قاڭتارىندا ساعات شامامەن 4:25-تەردە قاراعاندى پوليسياسىنا «دريەۆنيي ريم» (زاۆودسكايا كوشەسى، 25/3) مەيرامحاناسىنىڭ الدىنداعى جاپپاي توبەلەس جايلى حابار ءتۇستى. اقپاراتتى تەكسەرۋ بارىسىندا 1995 جىلعى جانسەيىت راحىمجان باقىتجان ۇلى ەسىمدى قازاق جىگىتىنىڭ قايتىس بولعانى انىقتالدى. ول – «شۇباركولكومىر» اق كۇزەتشىسى.  

الەۋمەتتىك جەلىدە تارالعان اقپاراتتارعا سۇيەنسەك، 1 قاڭتارعا قاراعان ءتۇنى مەيرامحانادا 9 ادامنان قۇرالعان كومپانيا دەمالعان كورىنەدى. ولاردىڭ التاۋى ەر ادام، ءۇشى قىز بالالار، سولاردىڭ اراسىندا راحىمجان جانسەيىت تە بولدى. شامامەن 03:00-دە اتالعان توپ پەن ارميان ۇلتىنىڭ وكىلدەرى اراسىندا جانجال تۋادى. «دريەۆنيي ريم» مەيرامحاناسى ارميان دياسپوراسىنا تيەسىلى. ارتىنشا جانجال توبەلەسكە ۇلاسىپ، عيماراتتاعى بار ادام ارالاسىپ كەتەدى، ولاردىڭ كوبى ارميان ۇلتىنان بولعان. قازاقتارعا كومەك رەتىندە ءۇش كولىك كەلەدى. كۋاگەرلەردىڭ ايتۋىنشا، توبەلەسكە قولدارىنا تاياق، مەتالل شىبىق ۇستاعان 30-35 ادام قاتىسقان. توبەلەس ناتيجەسىندە ارمياندار قاتتى جاراقاتتانباعان، ال قازاقتاردىڭ ءبىرى قايتىس بولىپ، ەكەۋى پىشاقپەن جاراقاتتالدى.

بۇگىن قاراعاندى وبلىسى پروكۋراتۋراسىنىڭ باسپا ءسوز قىزمەتى مالىمدەمە جاسادى. ۆەدومستۆونىڭ دەرەگىنە سۇيەنسەك، ءتارتىپ ساقتاۋ ورگاندارىمەن قىلمىستىق كودەكستىڭ 99 بابى (ادام ءولتىرۋ) جانە 293 بابى (بۇزاقىلىق) بويىنشا قىلمىستىق ىستەر قوزعالدى. 

قازىرگى ساتتە تەرگەۋ جۇمىستارىنىڭ ناتيجەسىندە قاقتىعىسقا قاتىسقانداردىڭ قاتارىنان 3 ادام ۇستالىپ، 1 قاتىسۋشىعا ىزدەۋ جاريالاندى.

«مەسسەندجەرلەر مەن الەۋمەتتىك جەلىلەر ارقىلى بەلسەندى تۇردە اتالمىش جانجال تۋرالى كۇماندى اقپارات تاراتىلۋدا، دالىرەك ايتار بولساق، ەكى ادام قايتىس بولىپ، جانجال ۇلتارالىق الاۋىزدىق نەگىزىندە پايدا بولدى دەپ مالىمدەلۋدە. قاقتىعىس ەكى توپ اراسىندا پايدا بولعانى جانە ول ۇلتارالىق الاۋىزدىق سيپاتىندا بولماعانى تۋرالى دەرەكتەرگە نازار اۋدارامىز، سەبەبى ەكى توپتا دا قازاق جانە باسقا ۇلت وكىلدەرى بولعان. ازاماتتاردى ۇگىتتەۋلەر مەن ۇندەۋلەرگە بەرىلمەي، تەرگەۋ ورگاندارى تاراتاتىن انىق اقپاراتتى قاداعالاۋلارىن وتىنەمىز. زاڭنامانى بۇزۋدىڭ الدىن الۋ ماقساتىندا قاساقانا ۇلتتىق الاۋىزدىق پەن قاستاستىقتى ورشىتۋگە باعىتتالعان ارەكەتتەر قىلمىستىق كودەكستىڭ 174 بابىمەن قاراستىرىلعان قىلمىستىق جاۋاپكەرشىلىككە تارتىلاتىنى تۋرالى اقپاراتتاندىرامىز.

وسىعان بايلانىستى وبلىس پروكۋراتۋراسى ازاماتتار مەن بۇقارالىق اقپارات قۇرالدارىنىڭ وكىلدەرىن تەك قانا قىلمىستىق قۋدالاۋ ورگاندارىنىڭ رەسمي مالىمەتتەرىنە جۇگىنۋگە شاقىرادى.

قۇقىق قورعاۋ ورگاندارى تەرگەۋ جۇمىستارىنىڭ تولىقتاي اشىقتىعىن قامتاماسىز ەتەدى، تەرگەۋ بارىسى تۋرالى بارلىق اقپارات باق-دا جانە الەۋمەتتىك جەلىلەردە جاريالاناتىن بولادى.

تەرگەۋ بارىسى وبلىس پروكۋرورىنىڭ ەرەكشە باقىلاۋىنا الىندى»، - دەپ حابارلادى وبلىستىق پروكۋراتۋرا.