جىلدىڭ باسى تاعى ءبىر قازالى وقيعامەن باستالدى. قازاقتىڭ اياۋلى اقىن قىزى جانار نۇرعالي ومىردەن وزدى. بۇل جايىندا اقىن بايبوتا قوشىم-نوعاي جانە بەكجان اشىربايەۆ Facebook پاراقشالارىندا جازبا قالدىردى. Qamshy.kz اقپارات اگەنتتىگى مارقۇمنىڭ تۋىستارىنا قايعىرىپ كوڭىل ايتادى.
"اجالعا قارسى تۇرا المايتىن قانداي ءالجۋاز ەدىك دەسەيشى، ءبىز، ادامدار... قازاق ولەڭىنىڭ اسپانىنان تاعى ءبىر جۇلدىز اعىپ ءتۇسىپتى!
مەن جاناردى كورگەن جوقپىن. مۇمكىن كورگەن دە شىعارمىن-اۋ، ءبىراق ارنايى تانىسپاپپىن. الايدا باسپا ءسوز بەتىندە جاريالانعان ولەڭدەرىنىڭ ءبارىن دە سونشالىقتى ريزاشىلىقپەن وقۋشى ەدىم. ول تابيعي دارىندى اقىن بولاتىن!
فەيسبۋكتەن ونىڭ اۋرۋحانانىڭ جانساقتاۋ بولىمىندە ەس-تۇسسىز جاتقانىن وقىپ، جاس ادام عوي، جازىلىپ شىعاتىن شىعار دەپ ۇمىتتەنىپ ەدىم. اجالعا، شىنىندا دا، شارا جوق ەكەن!..
قارىنداسىمىزدىڭ تۋعان-تۋىستارىنا، جورا-جولداستارىنا، ونى بىلەتىن بارلىق پوەزيا جاناشىرلارىنا كوڭىل ايتامىن!
جانار نۇرعاليدىڭ شىنايى دا كوركەم كەستەلى جىرلارى قازاق وقىرماندارىنىڭ كوڭىلىندە ۇزاق ساقتالاتىن بولادى.
مىنە، تەڭىزدىڭ ءدامىن تامشىدان بىلەتىن ولەڭ وقىرماندارى، جاناردىڭ جىرلارى...
جانار نۇرعالي
(1974-2019)
جالعىزبىن…
جوقتى اڭساپ، باردى سەزىنبەي،
ارماننىڭ قۇرىپ ىندىنى،
ىزدەيدى ەكەم وزىمدەي
قيالى اپپاق جىندىنى،
موينىمدا تىنباي سىڭعىرى،
جازمىشتىڭ تەمىر شىلبىرى.
دۇنيە كەزىپ كەتسەم بە،
ويدىرىپ تاسقا تاباندى —
ۇعا الماي ءوزىڭ كەتكەندە،
كۇنىم دە — ايسىز قاراڭعى.
تىرىلتە الام با ولەڭمەن
جارامدى «سەن، سەن!..» دەپ ولگەن؟..
سارعايىپ ءسىڭىپ ساعىمعا،
جالعاندىق ءانىن سالعىزدىڭ،
مەن ءۇشىن مەڭىرەۋ جانىڭدا،
قالماسا مەيىر — قار، مۇزبىن.
كويلەگىن كيگەن سان كۇزدىڭ،
كولەڭكەسى جوق جالعىزبىن…
«الاسارما!» دەپ...
«الاسارما!» دەپ، اي ءتوسىن
كەزەتىن مەن دەپ جالعىز ءۇن!..
جوعالىپ كەتسە، قايتەسىڭ،
جەر بەتىندەگى جالعىزىڭ؟..
ۇققانسىپ سەنى سوزىڭنەن،
تاقىلداعاندا ءجۇز كومەي،
ىشىنەن مەنى كوزىڭمەن
تۇرا الارمىسىڭ ىزدەمەي؟..
كەۋدەڭە كەنەت ەنگەندە،
ءبىر كوكتەم مەنسىز «كۇز» دەرسىڭ،
تىرىمدە تۇرماق ولگەندە
ەڭىرەپ ءجۇرىپ، ىزدەرسىڭ...
سەنى ىزدەپ جۇرەم...
قول الىسايىن ارمانمەن،
كەۋدەمدە مەنىڭ جانشى ءۇمىت.
ەي، بالا، كەتتىڭ، الدار ما ەڭ؟
جۇرەككە ءتۇيىر تامشى ءىلىپ...
باقىت دەگەنىم، سەنگەنىم –
ءوڭىم تۇگىلى، ءتۇس تە ەمەس.
اقيقاتىم دا، كورگەنىم –
بالالىق كۇنىم – كۇشتى ەلەس.
الديلەر اسەم انىمەن
ءوڭ مەنەن ءتۇستىڭ اراسى.
سەنى ىزدەپ جۇرەم بارىنەن،
اۋىلدىڭ قارا بالاسى...
***
حابارسىز كەتسەم، كەش، كۇنىم.
اتىمدى كوكتە ايتا ما اي؟
ەسىمە ءتۇستىڭ كەشكۇرىم،
تۇسپەس دەپ ەدىم قايتالاي.
جۇرەگىم ءبىر ءسات ۇمتىلىپ،
سابىرعا كەزەك بەرمەدىم.
جانىما اراي جىر تۇنىپ،
كورگىم كەپ، ءبىراق كورمەدىم.
سەزىمنەن بايان تاپپاعان،
مازاسىز ءوتتى-اۋ شاق نەبىر.
كىنا ارتىپ جۇرەر جات ماعان،
سابىر دا، سابىر، ساپ، كوڭىل!
جۇبانام مونشاق تاعىپ جىر،
جازمىش تۇر قاراپ سىزدانا.
بۇل جۇرەك سۋىپ، جانىپ ءبىر،
ۋاقىت ەمشى، ءمۇزدار-ا..." - دەپ جازادى اقىن بايبوتا قوشىم-نوعاي.
ال بەكجان اشىربايەۆ ونى بىلاي دەپ ەسكە الدى:
"باقۇل بول، جانار!
قازاقتىڭ اياۋلى اقىن قىزى جانار نۇرعالييەۆانىڭ جارىق دۇنيەدە كورەر قىزىعى تاۋسىلىپتى. راببىمىز رۋحىن شات، جانىن ءجانناتتىق قىلسىن! بۇل قارالى حابار ءبارىمىزدىڭ قابىرعامىزدى قاقىراتىپ كەتتى. سۇم اجالدىڭ سەنى دە جۇتاتىنىنا سەنە الار ەمەسپىز... امال نەشىك، ارتىڭ كەنىش، الدىڭ پەيىش بولسىن، كۋرستاس!
"ءولدى اقىن... قوعام قالدى ارى جەتىم،
جاسىمەن جۋعانسىندى ءبارى بەتىن،
قازانى جەتكىزدى ەل بىر-بىرىنە،
ايتقانداي اۋا رايى مالىمەتىن..."
پىكىر قالدىرۋ