1 قاڭتاردىڭ تاڭەرتەڭىندە ماگنيتوگورسكتە قۇلاعان ءۇيدىڭ استىنان 11 ايلىق ءسابي ءتىرى تابىلدى دەپ حابارلايدى Qamshy.kz اقپارات اگەنتتىگى currenttime.tv سايتىنىڭ دەرەگىن نەگىزگە الىپ. ۆانيا فوكين ەسىمدى ءسابي جارىلىس بولعان كەزدە بالالارعا ارنالعان كەرەۋەتتە ۇيىقتاپ جاتقان.

«ءسابيدىڭ اناسى دا ءدىن امان. ول اۋرۋحاناعا كەلىپ ءسابيىنىڭ ءتىرى ەكەنىنە كوز جەتكىزدى. ۆانيا 325 پاتەردىڭ تۇرعىنى»، دەپ اقپاراتتى راستادى ورگان قىزمەتكەرلەرى.

رەسمي اقپاراتقا سۇيەنسەك، ءسابيدىڭ جاعدايى وتە اۋىر. دارىگەرلەر بالانى ماسكەۋدەگى بالالار اۋرۋحاناسىنا اپارىپ ەمدەۋگە دايىن. 11 ايلىق بالانىڭ باس-سۇيەگى زاقىمدالعان.

ال چەليابينسك وبلىسىنىڭ گۋبەرناتورى بوريس دۋبروۆسكييدىڭ ايتۋى بويىنشا، قۇتقارۋشىلار تۇرعىن ءۇيدى تەكسەرىپ، قوقىستان تازالاپ جۇرگەن كەزدە بالانىڭ جىلاعان داۋسىن ەستىگەن. شەنەۋنىك بالا كەرەۋەتتە جىلى ورانعان كۇيىندە ۇيىقتاپ جاتقاندىقتان  امان قالعانىن ايتتى.

بالانىڭ اكەسى جارىلىس كەزىندە جۇمىستا بولعان. ال اناسى مەن اعاسى جارىلىستان كەيىن العاشقىلاردىڭ ءبىرى بولىپ قۇتقارىلدى. اكەسى بولسا، قۇتقارۋشىلاردىڭ كيىمىن كيىپ، بالاسىن ىزدەۋ ءۇشىن قۇتقارۋ جۇمىستارىنا ارالاسقان.

«مەن ارنايى كيىم الىپ، بىردەن قۇتقارۋ جۇمىستارىنا ارالاستىم. قۇتقارۋشىلارعا بالامنىڭ قايدا جاتقانىن جورامالداپ كورسەتتىم. سول جەردەن بالامدى تاۋىپ الدىق. بۇل ءبىز ءۇشىن جاڭا جىلدىق عاجايىپ سىي بولدى»، — دەيدى 11 ايلىق ءسابيدىڭ اكەسى ەۆگەنيي فوكين. 

ايتا كەتسەك، 31 جەلتوقساندا ماگنيتوگورسك قالاسىنداعى ون قاباتتى ۇيدە گاز جارىلىپ، ءبىر پودەزد قيراعان. مينيسترلىكتىڭ ەسەبىنە سايكەس، 48 پاتەر ەندى تۇرۋعا جارامسىز. بۇل پودەزدە 46 ادام تۇرعان. ءۇيسىز قالعاندار قالاداعى مەكتەپتەردىڭ سپورت زالدارىن پانالاپ جاتىر.

رەسەي پرەزيدەنتى ۆلاديمير پۋتين اپات بولعان كۇنى ماگنيتوگورسك قالاسىنا شۇعىل جەتىپ، وقيعاعا بايلانىستى توتەنشە جاعداي ماماندارىمەن جيىن وتكىزدى. سونداي-اق، ول گاز جارىلعان ۇيگە، قالالىق اۋرۋحاناعا بارىپ، ناۋقاستاردىڭ حال-جاعدايىمەن تانىستى.