جول قاتەلىكتى كەشىرگەن ەمەس. قانشاما ادامداردىڭ كۇندەلىكتى ءومىرى جول اپاتىنىڭ سالدارىنان قيىلۋدا. ەلدى ەلەڭ ەتكىزگەن اپات الماتى قالاسىندا ورىن الىپ، ءدۇيىم جۇرتتىڭ قابىرعاسىن قايىستىرىپ كەتتى. ءبىر عانا قاتەلىك بىرنەشە ادامنىڭ جارىق دۇنيەمەن قوشتاسۋىنا سەبەپ بولدى. ابايسىزدا جاسادى دەپ تە ايتۋعا اۋىز بارمايدى. 

وتكەن جىلدىڭ 29 جەلتوقسانىندا بولعان جول اپاتى ءبىر ەمەس، ءۇش ادامنىڭ ءومىرىن جالماپ، تاعى بىرەۋىن اۋرۋحانا كەرەۋەتىنە بايلاپ قويدى. ەشكىمنىڭ دە باسىنا سالماسىن مۇنداي قايعىنى...

♦جانتۇرشىگەرلىك جول اپاتىندا قايتىس بولعان ءۇشىنشى ادام كىم؟

بۇگىنگى اڭگىمە وسى قازالى وقيعانىڭ قۇربانى دينارا حاميتوۆا جايىندا بولماق. قايعىلى قازادان سوڭ ءالى ەسىن جيىپ ۇلگەرمەگەن مارقۇمنىڭ تۋىستارى بىزبەن از-ماز ەستەلىكتەرىمەن ءبولىستى. سايتىمىزدا مارقۇمنىڭ الەۋمەتتىك جەلىدەگى سوڭعى جازباسى جاريالانعان بولاتىن.

«دينارا 1978 جىلى كوكشەتاۋ قالاسىندا دۇنيەگە كەلگەن. بالالىق شاعىن تۋعان قالاسىندا وتكىزىپ، كەيىن استاناعا كوشىپ، سول جەردە جۇمىس ىستەپ ءجۇردى. كەيىننەن 2018 جىلدىڭ تامىز ايىندا الماتىعا كوشىپ كەلدى.

♦مارقۇمنىڭ سوڭعى جازباسى...

دينارا سول وقيعادا كوز جۇمعان اكتريسا شولپان ەلگەزەكوۆانىڭ جاقىن قۇربىسى ەدى. بارلىق مەرەكەلەردى بىرگە تويلاتىپ، ءبىر-بىرىنىڭ تۋىستارىمەن دە جاقسى ارالاساتىن. اتا-اناسىنىڭ جالعىز قىزى ەدى، ارتىندا باۋىرلارى – اعاسى مەن ءىنىسى قالدى جانە ءوزىنىڭ ەكى بالاسى بار...» - دەيدى دينارانىڭ ءىنىسى ازامات حاميتوۆ.

بەلگىلى بولعانىنداي، جول اپاتىنا كىنالى كار يلياس يسماروۆيچ بۇل وقيعادان كەيىن دينارانىڭ وتباسىنا حابارلاسىپ، كەشىرىم دە  سۇراماعان.

«ءبىز ءمايىتحانادان ونىڭ دەنەسىن الىپ كەتتىك تە، كوكشەتاۋعا اپارىپ جەرلەدىك. بۇل ۋاقىتقا دەيىن ءبىز كىنالى تاراپتان ەشكىمدى كورمەدىك، ەشبىرى بىزگە حابارلاسقان جوق. شولپان اپكەنىڭ تۋىستارى سوتقا بەرىپتى دەپ ەستىدىم، بىر-ەكى كۇندە ءبىز دە الماتىعا كەلىپ، كىنالى ازاماتتىڭ وزىنە لايىقتى جازاسىن الۋى ءۇشىن بارىنشا تىرىسامىز. بارلىعىن زاڭ اياسىندا شەشەتىن بولامىز»، - دەيدى.

ازامات حاميتوۆ اپكەسىنىڭ وتە اشىق-جارقىن، كوڭىلدى ادام بولعانىن ەسكە ءتۇسىرىپ، ونىڭ بولاشاققا قۇرعان جوسپارى كوپ بولعانىن ايتادى.

«دينارا بارىمىزگە تۋعانىمىزداي بولىپ كەتكەن. ءوزى ۇنەمى كوڭىلدى جۇرەتىن، ومىرگە قۇشتار جان ەدى. كەز كەلگەن مەرەكەدە باسىمىزدى قوسىپ، ءبارىمىزدى ءبىر داستارحان باسىنا جيناپ وتىراتىن. ول كۇن سەكىلدى اينالاسىن نۇرلاندىرىپ جۇرەتىن ەدى...» - دەيدى ازامات.