جاڭا جىلدىڭ قارساڭىندا الماتىدا ورىن العان ءىرى كولىك اپاتىنا قاتىستى تىڭ دەرەكتەر پايدا بولدى. قۇقىق قورعاۋ ورگاندارىنان بوي تاسالاعان كۇدىكتى 7 جىلدان 12 جىلعا دەيىن جازا ارقالايتىن بولادى. بۇل تۋرالى بۇگىن قالالىق پوليسيا دەپارتامەنتىنىڭ باسپا ءسوز قىزمەتى مالىمدەدى. ال وسى اپات كەزىندە ءتىرى قالعان اكتريسا ايزادا ساتىبالدييەۆا ءالى جانساقتاۋ بولىمىندە جاتىر. دارىگەرلەر ونىڭ جاعدايىن اۋىر دەپ باعالايدى. سونداي-اق، مارقۇم شولپان ەلگەزەكوۆامەن بىرگە كوز جۇمعان كولىك جۇرگىزۋشىسى مەن اكتريسانىڭ قۇربىسى تۋرالى دا دەرەكتەر ءمالىم بولدى، دەپ حابارلايدى Qamshy.kz اقپارات اگەنتتىگى استانا ارناسىنىڭ مالىمەتىنە سۇيەنە وتىرىپ.

قايعىلى وقيعاعا قاتىستى ءتۇرلى مالىمەتتەر جاڭا جىلدىق دەمالىس كۇندەرى الەۋمەتتىك جەلىنى قاتتى دۇرلىكتىردى. سەنبى كۇنى تاڭعا جۋىق بولعان كولىك اپاتىنان العاشقىدا ەكى ادام قايتىس بولعان دەگەن مالىمەت تاراعان. ونىڭ ءبىرى كينو جانە تەاتر اكتريساسى شولپان ەلگەزەكوۆا ەكەنى بەلگىلى بولدى. ال «مەرسەدەس گەلەندۆاگەن» كولىگىنىڭ جۇرگىزۋشىسى وقيعا ورنىنان كەتىپ قالۋى قوعامدىق رەزونانستى كۇشەيتىپ جىبەردى. 

مىناۋ ءبارىن قيراتىپ تاستادى...

كوپ ۇزاماي وقيعا بولعان جەردەن بەينەتۇسىرىلىمدەر تارادى. پوليسيا دەپارتامەنتىنىڭ ورتالىق باسقارۋ جۇيەسىندە تىركەلگەن مىنا بەينەجازبادا جول تالعامايتىن كولىك باعدارشامنىڭ قىزىل تۇسىنە وتكەنى انىق كورىنەدى. الدىن الا بولجام بويىنشا، ەرەجەنى «گەلەندۆاگەن» جۇرگىزۋشىسى بۇزعان. «ول كوپ ۇزاماي ۇستالدى جانە ونىڭ رولگە ماس كۇيىندە وتىرعانى بەلگىلى بولدى»-دەدى پوليسيا دەپارتامەنتىنىڭ رەسمي وكىلى. 1985 جىلى تۋعان كۇدىكتىگە قىلمىستىق كودەكستىڭ ەكى بىردەي بابىمەن ايىپ تاعىلىپ وتىر. ول 12 جىلعا دەيىن باس بوستاندىعىنان ايىرىلۋى مۇمكىن.

"تەرگەپ جاتقان انىقتاۋ باسقارماسىنىڭ قىزمەتكەرلەرى سوت پروكۋرور الدىندا بۇل ازاماتتى قاماۋ تۋرالى ۇسىنىس جاسادى. مۇنى سوتتا، پروكۋرور دا قولدادى. تەرگەۋ كەزىندە بۇل ازامات مىندەتتى تۇردە قاماۋدا بولادى، ءقازىر تەرگەۋ يزولياتورىنا قامالدى. ءتيىستى ساراپتامالار تاعايىندالدى، ءىس ماتەريالدارى سوتقا جولداناتىن بولادى" - دەپ مالىمدەدى الماتى قالالىق پوليسيا دەپارتامەنتىنىڭ رەسمي وكىلى سالتانات ازىربەك.

جەڭىل اۆتوكولىكتىڭ تىزگىنىندە بولعان باقىتنۇر قۇنىپيا ەسىمدى مىنا جىگىت. ول وقيعا ورنىندا بىردەن كوز جۇمعان. الماتى وبلىسى قاسكەلەڭ قالاسىندا كوللەدجدە جۇمىس ىستەگەن. ارىپتەسى ءارى دوسى دولقىن نۇرسالي 2002 جىلى قىتايدان كوشىپ كەلگەنىن ايتتى. سودان بەرى جۇبى جازىلماي سوڭعى كۇنگە دەيىن بىرگە جۇرگەن. باقىتنۇردىڭ اناسى مەن ءۇش باۋىرى قىتايدا تۇرادى دەدى. ال، ءوزى ءبىلىم ىزدەپ، تاريحي وتانىنا قونىس اۋدارعان.

"سوڭعى رەت مەن ونى 28ء-ى كۇنى تاڭەرتەڭ كوردىم، ول ۇيىقتاپ جاتقاندا مەن جۇمىسقا كەتكەنمىن. سودان مەن اۋىرىپ بولنيساعا جاتىپ قالدىم، ەرتەسى ساعات 10-داردا ماعان باقىتنۇر اۆاريادان قايتىس بولدى دەگەن حابار كەلدى. ماشيناسىن كرەديتكە العان بولاتىن. ءوزى ءبىر كۇيزەلىستە ءجۇردى، جالقىسى جەتپەيتىن. سوسىن تاكسي بولامىن دەپ شىعىپ كەتەتىن قالاعا. ويلاماعان جەردەن وسىندايعا دۋشار بولىپ وتىر" - دەدى دوسى دولقىن نۇرسالي.

«ميسۋبيسي» كولىگىندەگى جولاۋشىلاردىڭ اراسىندا امان قالعان جالعىز جولاۋشى ايزادا ساتىبالدينوۆانىڭ جاعدايىن دارىگەرلەر ءالى دە اۋىر دەپ باعالاپ وتىر. ول مۇحتار اۋەزوۆ اتىنداعى دراما تەاترىنىڭ اكتريساسى، ءقازىر ول جانساقتاۋ بولىمىنە جاتىر.

"قازىرگى كەزدە جاعدايى اۋىر. ءبىر قالىپتى. دياگنوزى: قوسارلانعان اۋىر جاراقات، جابىق باس مي جاراقاتى، باس ميىنىڭ سوعىلۋى. كوپتەگەن قابىرعالارى سىنعان، تراۆماتيكالىق شوكتا ءالى"، - دەپ اتاپ ءوتتى الماتى قالالىق شۇعىل كومەك كورسەتۋ اۋرۋحاناسىنىڭ باس دارىگەرىنىڭ ورىنباسارى وڭلاسىن يبەكەنوۆ.

شولپان ەلگەزەكوۆا استانا ارناسىندا قاراشا ايىندا تۇساۋى كەسىلگەن «جۇرەك سىرى» تەلەحيكاياسىندا باستى رولدەردىڭ ءبىرىن سومداعان بولاتىن. ال، جول اپاتىنىڭ ءۇشىنشى قۇربانى-استانا قالاسىنىڭ تۇرعىنى. ەكى بالانىڭ اناسى دينارا حاميتوۆا تاعام تاسىمالدايتىن كومپانيالاردىڭ بىرىندە اتقارۋشى ديرەكتور بولىپ قىزمەت ەتكەن. شەتەلدىك قىمبات كولىك جۇرگىزۋشىسىنىڭ تۋىستارى مارقۇمداردىڭ جاقىندارىنان كەشىرىم سۇراعان. مۇنى قايتىس بولعان جانداردىڭ تۋىستارى ايتتى.

"قالالىق پوليسيا دەپارتامەنتى باستى كۇدىكتىنىڭ اتىن اتاۋدان باس تارتىپ وتىر. پروكۋراتۋرا جەرگىلىكتى پوليسياعا ونىڭ فوتوسۋرەتىن كورسەتىپ، ەسىمىن تولىق اتاۋعا تىيىم سالعان. ءبىراق، سوڭعى كۇندەرى الەۋمەتتىك جەلىلەر مەن كەيبىر اقپاراتتىق اگەنتتىكتەر كۇدىكتىنىڭ ەسىمى يلياس ەكەنى ايتىلىپ جاتىر"، - دەيدى ءتىلشى ريشات اسقاربەك ۇلى.