نۇرسۇلتان نازاربايەۆ قازاقستان ازاماتتىعىن جەڭىلدەتىلگەن تارتىپپەن الۋعا بولاتىن تۇلعالارعا قاتىستى جاڭا جارلىققا قول قويدى. ەلباسىنىڭ قاۋلىسى بويىنشا، ەندى 16 ءتۇرلى كاسىپ پەن ماماندىق يەلەرى قازاقستان ازاماتتىعىنا جەڭىلدەتىلگەن تارتىپپەن قول جەتكىزە الادى.

جاڭا تىزىمگە ەنگىزىلگەن دەنساۋلىق ساقتاۋ سالاسىنداعى ماماندار، بيزنەس ساراپشىلارى، باعدارلامالىق قامتاماسىز ەتۋ ماماندارى، اقپاراتتىق تەحنولوگيا سالاسىنداعى جوبا مەنەدجەرى، روبوتوتەحنيكا، اقپاراتتىق قاۋىپسىزدىك سالاسىنداعى ماماندار، اقپاراتتىق قاۋىپسىزدىك اۋديتورى، اقپاراتتى قورعاۋ بويىنشا ينجەنەرلەر قازاقستان ازاماتتىعىن جەڭىلدىكپەن الا الادى. تىزىمگە سونىمەن قاتار بيوينفورماتيكا، مولەكۋليارلىق بيوتەحنولوگيا جانە بيوينجەنەريا سالالارىنداعى ماماندار، ءبىلىم بەرۋ تەحنولوگياسى، اگرارلىق عىلىم، مەديسينا، قارجى جانە ەكونوميكا سالالارى بويىنشا عىلىمي قىزمەتكەرلەر ەنگىزىلگەن.