وتكەن جەكسەنبىدە ساۋد ارابيادا جاڭا زاڭناما ءوز كۇشىنە ەندى. وعان سايكەس، تالاق العان ايەلدەرگە ەندى نەكەنىڭ بۇزىلعاندىعى تۋرالى سمس-حات كەلەتىن بولدى دەپ حابارلايدى Qamshy.kz اقپارات اگەنتتىگى bbc.com-عا سىلتەمە جاساي وتىرىپ. سەبەبى، وسىعان دەيىن نازىك جاندىلار كۇيەۋلەرىنىڭ ولاردان باس تارتقانىن بىلمەي قالىپ جۇرگەن. بيلىك «قۇپيا اجىراسۋدى» توقتاتىپ، سوتتى نەكەنىڭ بۇزىلۋى جايىندا حابارلاما جىبەرۋگە مىندەتتەدى.

قۇقىق قورعاۋشىلاردىڭ ايتۋىنشا، ءوزىنىڭ نەكەلىك ستاتۋسىن بىلگەن ايەل ءوز قۇقىعىن قورعاي تۇسەدى.

«جاڭا تارتىپكە سايكەس ايەل اجىراسۋ بارىسىندا ادىلەتسىزدىكتىڭ ورىن الۋىنا جول بەرمەي، ءوز قۇقىن جانە سىباعاسىن تالاپ ەتۋگە مۇمكىندىك بەرەدى»- دەيدى نيسرين ال-گامدي بلۋمبەرگۋ. سونىمەن قاتار، اجىراسۋعا دەيىن بەرىلگەن  سەنىم قاعازدارى ەندى زاڭسىز تۇردە پايدالانىلمايدى.

جەرگىلىكتى "Okaz" گازەتىنە سۇحبات بەرگەن ادۆوكات ساميا ءال-حيندي «ايەلدەردىڭ كوبىسى كۇيەۋلەرىنىڭ اجىراسۋ جايىندا ەسكەرتپەگەندىگىن العا تارتىپ، سوتقا اپەللياسيالىق شاعىم تۇسىرگەندىگىن» ايتىپ بەردى.

جوعارىدا ايتىلعان جاڭا زاڭناما تاق مۇراگەرى مۇحاممەد بين سالماننىڭ ارقاسىندا ەنگىزىلگەن. جاقىندا عانا اراب ايەلدەرى ماشينا ايداۋعا، فۋتبول ويىنىن تاماشالاۋعا، كەيبىر ماماندىق بويىنشا قىزمەت ەتۋگە مۇمكىندىك الدى.

قامقورشى (وپەكۋن-رەد.) ەر ادامى بولماسا، اراب ايەلى ءۇشىن ءالى دە جەكە دارا جاساۋعا تىيىم سالىنعان دۇنيەلەر بار:

• پاسپورت راسىمدەۋ

• شەتەل اسۋ

• كۇيەۋگە شىعۋ

• بانكتە ەسەپشوت اشۋ

• جوسپارلى وتا جاساۋ

• تۇرمەدەن شىعۋ