الماتىدا دەنيس تەننىڭ ولىمىنە قاتىستى سوت وتىرىسى جالعاسىپ جاتىر. وقيعا ورنىنا ءبىرىنشى كەلگەن پوليسەيلەر سوت زالىندا سويلەدى، دەپ جازادى Qamshy.kz اقپارات اگەنتتىگى.

كۋاگەر رەتىندە كەلگەن پوليسيا قىزمەتكەرى ەركىنبەك ەردوس ەركىنبەك ۇلى وقيعانىڭ قالاي بولعانىن بايانداپ بەردى. ول - تۇركسىب اۋداندىق پوليسيا ءبولىمىنىڭ جول-پاترۋل پوليسياسىنىڭ ۆزۆود كومانديرى.  ايتۋىنشا، سول ساتتە ماسانچي كوشەسىندەگى اۋداندا بولعان ەكەن. ال توبەلەس قۇرمانعازى جانە بايسەيىتوۆ كوشەلەرىندە ورىن العان.

«سول كۇنى تاڭنان بەرى ماسانچي كوشەسىندەگى اۋداننىڭ قوعامدىق تارتىبىنە جاۋاپ بەرۋ ءۇشىن جۇمىسقا شىقتىم. "شيەۆچەنكو-بايسەيىتوۆ كوشەسىندە پىشاق جاراقاتى بولدى" دەگەن حابار الدىم دا، بىردەن سوعان قاراي جۇيتكىدىم. ول جەرگە قابانباي باتىر مەن ابىلاي حان كوشەلەرى ارقىلى باردىم، تەز جەتۋ ءۇشىن جول ەرەجەسىن بۇزۋىما تۋرا كەلدى»، - دەدى ول.

ايتۋىنشا، وقيعا ورنىنا ابىلايحان كوشەسى ارقىلى كەلگەندە، كامەلەت جاسقا تولماعانداردىڭ ىسىمەن اينالىساتىن ينسپەكسيا قىزمەتكەرىن كورگەن. ول بىرەۋدىڭ ارتىنان قۋىپ ءجۇردى.

«ول ماعان قول بۇلعاپ، جول كورسەتتى. مەن توقتاپ، وندا ەشكىمنىڭ جوق ەكەنىن ايتتىم. ول مەنىڭ كولىگىمە وتىرىپ، وقيعا ورنىنا جەتتىك. جولدا ماعان كۇدىكتىلەردىڭ قانداي كيىمدە بولعانىن ءتۇسىندىردى. ونىڭ ايتقاندارىن راسيا ارقىلى حابارلاپ وتىردىم»، - دەدى پوليسەي سوت زالىندا.

پوليسيا وكىلدەرى راسيا ارقىلى حابار العاننان كەيىن وقيعا ورنىنا 4-6 مينۋتتان سوڭ جەتكەن ەكەن.

-«ول جەردە 5-6 ادام تۇردى. زارداپ شەگۋشى جەردە قانسىراپ جاتتى. الايدا تەرىس قاراپ جاتقاندىقتان العاشىندا كىم ەكەنىن بىلە المادىم. جاراقاتىنىڭ اينالاسى فۋتبولكامەن بايلانعان ەكەن. ادامداردان ءدارى قوبديشاسىن سۇرادىم. جەدەل جاردەم كەلگەنشە، العاشقى كومەك كورسەتكىم كەلدى. 10-12 مينۋتتان سوڭ جەدەل جاردەم كەلدى. راسيا ارقىلى ولاردىڭ تەز كەلۋىن ەكى-ۇش رەت قايتالاپ ايتتىم»، - دەپ قوستادى ءسوزىن.

سونىمەن قاتار، سوت زالىنا ەكىنشى كۋاگەر پوليسەي سەرجان ادالباي كەلدى. ول -  المالى اۋداندىق پوليسيا ءبولىمىنىڭ جول-پاترۋل پوليسياسىنىڭ قىزمەتكەرى. ول وقيعا ورنىنا راسيا ارقىلى حابار العان سوڭ 10 مينۋتتان كەيىن كەلگەن.

♦ەكى پوليسەي ءوز پارىزىن ادال اتقارعاندا، دەنيس تەن ءتىرى قالار ما ەدى؟!

-«ساعات شامامەن 14.30-دا بايسەيىتوۆ-قۇرمانعازى كوشەلەرىنىڭ قيىلىسىندا "پىشاق جاراقاتىمەن بولعان توبەلەس بولدى" دەگەن حابار الدىم." جاقىن اۋدانداعى پوليسەيلەردىڭ بارىنە سوندا بارسىن" دەگەن بۇيرىق ءتۇستى. مەن ول كەزدە مۇقانوۆ-قۇرمانعازى كوشەسىندە بولعانمىن. وقيعا ورنىنا 10 مينۋتتا جەتتىم. ادامدار زارداپ شەگۋشىنى قورشاپ العان. كافە قىزمەتكەرلەرى سپيرت اكەلىپ، جاراقات ورنىنا جاقتى. جەدەل جاردەم 4 مينۋتتان سوڭ كەلدى. جاقىن ماڭدا اۆتو اينەكتەرگە تولى سومكە جاتتى. سومكە تەرەزەسى الىنعان Lexus كولىگىنىڭ جانىندا جاتىر ەكەن. كولىكتى دە قورشاۋعا الدىق»، - دەدى كۋاگەر-پوليسەي.

-«مەن بارعاندا ۆزۆود كومانديرى ەركىنبەك تە سوندا بولدى. قالعاندارى كەيىن كەلدى. زارداپ شەگۋشى ەسسىز جاتتى. كۋاگەردىڭ ءبىرى «جاس جىگىتتەردىڭ توبەلەسىپ جاتقانىن» كورگەنىن ايتتى. كەيىن پوليسيا شاقىرعان. باستى كۋاگەر بالالار الاڭىندا باسقا دا كۋاگەرلەردىڭ بولعانىن ايتتى. الايدا، ولاردى تاپپادىق. وقيعا ورنىنان تەك ءبىر كۋاگەردەن تۇسىنىكتەمە الدىق»، - دەدى پوليسەي.  

♦"دەنيس تەندى تاپسىرىسپەن ولتىرگەن بولۋى مۇمكىن"

ەلدىڭ ماقتانىشى، قازاقستاندىق فيگۋريست دەنيس تەن 2018 جىلدىڭ 19 شىلدەسىندە قايتىس بولدى. دەنيس ءوزىنىڭ كولىگىندەگى اينانى ۇرلاماق بولعان ەكى ۇرىنى بايقاپ قالادى. ۇستاماق بولعاندا، ولاردىڭ ءبىرى سانىنا پىشاق سالىپ جىبەرەدى. كوپ قان جوعالتقان دەنيس تەن اۋرۋحانادا قايتىس بولدى. دەنيستىڭ جاسى نەبارى 25-تە ەدى.

♦"مەن ۇرلىق جاسامادىم، دەنيس تەندى ولتىرمەدىم" (فوتو)

فيگۋريستىڭ ءىسى بويىنشا بۇگىندە ءۇش كۇدىكتى انىقتالىپ وتىر: ولار - ارمان قۇدايبەرگەن، نۇرالى قياسوۆ جانە جانار تولىبايەۆا.