قاراعاندىدا ادام ولىمىمەن اياقتالعان جاپپاي توبەلەسكە قاتىستى ايسۇلتان جاقىپوۆ الەۋمەتتىك جەلىدەگى پاراقشاسىندا جازبا جاريالاپ، "ىسكە نۇكتە قويىلدى دەي بەرۋگە بولادى" - دەيدى.
"بۇگىن جىل باستالعاننان بەرى قولىمىزعا سەمسەر الماساق تا، سمارتفونىمىزدى الىپ «باتىرلىق» تانىتقان، ات ەرتتەمەسەك تە، ديۆانىمىزدى قامشىلاتقان، ءدۇيىم ەلدى ءدۇر سىلكىندىرگەن، قوعامدا ۇلكەن الاڭداۋشىلىق تۋعىزعان قارالى وقيعاعا، ياعني «دريەۆنيي ريم» مەيرامحاناسىنداعى توبەلەستە قازا بولعان راقىمجان باۋىرىمىز جايلى ماسەلەگە نۇكتە قويىلدى دەپ ايتا بەرۋگە ابدەن بولادى.
بۇگىن جەكسەن ءابدىراحمانوۆ اعامىز باستاعان قوعام بەلسەندىلەرىمەن ارميان ەتنوسىنىڭ اقساقالدارى كەزدەستى. بۇل كەزدەسۋدە ءىستى بولىپ جاتقان تاراپتىڭ، ياعني مەيرامحانا يەسىنىڭ اكەسى دە (ەكى كۇدىكتىنىڭ اتاسى) بولدى. ەكىنشى تاراپتا مارقۇم باۋىرىمىزدىڭ اكەسى باقىتجان بولدى. بيلىك وكىلدەرىنسىز، ەكى تاراپتىڭ ۇلكەندەرى، بەلسەندىلەر ءبىر ساعاتتاي وتىرىپ، ورتاق مامىلەگە كەلدىك. ارميان اقساقالدارى دا الدىمەن قايعىلى قازاعا بايلانىستى وزدەرىنىڭ كوڭىلىن ءبىلدىرىپ، سۋىت حاباردى ەستىگەننەن باستاپ-اق بىرگە ەكەندىگىن ايتتى. بولعان جايدىڭ وزەكتى ورتەيتىن وكىنىش، ورنى تولماس قايعى ەكەندىگىن كوڭىل ايتۋشى تاراپ ءسوز اراسىندا بىرنەشە مارتە تىلگە تيەك ەتتى. شەكارا اسىپ كەتكەن باستى كۇدىكتى نارەكتى ۇستاۋعا بار كۇشتەرىن سالعان، ونىڭ تىزگىندەلۋىنە ىقپال ەتكەن تاراپ ناق وسى ارمياندار جاعى. ءبىز دە ءوز كەزەگىمىزدە باز بىرەۋلەر ايتىپ جۇرگەندەي ۇلتارالىق ارازدىق قوزدىرۋ، نەمەسە باسقا دا اقىلعا سىيمايتىن اڭگىمەلەردىڭ مۇلدەم ورىنسىز ەكەندىگىن ايتتىق. «جامان ۇلت بولمايتىندىعىن، جامان ادام بولاتىندىعىن» تۇسىنەتىنىمىزدى جەتكىزدىك.
ءسوزدىڭ قىسقاسى، كىنالىلەر جازادان قاشىپ قۇتىلمايدى جانە ونىڭ قاتاڭ بولاتىندىعىنا بەك سەنىمدىمىز. سەبەبى، بۇعان قۇزىرلى ورگاندار كەپىل بولاتىندىعىن ايتقانى ەستەرىڭىزدە. ال، ەندى ەكى تاراپتىڭ اراسىنداعى بارلىق ماسەلەلەردىڭ ءوز شەشىمىن تاپقانىنا كۋا بولدىم. باقىتجان اعامىز «مەن ولگەن بالامدى ساۋداعا سالمايمىن. باستىسى ەل تىنىش بولىپ، باسسىزدىق ورىن الماسىن» دەپ، بۇل ماسەلەگە نۇكتەسىن قويدى.
بۇل جايلى ەندىگى ءبىزدىڭ دە شۋىلداي بەرەتىن ءجونىمىز جوق. ءىس قاتاڭ باقىلاۋدا، كىنالىلەر ءتيىستى جازاسىن الادى. وسىمەن ءسوز تامام"، - دەيدى ايسۇلتان جاقىپوۆ.
