29 جەلتوقسان كۇنى تاكسيلەتىپ ءجۇرىپ و دۇنيەلىك بولعان باقىتنۇر قۇناپيا ۇلى سۇراۋسىز كەتپەسە ەكەن دەپ جازعان بولاتىنبىز. جالعىز اناسى مەن باۋىرلارى جۇڭگو اسىپ، مارقۇمنىڭ جەتىسىنە قاتىسا الماي، ءبىر ۋىس توپىراق تاستاي الماعانىن دا تىلگە تيەك ەتتىك. باۋىرىنداي بولىپ كەتكەن دوسى قاناتتىڭ اۋزىنان مارقۇمنىڭ باسىندا ءبىر ەمەس، بىرنەشە نەسيە بار ەكەندىگىن ەستىپ قالدىق. دوستارىنىڭ "جينالىپ، نەسيەسىن جاۋىپ بەرمەكپىز" دەگەن نيەتتەرىنە ريزا بولدىق. "الايدا مارقۇم قانداي بانكتەن نەسيە الدى، قايتىس بولعان ادامنىڭ قارىزى كەشىرىلە مە؟" دەگەن سۇراقتاردىڭ جاۋابىن العىمىز كەلدى.

بەلگىلى بولعانىنداي، باقىتنۇر قۇناپيا ۇلى كاسپي بانكتەن نەسيە راسىمدەگەن. ازىرگە قاي جىلى، جالپى قانداي سوما العاندىعى بەلگىسىز. قالعان سومانىڭ مولشەرى – 1 022 962 تەڭگە، قارىزدى بىردەن جاپقان جاعدايداعى سوما مولشەرى – 894 673 تەڭگە. مارقۇم قاڭتاردىڭ 25-نە دەيىن 40 610 تەڭگە تولەم جاساۋى شارت بولعان.

ۇزىناعاشتاعى جيەندەرىنىڭ ايتۋىنشا، بۇل ەكىنشى نەسيەسى. سونىمەن قاتار مارقۇم باقىتنۇردىڭ «نۇربانكتەن» العان نەسيەسى تاعى بار. الايدا بۇل اقپاراتتىڭ راس-وتىرىنە كوز جەتكىزە المادىق. بانك رەسمي حاتتى تالاپ ەتكەندىكتەن، ءدال ءقازىر وقىرمانعا ناقتى سيفرلاردى ۇسىنا المايمىز.

تۋعان ناعاشىسى ءعانيدىڭ ءسوزىن نەگىزگە الساق، جالپى 1،5 ميلليونداي بەرەشەگى بولۋى كەرەك. مارقۇم كەلەر جازدا ءبىر باسىن ەكەۋ ەتىپ، ءۇي سالماقشى بولعان ەكەن. الايدا ول ارمانىنا قول جەتكىزە العان جوق.

كاسپيبانككە دە قوڭىراۋ شالدىق. ولار دا ازىرگە ءۇنسىز. «قامشى» زاڭگەر قايرات جۇكەلدەن اتالمىش جاعداي بويىنشا كەڭەس الدى.

-«6 اي كولەمىندە مارقۇمنىڭ مۇراگەرى انىقتالادى. تۋعان اناسى نە تۋعان ءاعا-ىنىسى بولسا، «مۇراگەر اتانۋ» تۋرالى ارىز جازا الادى. بۇل جاعدايدا ول مارقۇمنىڭ مۇلكىنە يە بولادى. سونىمەن قاتار قارىزىن دا تولەۋگە مىندەتتەلەدى. تولىق سومانى پايىزبەن، نە پايىزسىز تولەيتىنىن بانك ءوزى شەشەدى»، -  دەپ ءتۇسىندىردى قايرات جۇكەل.

مارقۇمنىڭ قىرقىنا دا از ۋاقىت قالدى. جەتىسىن، قىرقىن وتكىزۋدى ءوز موينىنا العان ناعاشىسى عاني "قىتايدا تۇراتىن مارقۇم باقىتنۇردىڭ اناسى بالاسىنىڭ قىرقىنا ۇلگەرىپ كەلسە ەكەن" دەپ ۋايىمداپ وتىر. جاڭا جىل، روجدەستۆو مەرەكەلەرىنە بايلانىستى ق ر ءسىم جۇڭگو تاراپىنا باقىتنۇر قۇناپيا ۇلىنىڭ قايتىس بولۋىنا بايلانىستى تۋىسقاندارىن قازاقستانعا شاقىرىپ، انىقتاما قاعازىن جىبەرمەپتى. وسى ءبىر ماسەلەنىڭ تەزىرەك شەشىمىن تابۋىن مارقۇمنىڭ تۋىسقاندارى تىلەپ وتىرعان جايى بار. «قامشى» اقپارات اگەنتتىگى ءوز كەزەگىندە مينيسترلىككە دە حابارلاسىپ، ءمان-جايدى انىقتاۋدى مىندەت ەتىپ الدى.

سونىمەن قوسا، ءۇش ادامنىڭ اجال قۇشۋىنا سەبەپكەر بولعان كۇدىكتى كار يلياستىڭ "گەلەندۆاگەن" كولىگىن تۋىسقاندارى «تاس كرەديتكە» ۇسىنىپ، اقشا الماقشى بولعانى بەلگىلى بولدى. الايدا ماشينا مۇلدەم جارامسىز بولىپ قالعاندىقتان مەكەمە ۇسىنىستى ماقۇلداماعان.

♦مارقۇم تۋرالى ەستەلىك: ءۇيلى بولامىن دەپ تاكسيلەتىپ ءجۇرۋشى ەدى

♦"بالا-شاعاسى ءۇشىن تاكسيست بولىپ جۇرگەن بەيشارا جۇرگىزۋشىنىڭ جانۇياسىن مۇندا ۇمىت قالدىرعان"