قىزىلوردادا 22 جاستاعى بويجەتكەندى كولىكپەن قاعىپ كەتكەن 14 جاسار بوزبالا قىلمىستىق جاۋاپقا تارتىلماۋى مۇمكىن.

«استانا» ارناسىنا سۇحبات بەرگەن ادۆوكات سۆەتلانا ءبىرجانوۆا وسىلاي دەدى. ويتكەنى، زاڭعا ساي 16 جاستان اسقاندار عانا جول كولىك وقيعاcىنا قاتىستى قىلمىستىق جاۋاپكەرشىلىككە تارتىلادى.  سقو ادۆوكاتتار القاسىنىڭ مۇشەسى سۆەتلانا ءبىرجانوۆانىڭ ايتۋىنشا، كولىك تىزگىندەگەن بالا كامەلەتكە تولماعاندىقتان، ول زاڭعا ساي مۇلدە جاۋاپقا تارتىلمايدى.

-"سوت كولىكتىڭ يەسىن انىقتاۋى ءتيىس. ەگەر تەمىر تۇلپار بالانىڭ اتا- اناسىنا تيەسىلى بولماسا جانە بالا ونى ءوزى ايداپ اكەتكەنى دالەلدەنسە، كولىك يەسى اكىمشىلىك جازاعا تارتىلادى. ەگەر كىسى قاعىپ كەتكەن كولىك بالانىڭ اكە-شەشەسىنىكى بولسا، وندا ولاردىڭ ءبىرى ءۇش جىلعا باس بوستاندىعىنان ايىرىلۋى مۇمكىن"، - دەدى ادۆوكات.

ال ونىڭ كولىگىنىڭ استىندا قالعان قىز العان جاراقاتىنىڭ سالدارىنان 4 كۇن اۋرۋحانادا ەس-تۇسسىز جاتقان كۇيى كوز جۇمعان. ساقشىلار ەكى بىردەي باپ بويىنشا سوتالدى تەرگەۋ جۇرگىزۋدى باستادى. مارقۇمنىڭ تۋىستارى ءادىل تەرگەۋدى تالاپ ەتىپ وتىر.  

-"وقيعا ورنىندا ونىڭ اناسى كولىك تىزگىنىن ۇلىنا ءوزى بەرگەنىن ايتتى. ءتارتىپ ساقشىلارى "ءدال سول ماڭداعى باقىلاۋ كامەرالارى باسقا جاققا قاراپ تۇر" دەدى. شىندىقتى ىزدەپ شىرىلداپ ءجۇرمىز"، - دەدى مارقۇم بويجەتكەننىڭ اپكەسى ءسانيا ابدۋللايەۆا. 

♦بەسىكتەن بەلى شىقپاعان بالا ماشيناعا ءمىنىپ الىپ، ادامدى جازىم ەتتى

وسىدان بىرنەشە كۇن بۇرىن ءسانيا ابدۋللايەۆا ءوزىنىڭ فەيسبۋكتەگى پاراقشاسىندا 14 جاستاعى بوزبالانىڭ قىزىلورداداعى اتاقتى بيزنەسمەننىڭ بالاسى ەكەنىن جازعان بولاتىن. ءسانيانىڭ سوزىنە سەنسەك، 14 جاستاعى جادىگەر سابىرجان جادىگەر ۇلى – بيزنەسمەن جادىگەر وراقبايەۆتىڭ ۇلى. ءارى اكەسى جاقىندا عانا قىزىلوردا قالاسىنىڭ قۇرمەتتى ازاماتى اتاعىن العان ەكەن. ال وراقبايەۆتىڭ كەلىنى اقمارال ءالنازاروۆا – قىزىلوردا وبلىسى دەنساۋلىق ساقتاۋ باسقارماسىنىڭ باسشىسى ەكەنىن جازعان.