استانا قالاسىندا وتكەن باسپا ءسوز كونفەرەنسياسىندا ءىىم ۆيسە-مينيستر جانات سۇلەيمەنوۆ قاراعاندى قالاسىندا جاڭا جىل قارساڭىندا بولعان قاندى وقيعانىڭ سەبەبىن ايتتى.

«توبەلەسكە مەيرامحاناعا كەلگەن قوناقتار مەن مەيرامحانا قىزمەتكەرلەرى قاتىسقان. تەرگەۋ ىسىنە ناتيجەسىندە، 14 ادامنىڭ قاتىسقانى بەلگىلى بولدى، ونىڭ 9-ى مەيرامحانا قىزمەتكەرلەرى.

ۆيدەودا «ەجەلگى ريم» مەيرامحاناسىنىڭ قانداي ۇلكەن ەكەندىگى كورىنەدى، ۇلكەن زالىندا سول كۇنى 400-گە جۋىق ادام بولعان. مەيرامحانا ەرەجەسىنە سايكەس، ول تۇنگى 3-تەن باستاپ ءوزىنىڭ جۇمىسىن توقتاتۋى كەرەك بولعان، كەيىن ساعات 4-كە جۋىق قوناقتارعا ەسكەرتىپ، مەيرامحانانىڭ جابىلاتىنىن ايتقان.

سول جەردە كيكىلجىڭ تۋىنداپ، ارتى توبەلەسكە ۇلاستى. مەيرامحاناعا كەلگەن ادامدار وزدەرىنىڭ دوستارىنا قوڭىراۋ شالىپ شاقىرىپ، 10 شاقتى ادام مەيرامحاناعا باسا كوكتەپ كىرىپ، ءتۇرلى بوقاۋىز سوزدەر ايتىپتى»، - دەيدى ۆيسە-مينيستر.

بەلگىلى بولعانداي، «ەجەلگى ريم» مەيرامحاناسىنىڭ قىزمەتكەرلەرى مەن يەلەرى ولارعا جاۋاپ بەرىپ، توبەلەس باستالىپ كەتكەن.

«ول وقيعادا ارمياندار مەن قازاقتار بىر-بىرىنە قارسى شىعىپ، ۇلتارازدىق كيكىلجىڭ تۋىنداماعان. توبەلەس مەيرامحانادا باستالعان. سوندىقتان مۇنى ۇلتارازدىق قاقتىعىس دەپ تانىماۋ كەرەك»، - دەپ اتاپ ءوتتى سۇلەيمەنوۆ.

توپتىق توبەلەستىڭ سالدارىنان 4 ادام پىشاق جاراقاتىن الىپ، ونىڭ بىرەۋى وقيعا ورنىندا قازا تاپتى.

بۇگىندە سوت شەشىمى بويىنشا 8 ادام تەمىر تورعا توعىتىلعان. بىرەۋى 1 قاڭتار كۇنى قازاقستان-رەسەي شەكاراسىنان ءوتىپ ۇلگەرىپتى. كۇدىكتىنى قولعا ءتۇسىرۋ ماقساتىندا رەسەيگە قازاقستاندىق قارۋلى كۇشتەردىڭ ءبىر توبى جونەلتىلدى.