قازاقستاننىڭ سيريادان ايەلدەر مەن بالالاردى ەلگە قايتارۋعا قاتىستى گۋمانيتارلىق وپەراسياسى ءساتتى اياقتالدى دەپ حابارلايدى Qamshy.kz اقپارات اگەنتتىگى.
"مەنىڭ تىكەلەي تاپسىرمام ارقىلى 6 قاڭتاردا قۇقىق قورعاۋ ورگاندارى مەن ق ر سىم-مەن بىرگە ۇلكەن گۋمانيتارلىق وپەراسيا ءساتتى اياقتالدى. سيريادان قازاقستاننىڭ 47 ازاماتى، ونىڭ ىشىندە 30 بالا قازاقستانعا قايتارىلدى. ولاردى ءتۇرلى جاعدايمەن الداپ، داعدارىس بولىپ جاتقان سيرياعا الىپ كەتكەن. بۇل جونىندە بۇرىن دا ايتقان بولاتىنبىز. كوپشىلىگى سول جەردەگى سوعىستىڭ كەسىرىنەن قايتىس بولدى. ءبىز بىرنەشە دوستىق قارىم-قاتىناستاعى مەملەكەتتەر ارقىلى كەپىلگە الىنعان قازاقستاندىقتاردى ۇشاقپەن الىپ كەلدىك. ولاردىڭ مەديسينالىق كومەك الۋىنا ءبىز قولداۋ كورسەتەتىن بولامىز. تاعدىر تاۋقىمەتىن تارتقان قازاقستاندىقتاردىڭ قۋانىشىندا شەك جوق. ولاردىڭ قۋانىشتى كوز جاسىن كوردىك. بۇل ولارعا دا، باسقا قازاقستاندىقتارعا دا ساباق بولادى دەپ ويلايمىن. ءبىز قازاقستاندىقتار قاي جەردە جۇرسە دە قولداۋ بىلدىرەتىنىن كورسەتىپ وتىرمىز. مەملەكەتتىڭ تۇتاستىعىن قامتاماسىز ەتىپ، بەيبىتشىلىكتى ساقتاۋ باستى مىندەت. سوندىقتان قاقتىعىس ايماعىندا ەرىكسىز جۇرگەن قازاقستاندىقتاردى ەلگە قايتارۋ جۇمىستارىن ءبىز جالعاستىراتىن بولامىز"، - دەدى ەلباسى ءوز مالىمدەمەسىندە.
