وتكەن جىلدىڭ 29 جەلتوقسانىندا بولعان جول اپاتىنىڭ ماسەلەسى ءالى شەشىلەر ەمەس. ءۇش ادامنىڭ ءومىرىن جالماعان اپاتقا كىنالى ازاماتقا قاتىستى تەرگەۋ ىسىنە قازا تاپقان جانداردىڭ تۋىستارىنىڭ كوڭىلدەرى تولمايدى. رەداكسيامىزعا حابارلاسقان مارقۇم حاميتوۆانىڭ ءىنىسى ازامات حاميتوۆ 10 كۇننەن اسا ۋاقىت وتسە دە، ءالى كۇنگە دەيىن كۇدىكتىنىڭ ماس كۇيىندە كولىك باسقارعانىن دالەلدەيتىن ساراپتاما ناتيجەسى دايىن ەمەستىگىن ايتىپ، شاعىم ءبىلدىردى.

«بۇل ءىستى ق ر ىشكى ىستەر مينيسترلىگى ءوز باقىلاۋىنا الدى، سوندىقتان ءبارى وپەراتيۆتى تۇردە جىلدام ورىندالۋى ءتيىس ەمەس پە؟! ءبىراق ون كۇننەن اسا ۋاقىت وتسە دە، ءالى ساراپتاما ناتيجەسى دايىن ەمەس. نە سەبەپتى سوزباقتاپ ءجۇر، تۇسىنبەيمىن. تەرگەۋشىلەرمەن كەزدەسىپ سۇراعانىمىزدا، «ارادا دەمالىس كۇندەر بولدى، ءالى ساراپتاما قورىتىندىسى ءازىر ەمەس. ءبىز ساراپتامالىق ورتالىققا جىبەردىك، ءالى جاۋابىن كۇتۋدەمىز»، - دەپ جاۋاپ بەردى.

ون كۇن – از ۋاقىت ەمەس، الداعى ۋاقىتتا "گەلەندۆاگەن" جۇرگىزۋشىسىنىڭ، شىن مانىسىندە، ماس بولعانىن دالەلدەي الامىز با؟ وسى سۇراق ءبىزدى مازالايدى»، - دەيدى ازامات حاميتوۆ.

♦ءۇش ادامنىڭ ءومىرىن جالماعان جول اپاتىنا قاتىستى تىڭ دەرەكتەر پايدا بولدى

وسى ۋاقىتقا دەيىن جەرگىلىكتى ب ا ق بەتتەرىندە جانە الەۋمەتتىك جەلىدە تاراعان اقپاراتتا كۋاگەرلەر قىلمىسكەردىڭ ماس كۇيىندە كولىك باسقارعانىن ايتقانى بەلگىلى، سونىمەن قاتار، كۋاگەر رەتىندە تۇسىنىكتەمە دە بەرگەن. ال مارقۇمنىڭ تۋىسى "ۋاقىت وتە كەلە كۋاگەرلەر وزدەرىنىڭ پىكىرىنەن باس تارتا ما" دەپ الاڭدايدى.

«تەرگەۋشىلەر كۋاگەرلەردىڭ بەرگەن تۇسىنىكتەمەسى ارقىلى يلياس يسماروۆيچ ماس بولدى دەپ ايتىپ وتىر. ءبىراق ولار دا - ادامدار، بۇگىن وسىلاي دەپ تۇسىنىكتەمە بەرسە، كەلەسى كۇنى بۇل پىكىرىنەن اينىپ قالۋى دا ابدەن مۇمكىن. سوندىقتان دا ونىڭ كىنالى ەكەندىگىن دالەلدەيتىن رەسمي قۇجاتتىڭ بولۋى شارت»، - دەيدى ول.

♦مارقۇم حاميتوۆانىڭ ۇلى: "ولار سول كۇنى شولپان ەلگەزەكوۆانىڭ ۇيىنە بەت العان بولاتىن"

سونىمەن قاتار، ول "گەلەندۆاگەن" كولىگىندە، شىن مانىسىندە، قانشا ادام وتىرعان؟» دەگەن سۇراققا جاۋاپ ىزدەپ جۇرگەنىن ايتتى.

«جول اپاتى بولعان كۇنى "گەلەندۆاگەن" كولىگىندە ءبىر عانا ادام بولدى دەپ ايتىلىپ ءجۇر. ءبىراق الەۋمەتتىك جەلىدە تارالعان وقيعا ورنىندا تۇسىرىلگەن ۆيدەولاردا كۋاگەرلەر كولىكتە ءۇش ادامنىڭ بولعانىن ايتادى. ال تەرگەۋشىلەر بولسا، «بەينەباقىلاۋ كامەرالارىنان ناقتى قانشا ادام بولعانى كورىنبەيدى» - دەيدى. سوندىقتان بۇل ءىس بويىنشا تەك ءبىر ادام عانا جاۋاپقا تارتىلۋدا.

انىعىنا كەلسەك، جول اپاتى ورىن العان كەزدە قىلمىسكەر وقيعا ورنىنان ءىزىن سۋىتىپ، باسقا بىرەۋدىڭ كولىگىمەن كەتىپ قالعانى بەلگىلى. كەيىن باق-تا تارالعان اقپاراتتا ونى 30 جەلتوقساندا قولعا ءتۇسىردى دەپ ايتقان ەدى. ال تەرگەۋشىلەر ءوز سوزىندە "30-ى كۇنى كار يلياس يسماروۆيچ بولىمشەگە ءوزى كەلىپ، كىناسىن مويىندادى" - دەپ ايتىپ وتىر. تۇسىنبەدىم، سوندا ولاردىڭ ماقساتى نە؟»، - دەپ ايتىپ ءوتتى ازامات حاميتوۆ.

بۇل ىسكە قاتىستى ءبىز زاڭگەردەن كەڭەس سۇراپ، ونىڭ پىكىرىن بىلگەن ەدىك.

«بۇل ناركولوگيالىق ساراپتاما كاتەگورياسىنا جاتادى، ول – كۇردەلى كاتەگوريا. زاڭ بويىنشا، مۇنداي ساراپتامانىڭ مەرزىمى 30 تاۋلىككە دەيىن بولادى. دەگەنمەن، ودان ەرتە دايىن بولۋى مۇمكىن نەمەسە قانداي دا ءبىر مالىمەتتەر جەتىسپەگەن جاعدايدا پروسەستى توقتاتىپ قويۋى دا ابدەن مۇمكىن»، - دەيدى زاڭگەر قايرات جۇكەل.

ەستەرىڭىزگە سالا كەتەيىك، 2018 جىلدىڭ 29 جەلتوقسانىندا الماتى قالاسىنداعى اباي جانە سەيفۋللين كوشەلەرىنىڭ قيىلىسىندا جانتۇرشىگەرلىك جول اپاتى بولىپ، ءۇش ادام – اكتريسا شولپان ەلگەزەكوۆا، دينارا حاميتوۆا جانە كولىك جۇرگىزۋشىسى باقىتنۇر قۇناپيا ۇلى – وقيعا ورنىندا كوز جۇمعانى بەلگىلى، ال اكتريسا ايزادا ساتىبالدييەۆا ەس-تۇسسىز كۇيدە اۋرۋحاناعا جەتكىزىلگەن. ماس كۇيىندە كولىك تىزگىنىن ۇستاعان دۇنگەن ازاماتى قىزىل باعدارشامعا ءوتىپ كەتىپ، ساعاتىنا 120 شاقىرىم  جىلدامدىقپەن Mitsubishi Galant كولىگىن كەلىپ سوققان. قازا تاپقان جانداردىڭ تۋىستارى كىنالى ازاماتتىڭ ۇستىنەن سوتقا ارىز بەرىپ، لايىقتى جازاعا تارتىلۋىن تالاپ ەتۋدە.