باس جوسپار بويىنشا ازىرەت سۇلتان كەسەنەسى ورنالاسقان ەكى مىڭنان استام گەكتاردى الىپ جاتقان تۇركى الەمىنىڭ مادەني جانە رۋحاني ورتالىعىندا كونە زامان ۇلگىسىندەگى كوشەلەر، ساياباقتار، سونداي-اق، تۇركى مادەنيەتىمەن تانىسۋ ايماعى  ت. ب. بولاتىن كورىنەدى. ءسويتىپ،  تۋريستەر ءۇشىن قولايلى جاعداي تۋعىزىلعالى جاتىر. بارەكەلدى!

 دەسەك تە، اپىر-توپىر اسىعىستىققا سالىنۋعا  مۇلدەم بولمايدى. ازىرەت سۇلتاننىڭ كەسەنەسىنىڭ 500-700 مەتر اينالاسىندا قانشاما تاريحي ورىندار، كونەدەن قالعان جادىگەرلەر بار ەكەنىنەن جەرگىلىكتى كوزى اشىق  تۇرعىندار بولماسا، بىلايعى جۇرت مۇلدەم بەيحابار.  ماسەلەن، قۇمشىق اتا جەر استى مەشىتى، ءجاۋدىر انا مەشىتى، جەتى اتا قاقپاسى، ۇندەمەس اتا مەن ءمىر اراب اۋليەلەر جاتقان جەر ت.ب. گيدتەر ول جاققا تۋريستەردى اپارعان دا ەمەس، اپارمايدى دا. وسى جادىگەرلەردى قايتا قالپىنا كەلتىرۋ كەرەك.

ەندىگى ءبىر ماسەلە. قالانىڭ باس جوسپارىنا سايكەس ازىرەت سۇلتاننىڭ اينالاسىن  ەتنوباق  بولعان سوڭ، كەسەنەنىڭ اينالاسىنا سۋ جىبەرتىلىپ، كوگەرتىلەتىنى بەلگىلى.   ونسىز دا ياسساۋي ماۆزولەيىنىڭ  قابىرعالارىن سىز باسىپ،  كۇمبەزدەرى جارىلا باستاعان، سۋ تامشىلايتىن جەرلەرى جوق ەمەس، بار.

وسى ورايدا رۋح ساردارى، اتاقتى تايقازاندى قۇتتى ورنىنا قوندىرعان  وزبەكالى جانىبەكتىڭ بىلاي دەپ جازعانىن قاپەردەن شىعارماۋعا ءتيىسپىز:

«ءقازىر سول ازىرەت-سۇلتاننىڭ اينالاسىن كوگەرتەمىز دەپ ارىق قازىپ، سۋ جىبەرىپ جاتىر. بۇل دۇرىس ەمەس. ونىڭ استىندا كوپ عاسىرلىق ەسكى قونىستار، مادەني قازبا بايلىق بار. قانشاما ولىك جاتىر. وسىنداي بىلمەستىكتىڭ سالدارىنان ونسىز دا بوساپ تۇرعان قۇرىلىستىڭ ىرگەسىن ودان سايىن ۇڭگىپ جاتىرمىز. وزگەلەردى الايىقشى. اناۋ وزبەكستانداعى رەگيستاننىڭ قاسىندا اعاش بار ما، جوق. بولماسا افينىداعى مازارلاردى (اكروپول)، ريمدەگى — كوليزەيدى، پاريجدەگى — «قۇداي – انا» سوبورىن»، ءتىپتى سوناۋ وڭتۇستىك امەريكاداعى جەرگىلىكتى حالىقتاردىڭ جەرگىلىكتى ەسكەرتكىشتەرىن الىڭىز، ءالى دە سول قالپىندا تۇر عوي. ال بىزدە باسقاسى وڭىپ تۇرعانداي سول جەرلەردى كوگەرتە قالايىق دەيدى. وسىناۋ ورەسىزدىكتى تەز ارادا توقتاتپايتىن بولسا، ءبىزدىڭ ۇرپاقتىڭ كەزىندە ولار تۇرار، ال كەلەر ۇرپاق كورمەۋى ابدەن مۇمكىن».      

قاپەردەن شىعارماۋعا ءتيىس وسيەت، ىلعي دا ەستە ۇستايتىن امانات وسى بولسا كەرەك!