باس پروكۋراتۋرا ەلدە سوڭعى ۋاقىتتا قوعامدىق رەزونانس تۋدىرعان بىرنەشە وقيعاعا قاتىستى مالىمدەمە جاسادى.
الماتى وبلىسىندا كيىز ۇيدە بي بيلەگەن جاستاردىڭ ارەكەتى بويىنشا قىلمىستىق كودەكستىڭ 174-بابى (الاۋىزدىق قوزدىرۋ) اياسىندا تەرگەۋ جۇرگىزىلۋدە.
سونداي-اق، ارابشا جازۋى بار تۋمەن سۋرەتكە تۇسكەن نيكابتاعى ءتورت قىز ۇساق بۇزاقىلىق بويىنشا اكىمشىلىك جاۋاپقا تارتىلدى. ولاردىڭ ءبىرى 15 تاۋلىككە قامالسا، وزگەلەرىنە ايىپپۇل سالىنعان. بۇل وقيعا اتىراۋ وبلىسىندا بولعان. سونىمەن قاتار، بۇل فاكتى بويىنشا مەملەكەتتىك رامىزدەردى قورلاۋ بابىمەن (قك 372-باپ) تەرگەۋ باستالعان.
باس پروكۋراتۋرا Ozon ماركەتپلەيسىندە ارابشا جازۋى بار مەملەكەتتىك تۋدىڭ ساتىلۋىنا بايلانىستى جارنامالاردىڭ جويىلعانىن مالىمدەدى. قۇقىق قورعاۋ ورگاندارى سايت اكىمشىلىگىنە زاڭ بۇزۋشىلىقتاردى جويۋ جونىندە ۇسىنىس جولداعان.
مادەنيەت جانە اقپارات مينيسترلىگى ونلاين پلاتفورمالاردا ءدىني ماتەريالداردى ساتۋعا قاتىستى زاڭنامالىق رەتتەۋ ماسەلەسىن قاراستىرىپ جاتىر. جاستار اراسىندا ءدىني ەكسترەميزمنىڭ الدىن الۋ ماقساتىندا ءاقپاراتتىق-تۇسىندىرۋ جۇمىستارى جۇرگىزىلۋدە.
وقۋ-اعارتۋ مينيسترلىگى مەكتەپتەردە "زايىرلىلىق جانە ءدىنتانۋ نەگىزدەرى" كۋرسىن ەنگىزسە، جوعارى وقۋ ورىندارىندا ءدىن سالاسىنا ارنالعان جاڭا ءبىلىم بەرۋ باعدارلامالارى اشىلىپ جاتىر.