ساۋد ارابياسى كورولدىگى 2025 جىلدىڭ 29 ءساۋىرى مەن 10 ماۋسىمى ارالىعىندا زاڭسىز جانە ۆيزاسىز قاجىلىق جاساعان، سونداي-اق ولارعا كومەكتەسكەن ادامدارعا دا تىيىم سالىناتىنىن مالىمدەدى.

قازاقستان مۇسىلماندارى ءدىني باسقارماسىنىڭ قاجىلىق ءبولىمىنىڭ مالىمەتىنشە، ساۋد ارابياسى قاجىلىقتى زاڭسىز ورىنداپ جاتقان نەمەسە وعان ارەكەت ەتكەن شەتەل ازاماتتارىنا قاتىستى ءبىرقاتار قاتاڭ شارالاردى قولعا العان.

قاجىلىق ۆيزاسى جوق شەتەل ازاماتتارى مەككە مەن قاسيەتتى ورىندارعا كىرگەن جاعدايدا، ولارعا 20 مىڭ ساۋد ارابياسى ريالى (شامامەن 2 691 499 تەڭگە) كولەمىندە ايىپپۇل سالىنادى. ال ولاردىڭ ساپارىن باسقا ۆيزالارمەن ۇيىمداستىرعان تۇلعالارعا 100 مىڭ ريالعا دەيىن (13 508 278 تەڭگە) ايىپپۇل قاراستىرىلعان. بۇل ايىپپۇل ءاربىر زاڭسىز كەلگەن ازاماتقا جەكە-جەكە ەسەپتەلەدى.

سونداي-اق، زاڭسىز قاجىلىق جاساعان ازاماتتاردى جاسىرعاندار، كولىكپەن تاسىمالداعاندار، قوناق ۇيگە نەمەسە جەكە ۇيلەرگە ورنالاستىرعاندارعا دا ءدال وسى كولەمدە ايىپپۇل سالىنادى.

بۇدان بولەك، زاڭسىز قاجىلىق جاساعاندار دەپورتاسيالانادى جانە ولارعا 10 جىل بويى ساۋد ارابياسىنا كىرۋگە تىيىم سالىنادى. ەگەر زاڭ بۇزعانداردى تاسىمالداعان كولىك ولاردىڭ ءوز مەنشىگىندە بولسا، سوت شەشىمىمەن مەملەكەت مەنشىگىنە وتكىزىلەدى.

ۆيزا مەرزىمى اياقتالعان سوڭ ەلدەن شىقپاعان شەتەل ازاماتتارىنا 50 مىڭ ريال (شامامەن 6،8 ملن تەڭگە) كولەمىندە ايىپپۇل سالىنىپ، 6 ايعا دەيىن قاماۋعا الۋ جانە دەپورتاسيا جازاسى قاراستىرىلعان.

ساۋد ارابياسى 2025 جىلى 1،8 ميلليون قاجىنى قابىلداۋدى جوسپارلاپ وتىر. وسىعان بايلانىستى قاجىلىق تەك ارنايى قاجىلىق ۆيزاسى ارقىلى عانا رۇقسات ەتىلەدى. باسقا ۆيزا تۇرلەرىمەن مەككە مەن قاسيەتتى جەرلەرگە كىرۋگە قاتاڭ تىيىم سالىنعان.

2024 جىلى ساۋد ارابياسىنا وزگە ۆيزالارمەن كەلىپ، قاجىلىق ءراسىمىن زاڭسىز ورىنداعان 300 مىڭنان استام شەتەلدىك انىقتالعان. وسى سەبەپتى 2025 جىلدىڭ 29 ءساۋىرى مەن 9 ماۋسىمى ارالىعىندا بىرنەشە ەلدەر ءۇشىن ەلەكتروندى ۆيزا بەرۋ ۋاقىتشا توقتاتىلدى.