ەلىمىزدەگى توتەنشە جاعدايعا بايلانىستى رامازان ايىندا بەرىلەتىن ءپىتىر ساداقاسى مەن زەكەتتى kaspi.kz ءموبيلدى قوسىمشاسى ارقىلى اۋدارۋعا بولادى، دەپ جازادى Qamshy.kz اقپارات اگەنتتىگى muftyat.kz سايتىنىڭ دەرگىن نەگىزگە الىپ.

ەلوردادا باس ءمۇفتي ناۋرىزباي قاجى تاعان ۇلىنىڭ توراعالىعىمەن ونلاين رەجيمدە وتكەن ءتورالقا ماجىلىسىندە وسىنداي شەشىم قابىلداندى.

قمدب جانە بانك باسشىلىعى اراسىندا جاسالعان كەلىسىمگە سايكەس، بۇل جوبا قاسيەتتى رامازان ايىندا جۇزەگە اسپاق. بۇگىندە ورتاق جوبانىڭ قوسىمشا جۇمىستارى قالدى. جۇمىس تولىق اياقتالعان سوڭ جاقىن كۇندەردە ونلاين ساداقا بەرۋ جوباسى ىسكە قوسىلادى. بۇل تۋرالى قوسىمشا حابارلانادى.

ءموبيلدى قوسىمشاعا ءار وبلىس پەن رەسپۋبليكالىق ماڭىزى بار قالالارداعى ورتالىق مەشىتتەردىڭ ەسەپشوتى ەنگىزىلەدى. ءار ازامات ءوز وڭىرىندەگى مەشىتتىڭ ەسەپشوتىنا ءپىتىر ساداقاسى مەن زەكەتىن ۇيدەن شىقپاي ونلاين رەجيمدە اۋدارا الادى.

ايتا كەتسەك، قمدب ءتورالقا ءماجىلىسىنىڭ شەشىمىمەن بيىل ءبىر ادام اتىنان بەرىلەتىن ءپىتىر ساداقا مولشەرى 370 تەڭگە دەپ بەكىتىلدى. ءپىتىر ساداقانىڭ قۇنى ەكى كەلى ۇننىڭ رەسپۋبليكا بويىنشا ەسەپتەگەندە نارىقتىق ورتاشا باعاسىمەن شىعارىلدى. ال ماتەريالدىق جاعدايى بار ازاماتتار ءپىتىر ساداقانى مەيىز نەمەسە قۇرما قۇنىمەن بەرگەنى ابزال.

ءوز قاجەتتىلىگىن قوسپاعاندا مال-مۇلكى، دۇنيەسى كۇمىس نيسابىنا جەتكەن، ياعني 127 مىڭ تەڭگەسى بار ادام رامازان ايىندا ءوزى جانە جانۇياسى ءۇشىن ءپىتىر ساداقاسىن بەرۋى – ءۋاجىپ (مىندەت). ءپىتىر ساداقاسى پەندەنىڭ ورازا كەزىندە جىبەرىپ العان قاتە-كەمشىلىكتەرىنىڭ وتەۋى ءۇشىن جانە كومەككە مۇقتاج جانداردى ماتەريالدىق قولداۋ ماقساتىندا بەرىلەدى.      

بيىل قاسيەتتى رامازان ايى 24 ساۋىردە باستالادى. توتەنشە جاعدايعا بايلانىستى جۇقپالى ىندەتتىڭ الدىن الۋ ءۇشىن مەشىتتەردە جۇما، تاراۋىق، كۇندەلىكتى جاماعات نامازدارى ۋاقىتشا وقىلمايدى. سونىمەن قاتار، مەشىت پەن قوعامدىق ورىنداردا اۋىزاشار بەرىلمەيتىن بولدى.