تەپليچنوە اۋىلىنداعى بالا كومەگى: ءبىر جاعىنان — ۇلگى، ەكىنشى جاعىنان — زاڭ بۇزۋشىلىق

بىرەر كۇن بۇرىن سولتۇستىك قازاقستان وبلىسى اكىمدىگىنىڭ باسپا ءسوز قىزمەتى تەپليچنوە اۋىلىنداعى بوگەتتى نىعايتۋ جۇمىستارىنا ۇلكەندەرمەن بىرگە اتسالىسىپ جۇرگەن بالا تۋرالى حابارلاپ، ونىڭ ارەكەتىن ەلگە ۇلگى ەتكەن بولاتىن. بەينەروليكتە ءجاسوسپىرىمنىڭ كۆادروسيكلمەن قاپ تاسىپ جۇرگەن ءساتى كورسەتىلگەن.

اكىمدىك رۋسلان مەن دينارا مىرزاباي وتباسىن بىرلىكتىڭ جانە تۋعان جەرگە دەگەن جاناشىرلىقتىڭ جارقىن ۇلگىسى رەتىندە اتاپ ءوتتى. «ولار اۋىل تۇرعىندارىمەن بىرگە بوگەتتى نىعايتۋ جۇمىسىنا بەلسەنە قاتىسۋدا. ۇلدارى داستان دا ۇلكەندەرگە كومەكتەسىپ، ءوز كۆادروسيكلىندە قاپ تاسىپ، قورعانىس نىساندارىن كۇشەيتۋگە اتسالىسۋدا. بۇل — وزگەلەرگە ۇلگى بولارلىق ءىس»، – دەلىنگەن اكىمدىك مالىمدەمەسىندە.

الايدا بۇل ارەكەت قوعامدا ەكى ءتۇرلى پىكىر تۋعىزدى. الەۋمەتتىك جەلى قولدانۋشىلارىنىڭ ءبىرى: «بۇل بالانىڭ قاجەتتى ساناتتاعى جۇرگىزۋشى كۋالىگى بار ما؟» – دەپ ساۋال تاستادى.

وسىعان بايلانىستى سولتۇستىك قازاقستان وبلىسىنىڭ پوليسيا دەپارتامەنتى تۇسىنىكتەمە بەردى. ۆەدومستۆو مالىمەتىنشە، 26 ءساۋىر كۇنى تەپليچنوە اۋىلىندا بوگەتتى بەكىتۋ كەزىندە 34 جاستاعى تۇرعىن ءوزىنىڭ 10 جاستاعى ۇلىنا كۆادروسيكل جۇرگىزۋگە رۇقسات بەرگەن. بۇل ارەكەت ق ر اكىمشىلىك قۇقىق بۇزۋشىلىق تۋرالى كودەكسىنىڭ 612-بابى 5-بولىگىنە سايكەس قۇقىقبۇزۋشىلىق بولىپ سانالادى – ياعني، كولىك قۇرالىن باسقارۋ قۇقىعى جوق ادامعا كولىك تىزگىنىن بەرۋ.

سونىڭ ناتيجەسىندە بالانىڭ اكەسىنە 50 ايلىق ەسەپتىك كورسەتكىش (اەك) كولەمىندە، ياعني 196 600 تەڭگە مولشەرىندە ايىپپۇل سالىندى (1 اەك – 3 932 تەڭگە).

ءبىر جاعىنان — ازاماتتىق بەلسەندىلىك پەن پاتريوتيزم، ەكىنشى جاعىنان — زاڭ تالاپتارىنىڭ بۇزىلۋى. بۇل وقيعا قوعامدا تاربيەنىڭ، جاۋاپكەرشىلىكتىڭ جانە زاڭدى ساقتاۋدىڭ اراقاتىناسىن تاعى ءبىر مارتە ويلانۋعا تۇرتكى بولدى.