سولتۇستىك كورەيا ليدەرى كيم چەن ىن ءاردايىم جيىندارعا ءوزىنىڭ جۇبايى لي سول چجۋمەن كەلۋدى داستۇرگە اينالدىرعان. بەيجىڭگە قحر باسشىسىمەن كەزدەسۋگە كيم تاعى دا زايىبىمەن كەلگەن. رەسمي كەزدەسۋدە ءجيى كورىنەتىن لي سول چجۋ تۋرالى اقپارات مۇلدە از. سونىمەن، كيم چەن ىننىڭ "جۇمباق جارى" تۋرالى نە بىلەمىز؟
ول العاش رەت 2011 جىلى تەلەجاڭالىقتاردا كورىندى. كورەرمەندەر كيم چەن ءيردى (كيم چەن ىننىڭ اكەسى — رەد.) جەرلەۋ ءراسىمى كەزىندە كيم چەن ىننىڭ جانىندا تۇرعانىن بايقاعان. دەگەنمەن، ونىڭ كىم ەكەنىن ول ۋاقىتتا ەشكىم دە بىلمەگەن.
2012 جىلعا دەيىن ونى ءبارى كيم چەن ىننىڭ قارىنداسى نەمەسە الىس تۋىسى دەپ ويلاپ كەلگەن.
ءتىپتى، وڭتۇستىك كورەيانىڭ بارلاۋ قىزمەتى ونى "پوچحونبو" ءانسامبلىنىڭ ءانشىسى دەگەن اقپارات تاراتقان. سەبەبى، سول كەزدە سولتۇستىك كورەيا بيلىگى تۇرعىنداردان ءانشىنىڭ ديسكتەرىن جيناعانى تۋرالى راستالماعان اقپاراتتار تاراعان بولاتىن.
وزگە دە اقپارات كوزدەرىندە لي سول چجۋ 2005 جىلى وڭتۇستىك كورەيادا جەڭىل اتلەتيكادان وتكەن ازيا چەمپيوناتىنا سولتۇستىك كورەيالىق كوماندا قۇرامىندا قولداۋشى توپپەن بىرگە بارعانى جازىلعان.
ال ونىڭ كيم چەن ىنمەن ۇيلەنۋى جايلى سولتۇستىك كورەيالىق ب ا ق تەك 2012 جىلى شىلدەدە جاريالاعان. بۇل اقپاراتتى تەكسەرگەن وڭتۇستىك كورەيانىڭ بارلاۋ قىزمەتى تويدىڭ ءۇش جىل بۇرىن بولعانى تۋرالى بولجام ايتادى.
كيم چەن ىننىڭ ايەلىنىڭ ەسىمى دە بەلگىسىز
2018 جىلعا دەيىن رەسمي باسىلىمداردا ونى «جولداس لي» دەپ جازىپ كەلدى. ءقازىر ونىڭ جاڭا اتاعى پايدا بولدى — "قۇرمەتتى، ءبىرىنشى حانىم". سولتۇستىك كورەيا ديناستياسىندا ەسىمدى وزگەرتۋ بۇرىننان قالىپتاسقان. سول سەبەپتى ءالى كۇنگە ونىڭ شىن ەسىمى لي سول چجۋ ەكەنى تولىق انىقتالماعان.
كورەيانىڭ ءبىرىنشى حانىمى قانداي وتباسىندا دۇنيەگە كەلگەن؟
لي سول چجۋدىڭ بالالىق شاعى جايلى رەسمي اقپارات جوق. "North Korea Leadership Watch" باسىلىمىنىڭ رەداكتورى مايكل مەددەن ونىڭ سولتۇستىك كورەيانىڭ شىعىس جاعالاۋىنداعى چحوندجين قالاسىندا دۇنيەگە كەلگەنىن جازادى. پحەنيانداعى كيم ير سەن اتىنداعى ۋنيۆەرسيتەتتە ءبىلىم العاندىعى جايلى اقپارات بار. كەيبىر دەرەككوزدە ونىڭ اكەسى دارىگەر بولعان دەسە، ەندى ءبىرى اسكەري وفيسەر دەپ كورسەتەدى. ونىڭ كيم چەن ىنمەن قالاي تانىسقانى دا قۇپيا بولىپ قالدى.
پرەزيدەنتتىڭ قانشا بالاسى بار؟
لي سول چجۋ مەن كيم چەن ىننىڭ ءۇش بالاسى بار دەگەن دەرەكتەر كەزدەسەدى. دەگەنمەن، اقپارات 100 پايىز راستالماعان. مۇنداي اقپاراتتىڭ تارالۋىنا كيمنىڭ زايىبىنىڭ ۇزاق ۋاقىت كوپشىلىك الدىنا شىقپاۋى سەبەپ بولعان. باسىلىمدار "2010 جىلى لي سول چجۋ ۇل بالانى دۇنيەگە اكەلدى" دەپ جازسا، "2012 جىلى ونىڭ تاعى اياعى اۋىر بولۋى مۇمكىن" دەگەن اقپارات تاراعان. وڭتۇستىك كورەيانىڭ بارلاۋ قىزمەتى "2017 جىلى لي سول چجۋ ءۇشىنشى ءسابيىن دۇنيەگە اكەلدى" دەپ بولجام جاسادى.
سولتۇستىك كورەيانىڭ ءبىرىنشى حانىمى قالاي ساندەنەدى؟
سۋرەتتەردەن سولتۇستىك كورەيانىڭ ءبىرىنشى حانىمى باتىستىق قىمبات ءارى ءساندى كيىمدەردى ۇناتاتىنىن بايقايمىز. جاپوندىق اسپاز كەندزي فۋدزيموتو كيم اۋلەتىنىڭ بىرنەشە جىل باس اسپازى بولعان. ول 2012 جىلى لي سول چجۋمەن كەزدەسۋى جايلى ەستەلىگىندە ونىڭ داۋىسى جاعىمدى ءارى ءوزى ءسانقوي بولعان دەيدى. اتاقتى "Christian Dior" برەندىنىڭ سومكەسىن تارتۋ ەتكەندىگىن دە جازادى.
سۋرەتتەردەن لي سول چجۋدىڭ "Dior" جانە "Chanel" برەندتەرىنىڭ سومكەسىن ۇناتاتىنىن بايقايمىز. كوپتەگەن باسىلىمداردا كيمنىڭ جۇمباق جارى "Red Valentino"، "Dior"، "Tiffany"، "Movado" سىندى برەندتەرگە باسىمدىق بەرەتىنىن بايقاعان.
پىكىر قالدىرۋ