6 قاڭتار كۇنى «جۋسان» وپەراسياسى بارىسىندا سيريادان قازاقستانعا ورالعان وتانداستارىمىزدى ازاماتتىعىنان ايىرۋ ىسىنە قاتىستى ۇقك دەپارتامەنت باسشىسى باحىتبەك راحىمبەردييەۆ پىكىر ءبىلدىردى، دەپ جازادى Qamshy.kz اقپارات اگەنتتىگى كازتاگ سايتىنىڭ مالىمەتىنە سۇيەنە وتىرىپ.

-«ازاماتتىقتان ايىرۋ ماسەلەسىنە كەلسەك، مۇنداي ەرەجە ەلباسىنىڭ باستاماسىمەن زاڭعا ەنگىزىلگەن. قازىرگى ۋاقىتتا قارۋلى قاقتىعىس ايماعىندا بولىپ كەلگەن ازاماتتار ءۇشىن مۇنداي شارا ازىرلەنىپ جاتىر. سوت شەشىمى بويىنشا جۇزەگە اسىرىلۋى ابدەن مۇمكىن. الايدا، 6 قاڭتار كۇنى قازاقستانعا ورالعاندار مۇلدە باسقا كاتەگورياعا جاتادى. ولار ءوز ەرىكتەرىمەن ەلگە قايتقىلارى كەلەتىنىن ايتقان. ال تەرروريستىك توپقا قاتىسى بار دەپ ايىپتالعاندار جازاسىن قازاقستاندا وتەيتىن بولادى. ال كىناسى جوق قازاقستاندىقتاردى ازاماتتىعىنان ايىرۋدىڭ ەش سەبەبى جوق، جاقىندا ورالعان ازاماتتاردىڭ كوپشىلىگى كىناسىز»، - دەپ ايتىپ ءوتتى ب.راحىمبەردييەۆ.

«جۋسان» وپەراسياسى بارىسىندا ەلگە ورالعان قازاقستاندىقتاردىڭ جەتەۋى تەرروريستىك  توپقا قاتىسى بار دەپ ايىپتالعان بولاتىن.

ايتا كەتەيىك، كەشە عانا ەلباسى سيريادان ورالعان وتانداستار جونىندە مالىمدەمە جاسادى.

-«6 قاڭتار كۇنى قۇقىق قورعاۋ ورگاندارى مەن ق ر ءسىم بىرلەسە وتىرىپ «جۋسان» گۋمانيتارلىق وپەراسياسىن وتكىزدى. ناتيجەسىندە 47 قازاقستاندىق ەلگە ورالدى، ونىڭ 30-ى كىشكەنتاي بالالار. ولار بەلگىسىز بىرەۋلەردىڭ الداۋىنا ءتۇسىپ، داعدارىس كەڭىنەن جايلاعان ەلگە جەتكىزىلىپ، سوندا تەرروريستەردىڭ قولىندا كەپىلدە بولعان»، - دەپ اتاپ ءوتتى نۇرسۇلتان نازاربايەۆ.

ەلباسى ءوز سوزىندە قازاقستاندىقتاردى قاي ەلدە بولماسىن قاشان دا  قولداۋعا دايىن ەكەندىگىن جەتكىزدى.