جۇزدەن استام انا قۇقىق قورعاۋ ورگاندارىنان سيريادا جۇرگەن بالالارىن ەلگە قايتارۋدى ءوتىنىپ، كومەك سۇرادى دەپ جازادى Qamshy.kz اقپارات اگەنتتىگى Sputnik قازاقستان سايتىنىڭ دەرەگىن نەگىزگە الىپ.
قاراعاندى وبلىسى ساتپايەۆ قالاسىنىڭ تۇرعىنى سيريادا جۇرگەن كەلىنى مەن ءۇش نەمەرەسىن كۇتىپ جۇرگەنىن ايتتى. بوتاگوز ماحاتوۆا سيرياعا كەتكەن ۇلىنان ەكى جىل بۇرىن ايىرىلعان. ءبىراق بالاسىنىڭ ارتىندا كەلىنى مەن ءۇش نەمەرەسى قالىپتى، ايتۋىنشا، ولار قاقتىعىس ايماعىنان شىعا الماي جاتىر.
"مەنىڭ كەلىنىم ءالى سوندا، سول وڭىردەن شىعا الماي جاتىر. قايدا قاشارىن دا بىلمەيدى، ويتكەنى وندا بارلىق جەرگە مينا قويىلعان"، — دەدى ايەل قازاقستاننىڭ سىرتقى ىستەر مينيسترلىگىندە وتكەن بريفينگتە.
بوتاگوز سياقتى انالار قازاقستاندا از ەمەس. ايەلدەر مەسسەندجەر ارقىلى سويلەسىپ، سيرياداعى سوعىسقا اتتانعان جاقىندارىمەن بايلانىسقا شىعىپ تۇرادى. ماحاتوۆا وتىراتىن چاتتا 120 انا بار. ولاردىڭ تەك ونى عانا بالالارىمەن قاۋىشقان.
ايەلدىڭ ايتۋىنشا، ۇلى ءدىندى جەتە تۇسىنبەگەندىكتەن سيرياعا كەتكەن، ال ونىڭ جارى مەن بالالارى – وتاعاسى جاساعان قاتەلىكتىڭ قۇربانى.
2012 جىلى سوعىسقا اتتانعان ەر ادام اتا-اناسىنا مىسىرعا وقۋعا بارا جاتقانىن ايتقان. جارتى جىلدان كەيىن ونىڭ وتباسىمەن بىرگە سيريادا جۇرگەنى انىقتالدى.
وسىدان كەيىن بوتاگوز ماحاتوۆا بىرنەشە مارتە قۇقىق قورعاۋ ورگاندارىنا جۇگىنەدى. الايدا ونىڭ وتباسىنا كومەكتەسۋ ازىرگە مۇمكىن بولمادى.
ۇلىنىڭ قالاي كوز جۇمعانى دا بەلگىسىز، تەك ەر ادامدى جەرلەپ جاتقانى تۇسىرىلگەن بەينەروليك قانا بار.
"ولاردىڭ ءوز وتانىنا ورالۋىنا ەشكىم قارسىلىق بىلدىرمەيدى دەگەن ۇمىتتەمىن، ويتكەنى ولاردىڭ بارلىعى – قازاقستان ازاماتى. ولار ومىردە اداسىپ، بۇرىس جولعا تۇسكەنىن ءتۇسىندى"، — دەيدى نەمەرەلەرىن ساعىنىپ جۇرگەن ايەل.
كەشە قازاقستان پرەزيدەنتى نۇرسۇلتان نازاربايەۆ سيريادا تەرروريستەردىڭ قولىندا كەپىلدە بولعان 47 قازاقستاندىقتىڭ ەلگە قايتارىلعانى تۋرالى مالىمدەمە جاسادى.
"جۋسان" وپەراسياسى كەزىندە 6 ەر ادام، 11 ايەل جانە 30 بالا ەلگە قايتارىلدى. ولاردىڭ بارلىعى قازاقستانعا ءوز ەركىمەن كەلگەن. ونىڭ ىشىندە 6 ەر ادام مەن 1 ايەل تەرروريستىك قىزمەتكە قاتىستى دەگەن كۇدىككە ءىلىندى.
الدىن الا مالىمەت بويىنشا، ءقازىر سيريادا 800-گە تارتا قازاقستاندىق ءجۇر.
پىكىر قالدىرۋ