دەنيس تەننىڭ ولىمىنە كىنالى دەپ تانىلعان ارمان قۇدايبەرگەنوۆ مارقۇمنىڭ وتباسىنان كەشىرىم سۇرادى، دەپ جازادى Qamshy.kz اقپارات اگەنتتىگى كازتاگ سايتىنا سىلتەمە جاساپ.

«دەنيس تەننىڭ وتباسىنان جانە بۇكىل قازاقستاندىقتاردان كەشىرىم سۇرايمىن. مەن ونى ولتىرگىم كەلگەن جوق، ءجاي عانا اقشا تابۋدى كوزدەدىم. بۇرىندارى سوتتى بولعاندىقتان جۇمىس تابا المادىم. مويىندايمىن، ۇرلىق جاسادىم. مەن ونى اۋىر جاراقاتتاعان جوقپىن، مەنىڭ قولىمدا وعان قاتتى زاقىم كەلتىرەتىندەي سۋىق قارۋ بولمادى. قاساقانا ءولتىردى دەگەنگە كەلىسپەيمىن، ءبىز تەك ۇرلىق جاسايمىز دەپ كەلىسكەن بولاتىنبىز»، - دەپ ايتتى ارمان قۇدايبەرگەنوۆ جۇما كۇنى تەرگەۋ بارىسىندا.

ايتا كەتەيىك، بۇل ءىس الماتى قالاسىنىڭ مامانداندىرىلعان اۋدانارالىق قىلمىستىق سوتىندا قارالۋدا. سوت وتىرىسى سۋديا كەڭشىلىك ابدەلدينوۆتىڭ توراعالىعىمەن ءوتىپ جاتىر. بۇكىل ەلدى شۋلاتقان بۇل قىلمىستىق ىسكە ارمان قۇدايبەرگەنوۆ، نۇرالى قياسوۆ پەن جانار تولىبايەۆا كىنالى دەپ تانىلعان.

ەستەرىڭىزگە سالا كەتەيىك، وتكەن جىلدىڭ 19 شىلدەسىندە قازاقستاندىق مانەرلەپ سىرعاناۋ شەبەرى دەنيس تەن الماتى قالاسىندا پىشاق جاراقاتىنان كوز جۇمعان بولاتىن. دەنيس تەن كولىگىنىڭ ايناسىن ۇرلاماق بولعان قاراقشىلارمەن توبەلەسىپ، ەكى قىلمىسكەر وعان پىشاق جاراقاتىن سالعانى بەلگىلى بولدى.