سينوپتيكتەردىڭ ايتۋىنشا، الداعى ءۇش كۇندە اۋا تەمپەراتۋراسى جوعارىلايدى دەپ جازادى Qamshy.kz اقپارات اگەنتتىگى. "قازگيدرومەت" سينوپتيكتەرى 2019 جىلدىڭ 12-14 قاڭتارىنا اۋا رايى بولجامىن ۇسىندى.

سينوپتيكتەردىڭ بولجاۋىنشا، الداعى كۇندەرى قازاقستانعا قارا تەڭىز اۋماعىنان كەلەتىن اتموسفەرالىق فرونتتاردىڭ سالدارىنان سىبىرلىك انتيسيكلون السىرەپ، رەسپۋبليكانىڭ باسىم بولىگىندە اۋا تەمپەراتۋراسى جوعارىلايدى. 

باتىس جانە سولتۇستىك-باتىس وڭىرلەردە كۇن جىلىنىپ قانا قويماي، قار جاۋىپ، كەي جەردە بۇرقاسىن بولادى، قاتتى جەل ۇيىتقيدى. ال قازاقستاننىڭ وڭتۇستىك، وڭتۇستىك-شىعىس جانە شىعىس وبلىستارىنداعى اۋا رايىنا وڭتۇستىك سيكلون اسەر ەتىپ، كەي جەردە قار جاۋىپ، بۇرقاسىنداتادى ءارى باتىستان قاتتى جەل سوعادى. وڭتۇستىك جانە وڭتۇستىك-شىعىستا تۇمان جانە كوكتايعاق بولادى.

ءىرى قالالاردا اۋا رايى قانداي بولادى

Gismeteo مالىمەتىنە سۇيەنسەك، 12 قاڭتاردا استانادا كۇندىز اۋا تەمپەراتۋراسى مينۋس 17 گرادۋس بولسا، كەشكە مينۋس 14 گرادۋسقا دەيىن تومەندەيدى. الماتىدا كۇندىز 0 گرادۋس، ال كەشكە 2 گرادۋس نولدەن تومەن بولادى. شىمكەنتتە كۇندىز دە، كەشكە دە اۋا تەمپەراتۋراسى – 1 گرادۋس نولدەن جوعارى.

13 قاڭتاردا ەلىمىزدىڭ باس قالاسى استانادا كۇندىز 9 گرادۋس اياز، ال كەشكە —10 گرادۋس بولادى. الماتىدا – كۇندىز —3 گرادۋس، كەشكە —4 گرادۋس. شىمكەنتتە كۇندىز 8 گرادۋس جىلى بولسا، كەشكە +1 گرادۋسقا دەيىن سۋىتادى.

14 قاڭتاردا استانادا كۇندىز —6 گرادۋس، كەشكە —7 گرادۋس. الماتىدا سىناپ باعاناسى كۇندىز 2 گرادۋس نولدەن جوعارى بولسا، كەشكە —1 گرادۋسقا دەيىن سالقىندايدى. شىمكەنتتە – كۇندىز +13 گرادۋس، كەشكە +8 گرادۋس.