اقتوبەلىك جىگىت تۋعان اناسىن 9 جىل بويى ىزدەگەنىنە وكىنەتىنىن ايتتى دەپ جازادى Qamshy.kz اقپارات اگەنتتىگى diapazon.kz سايتىنىڭ دەرەگىن نەگىزگە الىپ. ول بىرنەشە جىل بويى ۇيقىسىز ءتۇنىن، كۇلكىسىز كۇنىن وتكىزدى، الايدا ىزدەپ تاپتىم دەگەن اناسى ءۇمىتىن اقتامادى. جىگىت ءتىپتى وكىنىپ قالدى. 

1993 جىلى اقتوبەلىك جىگىتتى اناسى تاستاپ كەتەدى. الايدا ب ا ق ارقىلى ول اناسىمەن قايتا قاۋىشادى. 

"مەن انام تۋرالى مالىمەتتى "ودناكلاسسنيكي" الەۋمەتتىك جەلىسى ارقىلى تاپتىم. ونىڭ ءتۇرى ماعان ۇقسايدى جانە اقتوبەدە تۇرادى ەكەن. العاشىندا ول مەنىڭ انام ەكەنىن مويىندامادى. ءبىراق كەيىننەن ول بۇل اقپاراتتى راستادى"، — دەيدى ارتۋر. 

ول ءوز اناسىمەن كەزدەسكەن كەزدە ءومىرىن كۇرت وزگەرتكەن وقيعا تۋرالى تولىعىراق ءبىلدى. 

"بيولوگيالىق انام مەنى 16 جاسىندا دۇنيەگە اكەلگەن. اتا-اناسىنا بۇل تۋرالى ايتا الماعاندىقتان، اپكەسى ءسابيدى پەرزەنتحاناعا تاستاۋدى ۇسىنعان. مەن دە جاس اكەمىن. قالاي عانا تۋعان بالاسىن پەرزەنتحاناعا وپ-وڭاي تاستاپ كەتۋگە بولادى؟ وسىنى ءالى كۇنگە دەيىن تۇسىنبەيمىن. ءبىر جاقسىسى، وسى كەزدە مەنىڭ قازىرگى اتا-انام اسىراپ الدى"، — دەيدى ارتۋر. 

ارتۋر بيولوگيالىق اناسىمەن قاتار، ونىڭ كۇيەۋىمەن، ءوزىنىڭ باۋىرلارىمەن دە تانىسقان. 

"ولار ۇلكەن وتباسى. مەنەن كەيىن بيولوگيالىق انام ءۇش بالانى دۇنيەگە اكەلگەن. ال اكەمنىڭ توبەلەستەن قايتىس بولعانىن ايتتى. ءبىراق اكەم جاتقان زيراتتى كورسەتپەدى.  بيولوگيالىق انامنىڭ مەنى تاستاپ كەتكەن سوڭ بىردەن ءۇش بالانى دۇنيەگە اكەلگەنىن ەستۋ جانە قابىلداۋ وتە قيىنعا سوقتى. مەن ونى اقتاپ الۋعا تىرىستىم، تۇسىنگىم كەلدى. ءبىراق... ول ءتىپتى قارىم-قاتىناسىمىزدى رەتكە كەلتىرۋگە كىشكەنتاي قادام دا جاسامادى عوي"، — دەپ قينالىسىن جاسىرا المادى ارتۋر. 

اناسىمەن جولىققاننان كەيىن ارتۋر كوپتەگەن ساتسىزدىككە ۇشىرايدى. جۇمىسىنان شىعىپ قالىپ، ايەلىمەن اجىراستى. 

"مەن سول كەزدەن كەيىن قاتتى كۇيزەلىسكە ءتۇستىم. ءومىرىم استان-كەستەن بولدى. 3-4 ايدىڭ ىشىندە جىندانىپ كەتۋگە ءسال-اق قالدىم. ءتىپتى كوشەگە شىققىم كەلمەي، ءتورت قابىرعادا قامالىپ وتىردىم. وز-وزىممەن سويلەستىم. نەنى دۇرىس جاسامادىم؟ قاي جەردەن قاتەلىك جىبەردىم؟ وسىعان ۇقساس سۇراقتاردى وزىمە قايتا-قايتا قويدىم. تۋعان انامنان جىلى ءسوز ەستي المادىم. ماعان ول قولداۋ بىلدىرمەدى. ءبىراق قازىرگى اتا-انام، اعا جەزدەم ۇنەمى قاسىمنان تابىلدى. ولار ماعان قولداۋ ءبىلدىرىپ، وز-وزىمە كەلۋىمە كومەكتەستى. ولار بولماعاندا، نە ىستەر ەدىم؟! بىلمەيمىن. قازىرگى وتباسىم انامدى ىزدەۋگە مۇلدەم قارسىلىق تانىتپادى، كەرىسىنشە تۋعان اناممەن جاقىن ارالاسۋدى قالادى. ارادا كوپ ۋاقىت ءوتتى. ءبىراق قۇرىپ كەتكىر، مەنىڭ ءومىرىمدى كۇرت وزگەرتكەن، مەنىڭ دەل-سال كۇيىمە سەبەپكەر بولعان تۋعان انام عوي. كىشكەنتاي ءسابي نە ءۇشىن ەرەسەكتەردىڭ قاتەلىگى ءۇشىن جازالانۋى كەرەك؟ ولار بەيكۇنا ءسابي ەمەس پە؟ مەن وسى ءومىردى، وسى جولدى ءوزىم تاڭداپ نەمەسە سۇراپ الىپپىن با؟! كەز كەلگەن ادام ءوزىنىڭ تۋعان اناسى مەن اكەسىن ىزدەيتىنى بەلگىلى. ەگەر مەنىڭ ومىرىمدە ماڭىزدى وزگەرىستەر ورىن الماعاندا انامدى مۇمكىن ىزدەمەيتىن دە ەدىم. ۇيلەندىم، اتا-انامنان بولەك شىقتىم. ازداعان تۇسىنىسپەۋشىلىكتەر ورىن الدى. كەيىن ىشكى جان دۇنيەمە بىردەڭە جەتىسپەيتىنىن سەزدىم. الايدا ءقازىر قاتتى وكىنەمىن. تۋعان اتا-انام مەنى تاربيەلەپ، وسىرگەن جاندار ەكەنىن ءتۇسىندىم. مەن ولاردىڭ ورنىنا باسقا ادامداردى قويىپ، سولاردى ىزدەگەنىم ءۇشىن ۇيالامىن. قازىرگى اتا-انامنىڭ الدىندا ۇياتتىمىن. ءقازىر كەزىندە ساتقىندىق جاساپ، تاستاپ كەتكەن ادامدى ىزدەۋدىڭ دە، كەشىرۋدىڭ دە قاجەتى جوق ەكەنىن بىلەم"، — دەيدى ارتۋر. 

سونداي-اق ارتۋر ەكى اقتوبەلىككە اتا-اناسىن تابۋعا كومەكتەسكەن. ولاردىڭ العاشقى كەزدەسۋىنە ءوزى دە بارعان. 

"ءبىر قىزدىڭ اناسىن ورىنبوردا ەكەنىن انىقتادىم. اناسى 15 جاسىندا بوسانىپ، ءسابيدى پەرزەنتحاناعا تاستاپ كەتكەن. الايدا ونىڭ وتباسى تاستاندى قىزدى قۋانا-قۋانا قارسى الدى. ءتىپتى بىرگە اقتوبەگە كوشۋدى جوسپارلاپ وتىر. ءبىز ءقازىر بىر-بىرىمىزبەن ارالاسىپ تۇرامىز. مەن وعان قىزىعا دا، قىزعانا دا قارايمىن. ال ەكىنشى اقتوبەلىكتىڭ اناسى ۇلىن كورگىسى دە كەلمەيدى. كەزدەسۋدەن باس تارتتى. ۇلىن تاستاپ كەتكەن ايەلدىڭ جاعدايى جاقسى، ءوزى اۋقاتتى تۇرادى. سول سەبەپتى تۋعان اتا-اناسى تاستاپ كەتكەن جاستارعا ولاردى ىزدەمەۋگە كەڭەس بەرەمىن. سەبەبى قاتتى وكىنىپ قالۋى مۇمكىن. مۇنداي جايتتار ءجيى بولادى"، — دەپ ءسوزىن اياقتادى ارتۋر.