رەسەي سوتى جومارت ەرتايەۆتى قازاقستانعا بەرۋ تۋرالى شەشىم شىعاردى دەپ جازادى Qamshy.kz اقپارات اگەنتتىگى ria.ru سايتىنىڭ دەرەگىن نەگىزگە الىپ. ازىرگە سوت شەشىمى زاڭدى كۇشىنە ەنبەگەن. ال بيزنەسمەننىڭ ادۆوكاتتارى سوتقا شاعىم تۇسىرمەك. 

بۇگىن ماسكەۋ قالاسىندا جومارت ەرتايەۆقا قاتىستى سوت وتىرىسى ءوتتى. 

"ماسكەۋ قالالىق سوتى رف باس پروكۋرورى ورىنباسارىنىڭ 2018 جىلدىڭ 7 جەلتوقسانىنداعى ەرتايەۆتى قازاقستان رەسپۋبليكاسىنىڭ قۇزىرەتتى ورگاندارىنا بەرۋ تۋرالى شەشىمىن نەگىزدى ءارى زاڭدى دەپ تانىدى"، دەپ حابارلادى ماسكەۋ قالالىق سوتىنىڭ باسپا ءسوز حاتشىسى ۋليانا سولوپوۆا. 

ايتا كەتسەك، جومارت ەرتايەۆ قازاقستاندا الاياقتىق جانە Bank RBK بانكىنەن 80 ميلليون دوللار جىمقىرۋعا قاتىسقانى ءۇشىن ايىپتالعان بولاتىن. 

ەرتايەۆتىڭ ادۆوكاتتارى سوتتىڭ بۇل شەشىمىمەن كەلىسپەيدى. ولاردىڭ قاتارىندا الەكسەي پەتروۆ بار. ول بۇل شەشىمگە قاتىستى جوعارى سوت ينستانسيالارىنا شاعىم ءتۇسىرۋدى جوسپارلاپ وتىر. 

ەسكە سالا كەتسەك، 2018 جىلدىڭ مامىرىندا قازاقستاننىڭ باس پروكۋراتۋراسىنىڭ سۇرانىسىمەن جومارت ەرتايەۆ "موسكۆا سيتي" ماڭىندا ۇستالعان بولاتىن. الايدا ماسكەۋ سوتى ونى بىردەن قاماۋعا الماي، ءۇي قاماققا العان. الايدا بىرنەشە ايدان كەيىن ءۇي قاماق تا ءوز كۇشىن جويدى. 

اراعا ءبىراز ۋاقىت سالعان سوڭ جومارت ەرتايەۆ رەسەيدەن بوسقىن مارتەبەسىن سۇرايدى.  سوسىن قازاقستان ازاماتتىعىنان باس تارتۋ جونىندە مالىمدەمە جاسادى. 

وسىنداي جايتتاردان كەيىن دە قازاقستان باس پروكۋراتۋراسى ەرتايەۆتى 2017 جىلى العان رەسەيدە تۇرۋعا ىقتيارحاتىنان ايىرۋعا قول جەتكىزدى. 

ال جومارت ەرتايەۆ بولساە ءوز كەزەگىندە قازاقستان بيلىك وكىلدەرىنىڭ قۋعىنداۋىنا ۇشىراعانىن، سونداي-اق مۇنىڭ باسەكەلەستەرىنىڭ مۇددەسى ءۇشىن جاسالعان ساياسي سيپاتقا يە ەكەنىن ايتىپ، ءتۇرلى مالىمدەمە جاسادى. 

ەسكە سالساق، قازاقستاندا جومارت ەرتايەۆقا 2018 جىلدىڭ ناۋرىز ايىندا الاياقتىق جاسادى دەگەن ايىپ تاعىلدى. ول كەزگە دەيىن ەلدەن كەتىپ قالعان كاسىپكەرگە حالىقارالىق ىزدەۋ جاريالانعان بولاتىن. ق ر قك 177-بابى 4-تارماعى بويىنشا، Bank RBK بانكىنەن 80 ميلليون جىمقىرۋعا قاتىسقانى ءۇشىن ول 10 جىلعا دەيىن باس بوستاندىعىنان ايىرىلۋى مۇمكىن.