بۇگىن، قاڭتاردىڭ 12ء-سى الماتىدا سوۆەت زامانىندا قازاقستاندى ۇزاق جىل باسقارعان دىنمۇحامەد قونايەۆتى ەسكە الۋ شاراسى ءوتتى دەپ جازادى Qamshy.kz اقپارات اگەنتتىگى ازاتتىقتىڭ دەرەگىن نەگىزگە الىپ. ونىڭ تۋعان كۇنىنە وراي قونايەۆ مۋزەيى ۇيىمداستىرعان شاراعا جۇزگە جۋىق ادام قاتىسىپ، سەرىكبولسىن ءابدىلدين، شاڭگەرەي جانىبەكوۆ سەكىلدى قازاقستاندى قونايەۆ باسقارعان كەزدە جوعارى قىزمەتتەردە بولعاندار كەلدى.

الماتى قالاسى مۋزەيلەر بىرلەستىگى ديرەكتورىنىڭ ورىنباسارى قايرات تاربايەۆ الماتى اكىمدىگىنىڭ وكىلى رەتىندە جيىنعا قاتىسقان.

بۇگىنگى جيىنعا كەلگەندەردىڭ ءبىر شوعىرى الدىمەن كەڭساي زيراتىنداعى قونايەۆ قابىرىنە بارعان. گۇل قويۋ راسىمىنەن كەيىن قونايەۆ تۇرعان پاتەردە ەستەلىك فيلم كورسەتىلەدى، - دەدى ەلەنا قۇباشيەۆا ازاتتىق تىلشىسىنە.

دىنمۇحامەد قونايەۆ سوۆەتتىك قازاقستان بيلىگىندە شيرەك عاسىر قىزمەت ەتتى. 1960-1986 جىلدار ارالىعىندا قازاقستان كومپارتياسىنىڭ ءبىرىنشى حاتشىسى بولدى. 1986 جىلى جەلتوقسان وقيعاسىنان كەيىن قىسىمعا الىنىپ، كوپشىلىكپەن ارالاسۋىنا ءبىرشاما شەكتەۋ قويىلدى.

1987 جىلى ماۋسىم ايىندا «قازاقستان كومپارتياسى ورتالىق كوميتەتىنىڭ ءبىرىنشى حاتشىسى بولعاندا رەسپۋبليكا پارتيا ۇيىمىن باسقارۋداعى جىبەرگەن قاتەلىكتەرى ءۇشىن» دەگەن ايىپپەن قازاقستان كومپارتياسىنىڭ ورتالىق كوميتەتىنە مۇشەلىكتەن شىعارىلدى.

دىنمۇحامەد قونايەۆ ءومىرىنىڭ سوڭىنا قاراي حالىقپەن ەركىن ارالاستى، «ءوتتى داۋرەن وسىلاي»، «اقيقاتتان اتتاۋعا بولمايدى» دەپ اتالاتىن ەستەلىك جيناقتار قالدىردى.