قازاقستاندا بۇرىن-سوڭدى بولماعان وتا جاسالدى. 9 كۇن بۇرىن تۋعان نارەستەنىڭ جۇرەگىندە اقاۋ بار ەكەنى انىقتالدى. تۋا ءبىتتى پايدا بولاتىن گيپوپلازيا اۋرۋىنا شالدىققان سابيگە دەرەۋ وتا جاساۋ قاجەت بولدى دەپ جازادى Qamshy.kz اقپارات اگەنتتىگى  tengrinews.kz سايتىنىڭ دەرەگىن نەگىزگە الىپ. 

قايرات قۋاتبەكوۆ وپەراسياعا دەيىن ءوز پىكىرىن بىلدىرگەن بولاتىن. 26 جىلدىق تاجىريبەسى بار حيرۋرگتىڭ ءوزى اعزانى اۋىستىرۋمەن تەڭ بولعان وتانىڭ قاۋىپتىلىگى تىم جوعارى ەكەنىن ايتتى. 

"9 كۇن بۇرىن دۇنيەگە كەلگەن نارەستەگە وتا جاسالادى. ونىڭ سالماعى 3 كەلى. وتە ءقاۋىپتى دەرت بولعاندىقتان بالاعا دەرەۋ حيرۋرگيالىق كومەك كورسەتۋ كەرەك بولدى. وتا وتە كۇردەلى، ءتىپتى اعزانى الماستىرۋدان دا قيىن بولۋى مۇمكىن"، – دەيدى بالالار كارديوحيرۋرگى قايرات قۋاتبەكوۆ.

"مۇنداي وتادان كەيىن ناۋقاستىڭ ساۋىعۋىنا وتە كوپ ۋاقىت كەتەدى. ەكى ءتىپتى ودان دا كوپ ۋاقىت جان ساقتاۋ بولىمىنەن جاتىپ، دارىگەردىڭ قاتاڭ باقىلاۋىندا بولادى. ەلىمىزدە بۇعان ۇقساس وتا جاسالماعان. وتانىڭ قيىندىعى ءسابي اعزاسىنىڭ جاس ءارى دەنەسىنىڭ تىم كىشكەنتاي بولۋىندا. وزدەرىڭىز ويلاپ قاراڭىزدار، ءسابيدىڭ بويى نەبارى – 45 سانتيمەتر. دەمەك، قان تامىرلارى مەن جۇرەگىنىڭ كولەمى وتە كىشكەنتاي. ارنايى ۇلكەيتكىش قۇرالدار كومەگىمەن جاسالاتىن وتادا وتە جىڭىشكە ءجىپ قولدانىلادى. ءار ميلليمەتردىڭ ءوزى ءبىز ءۇشىن اسا ماڭىزدى. كىشكەنتاي عانا قاتەلىك ءسابيدىڭ ومىرىنە ءقاۋىپ توندىرەدى"، – دەيدى كارديوحيرۋرگ تىلشىلەرگە بەرگەن سۇحباتىندا.

وتا ءساتتى اياقتالدى. ءقازىر ءسابي دارىگەرلەردىڭ قاتاڭ باقىلاۋىندا.