جامبىل وبلىسىنىڭ تۋماسى نۇرالى قياسوۆ دەنيس تەندى ءولتىرۋدى جوسپارلاماعانىن ايتتى دەپ جازادى Qamshy.kz اقپارات اگەنتتىگى sputniknews.kz سايتىنىڭ دەرەگىن نەگىزگە الىپ. 

دەنيس تەننىڭ ولىمىنە كۇدىكتى نۇرالى قياسوۆ جاساعانى ءۇشىن ءوز كىناسىن مويىندادى. 

نۇرالى قياسوۆ سپورتشىنى پىشاقپەن جاراقاتتاپ ولتىرگەنى ءۇشىن ايىپتالىپ وتىر.

"مەن ءوز كىنامدى تولىقتاي مويىندايمىن. ءبىراق ءولتىرۋدى الدىن الا جوسپارلاعان جوقپىز"، — دەدى نۇرالى قياسوۆ.

قياسوۆتان وزگە ايىپتالۋشىلار ورىندىعىندا ارمان قۇدايبەرگەنوۆ پەن جانار تولىبايەۆا وتىر. ەر ادام كىسى ولتىرگەنى، ايەل ادام قىلمىس تۋرالى حابار بەرمەگەنى ءۇشىن ايىپتالدى. جۇما كۇنگى سوت وتىرىسىندا قۇدايبەرگەنوۆ تەندى ءولتىرۋدى جوسپارلاماعانىن جانە ونى پىشاقپەن جاراقاتتاماعانىن ايتقان-دى. ال تولىبايەۆا جىگىتتەردىڭ قالاداعى تۇراقتارداعى كولىكتەردەن اينا ۇرلاپ جۇرگەنىن بىلمەگەنىن جەتكىزدى.

پروسەسس الماتىداعى قىلمىستىق ءىس بويىنشا مامانداندىرىلعان سوتتا قازاق تىلىندە ءوتىپ جاتىر.

دەنيس تەننىڭ قازاسى

قازاقستاندىق مانەرلەپ سىرعاناۋشى دەنيس تەن 2018 جىلدىڭ 19 شىلدەسىندە 25 جاسىندا كوز جۇمدى. كولىگىنىڭ ايناسىن ۇرلاعانداردى توقتاتپاق بولعان سپورتشىنى ۇرىلار سان تۇسىنان پىشاقپەن جاراقاتتادى.

ارمان قۇدايبەرگەنوۆ، نۇرالى قياسوۆ جانە جانار تولىبايەۆا كىسى ءولتىردى دەگەن كۇدىككە ءىلىندى. ەر ادامدار توناپ، كىسى ولتىرگەنى، ال ايەل قىلمىس تۋرالى حابارلاماعانى ءۇشىن ايىپتالىپ وتىر.

سوتتا مارقۇم مانەرلەپ سىرعاناۋشىنىڭ اناسى وكسانا تەن ۇلىنىڭ تاپسىرىسپەن ولتىرىلگەنىنە سەنىمدى ەكەنىن ايتتى. سونداي-اق، سوتتا وقيعا بولعان جەرگە ءبىرىنشى بولىپ جەتكەن ەكى پوليسەي كۋاگەر بولدى.