دەنيس تەننىڭ ءولىمى كۇدىكتى جانار تولىبايەۆانىڭ قوڭىراۋلارىمەن بايلانىستى بولۋى ابدەن مۇمكىن. ول قانداي قوڭىراۋلار؟ مارقۇم سپورتشىنىڭ اناسى وسىعان بايلانىستى سوتتا تىڭ دەرەكتەر كەلتىردى، دەپ جازادى Qamshy.kz اقپارات اگەنتتىگى قازتاگ پورتالىنىڭ دەرەگىنە سۇيەنىپ.

«تەلەفون قوڭىراۋلارىنا بايلانىستى ءوتىنىش جاساعىم كەلەدى. دەنيستىڭ ولىمىنە سول ءنومىردىڭ قاتىسى ابدەن بولۋى مۇمكىن. بۇل ماسەلە كەلەسى تىڭدالىمعا دەيىن انىقتالادى دەپ ۇمىتتەنەمىن» - دەدى وكسانا تەن دۇيسەنبىدە وتكەن سوت وتىرىسىندا.

دەنيس تەننىڭ اناسىنىڭ ايتقانىنا سەنسەك، سوتتالۋشى جانار تولىبايەۆا 2018 جىلدىڭ ساۋىرىنەن باستاپ شەتەلدىك ءبىر نومىرمەن ءجيى حابار الماسىپ تۇرعان.

«25 ساۋىردە ساعات 21:54-تە ەۋروپاعا قوڭىراۋ شالىپسىڭ. كىممەن سويلەستىڭ؟»، - دەپ سۇرادى تولىبايەۆادان وكسانا تەن.

الايدا سوتتالۋشى ەۋروپاعا حابارلاسپاعانىن، ول قوڭىراۋ نە وزبەكستان، نە قىرعىزستانعا شالىنعان بولۋى مۇمكىن ەكەنىن ايتتى.

ءبىراق وكسانا تەن ءوز دەگەنىنەن قايتپادى.

«قايدا حابارلاسقانىن انىقتاۋلارىڭىزدى سۇرايمىن. 4-تەن باستالاتىن ءنومىر ەۋروپاعا ءتان. شىعىس، كىرىس نومىرلەرى بولعان. سەن ءبىر نومىرگە حابارلاستىڭ، ول ءنومىر ارتىنشا ساعان قايتا حابارلاسقان. باسقا كۇنى سەن تاعى حابارلاستىڭ، كوپ ۇزاماي ساعان باسقا نومىرگە حابارلاستى»، - دەدى تەن.

«وپەراتورلار شىعار. مەن ەۋروپاعا حابارلاسقان جوقپىن»، - دەدى جانار تولىبايەۆا.

«مەن كۇندەر بويىنشا انىعىراق ايتايىن: 24 ساۋىردە تولىبايەۆاعا بىرەۋ حابارلاسادى، 25ء-ى سول نومىرگە تولىبايەۆانىڭ ءوزى حابارلاسادى. بۇل قوڭىراۋ 6 مامىر، 3 شىلدە، 5 شىلدە، 7 شىلدە جانە 20 شىلدە قايتالانعان. شىعىس قوڭىراۋدان كەيىن بىردەن كىرىس قوڭىراۋ... وسىعان بايلانىستى ونىڭ كىممەن بايلانىسقا شىققانىن انىقتاۋلارىڭىزدى سۇرايمىن. سوڭعى قوڭىراۋ ول لاقتىرا سالعان سيم-كارتادان شالىنعان. تولىبايەۆا حابارلاستى، الايدا وعان قايتا قوڭىراۋ شالىنبادى»، - دەدى وكسانا تەن سەنىمدى تۇردە.

♦دەنيس تەننىڭ ءولىمى: كۋاگەر ەكى پوليسەي وقيعانىڭ قالاي بولعانىن باياندادى

♦دەنيس تەندى كىم ولتىرگەنى بەلگىلى بولدى

ايتا كەتەيىك، ەلدىڭ ماقتانىشى، قازاقستاندىق فيگۋريست دەنيس تەن 2018 جىلدىڭ 19 شىلدەسىندە قايتىس بولدى. دەنيس ءوزىنىڭ كولىگىندەگى اينانى ۇرلاماق بولعان ەكى ۇرىنى بايقاپ قالادى. ۇستاماق بولعاندا، قىلمىسكەرلەردىڭ  ءبىرى ونىڭ سانىنا پىشاق سالىپ جىبەرەدى. كوپ قان جوعالتقان دەنيس تەن اۋرۋحانادا قايتىس بولدى. دەنيستىڭ جاسى نەبارى 25-تە ەدى.

♦"دەنيس تەندى تاپسىرىسپەن ولتىرگەن بولۋى مۇمكىن"

فيگۋريستىڭ ءىسى بويىنشا بۇگىندە ءۇش كۇدىكتى انىقتالىپ وتىر: ولار - ارمان قۇدايبەرگەن، نۇرالى قياسوۆ جانە جانار تولىبايەۆا.

♦"دەنيس تەن پىشاقتان قورىققان جوق": قىلمىسكەر سپورتشىنى قالاي ولتىرگەنىن ايتىپ بەردى