پرەمەر-مينيستر سيفرلاندىرۋ بويىنشا جۇرگىزىلگەن جۇمىستاردىڭ كەمشىلىگىن اتادى. قازاقستان رەسپۋبليكاسىنىڭ پرەمەر-مينيسترى باقىتجان ساعىنتايەۆ سيفرلاندىرۋ بويىنشا حالىققا ءتۇسىندىرۋ جۇمىستارىن دۇرىس جۇرگىزبەي وتىرعان مينيسترلەرگە شۇيلىكتى، دەپ حابارلايدى Qamshy.kz اقپارات اگەنتتىگى Sputnik قازاقستان سايتىنا سىلتەمە جاساپ. 

باقىتجان ساعىنتايەۆ كەزەكتى ۇكىمەت وتىرىسى بارىسىندا مينيسترلەردىڭ جۇمىسىنا كوڭىلى تولماي وتىرعانىن ايتتى.

"مىسالى، كولىكتى ونلاين تىركەۋ نەمەسە كولىك جۇرگىزۋ كۋالىگىن الۋ قىزمەتى بار دەيدى. باسقا كورسەتىلەتىن قىزمەتتەردىڭ سانى بىلاي ايتقاندا كوپ ەمەس. نەگە؟ بۇل ءتيىمدى نارسە. حالىق سوندا قانشالىقتى ءتيىمدى ەكەنىن بىلمەي وتىر ما؟! قالمۇحانبەت نۇرمۇحانبەت ۇلى (قاسىموۆ — ىشكى ىستەر ءمينيسترى)، بيىل ءىىم ارقىلى قانشا كولىك تىركەۋدەن ءوتتى؟"، — دەپ سۇرادى پرەمەر-مينيستر.

ىشكى ىستەر ءمينيسترى ءوز كەزەگىندە بيىل 2،5 ميلليون كولىكتىڭ تىركەۋدەن وتكەنىن ايتتى. سونداي-اق، جوسپارعا سايكەس، تاعى جەتى مەملەكەتتىك قىزمەت ءتۇرىنىڭ جىل سوڭىنا دەيىن ونلاين نۇسقاسى پايدا بولاتىنىن جەتكىزدى.

"جوق، ونلاين تىركەلگەن كولىك ءتۇرىن ايتامىن. سلايدتا 4 639 عانا قىزمەت كورسەتىلدى دەپ جازىلعان. ءتىپتى، 2،5 ميلليون وتكەن بولسا دا، تۇك تە ەمەس. ورىسشا ايتقاندا، "نە دوراباتىۆاەم"، — دەدى باقىتجان ساعىنتايەۆ.

ءارى قاراي پرەمەر-مينيستر "بۇل قىزمەتتى ەنگىزگەنىمىزگە ەكى اي عانا بولدى" دەپ اقتالعان داۋرەن ابايەۆتىڭ ءسوزىن ءبولدى. قۇجات بويىنشا اتالعان قىزمەت ءتۇرى 2018 جىلدىڭ ماۋسىم ايىنان باستاپ ەنگىزىلگەنىن ايتتى. سونداي-اق، حالىققا ءتۇسىندىرۋ جۇمىستارىن جۇرگىزۋ جانە قولجەتىمدىلىك ماسەلەسىنە نازار اۋدارۋدى سۇرادى.

"ونلاين قىزمەت ءتۇرى ەنگىزىلگەنىمەن، حالىق ءبارىبىر دە حقكو-عا بارىپ كەزەككە تۇرىپ جاتىر. ونى بارماي-اق ۇيىندە ۇيالى قوسىمشا ارقىلى الا بەرۋىنە بولاتىن ەدى. ونىڭ ۇستىنە قاجەتتىسىن پوشتا ارقىلى دا اكەلىپ بەرەدى. (…) اداممەن جۇزبە-جۇز كورىسكەن كەزدە بارلىعىنىڭ تۇسىنىكتى بولاتىنى ءسوزسىز. ءبىراق، حالىق ينتەرنەتكە كىرىپ ەشنارسە تۇسىنبەي وتىر. كولىك نەمەسە اۆتوبۋسقا ءمىنىپ، قىزمەت كورسەتۋ ورتالىعىنا بارادى. اقپاراتتى ءتۇسىندىرۋ جۇمىستارى ناشار"، — دەپ سىنادى ساعىنتايەۆ.

بۇدان وزگە پرەمەر-مينيستر 2019 جىلى جاڭا فورماتقا اۋىستىرىلۋى ءتيىس مەملەكەتتىك قىزمەتتەردىڭ تىزبەسىن جاساۋدى تاپسىردى. ورتالىق جانە مەملەكەتتىك ورگانداردىڭ بارلىعى وسى تىزبە جاسالعاننان كەيىن ۋاقىتىلى شارالار قابىلداۋى ءتيىس. جول كارتالارىن ازىرلەۋ جانە ۆەدومستۆوارالىق ءتيىمدى ءوزارا جۇيەلەردى بىرىكتىرۋدى قامتاماسىز ەتۋ مىندەتى پرەمەر-مينيستردىڭ ورىنباسارى اسقار جۇماعالييەۆكە جۇكتەلدى.