بۇگىن ساياساتكەر زامانبەك ءنۇرقادىلوۆتىڭ تۋعان كۇنى. ەگەر كوزى ءتىرى بولعاندا بۇگىن 75 جاسقا تولار ەدى. مارقۇم وسىدان 10 جىل بۇرىن «Status guo» باعدارلاماسىنا سۇحبات بەرگەن. اتالمىش سۇحباتىن Qamshy.kz اقپارات اگەنتتىگى وقىرمان نازارىنا ۇسىنادى. 

ءنۇرقادىلوۆ بىلاي دەپتى:

— ءبىز باۋىرىم ەكەۋمىز اكەسىز وستىك. جالعىز انام جۇمىس ىستەدى. توقشىلىقتا ءومىر سۇرمەدىك. انام تازالىقشى بولىپ جۇمىس ىستەدى. ءجيى اۋىراتىن. ءبىز وت جاعۋ ءۇشىن تاڭەرتەڭ 4-5-تە تۇراتىنبىز. كەيىن مەكتەپكە دە ۇلگەرۋىمىز كەرەك قوي. مەنىڭ ومىرىمدەگى ماڭىزدى ساتتەردىڭ ءبىرى مەكتەپتى بىتىرگەن سوڭ باستالدى. مەن مەكتەپتى مەدالمەن ءبىتىردىم. بۇل مەكتەپ ءۇشىن تاريحي ءسات بولعانىمەن، مەن ءۇشىن بۇل اسا ماڭىزدى بولمادى. مەن ءۇشىن ينستيتۋتقا ءتۇسۋىم — ەرەكشە ەستەلىكتەردىڭ ءبىرى. "گەنەرال بولۋدى ارماندامايتىن سولدات جوق" دەمەكشى مەن گەنەرال بولۋدى ارماندادىم. الايدا كارەرامەن اسا اۋىرعانىم جوق. ادامدى سىناعىڭ كەلسە، بيلىك بەر دەۋشى ەدى. سىناقتان وتپەگەن، بولمىسىن بيلىك بۇزعان ادامدار كوپ. بيلىكتى كوتەرە الماعان ولار ادام تانىماستاي وزگەرگەن.

بيلىك مەنى بۇزعان ەمەس، ەشقاشان. بۇزا دا المايدى. ءيا، تالاي وقيعانىڭ كۋاگەرى بولدىم. مەملەكەتتىك ماڭىزى بار تالاي شەشىمدەرگە ىقپال ەتكەنىم دە راس. بۇرا تارتقان، قاتەلەسكەن كەزدەرىم بولعان. ەشقاشان بيلىكتىڭ جالىنا جارماسقان ەمەسپىن ءبىراق.

مەنى بيلىكشىل، كرەسلوشىل، تىم سۇستى، تىم تاكاپپار دەپ سانايتىندار بار. تانىماعاسىن سولاي ويلايدى. سولاي پايىمدايدى.

بۇل ومىردەگى ءبىر اقيقات — قولىڭا بيلىك بەرىلسە، دۇرىس پايدالانۋعا تىرىس، يگى ماقساتقا جۇمساۋعا ۇمتىل. ماڭگىلىك ەشتەڭە جوق ويتكەنى. بيلىك تە ماڭگىلىك ەمەس.

قۇيرىعى كرەسلوعا جابىسىپ تۋعان پەندە جوق بۇل جالعاندا. كرەسلونىڭ سۋسىمالى ەكەنىن ۇمىتپاعان ءجون. قولىنا بيلىك تيسە، جالعاندى جالپاعىنان باسقىسى كەلەتىندەر كوپ سوعان قاراماي. قۇددى قۇدىرەت قونعانداي سەزىنەدى ءوزىن.

الجاسقاننىڭ، اداسقاننىڭ بەلگىسى بۇل. ادامدىقتان اينىعاننىڭ كورىنىسى. ادام دەگەن اتىن جوعالتقان، ادام قالپىنان اجىراپ قالعاندار قانشاما ارامىزدا…

تۇپتەپ كەلگەندە سەنىڭ دە شەگىڭ بار، ءتاڭىر بەلگىلەپ بەرگەن. بۇدان اسىپ قايدا باراسىڭ؟

قولىڭا بەرىلگەن بيلىكتى اسىرا پايدالانساڭ، وسى شەكتەن شىققانىڭ. ءتاڭىر بەلگىلەپ بەرگەن سىزىقتان اسقانىڭ. تالقانىڭ تاۋسىلعان كۇنى الدىڭنان شىعادى…

بيلىككە كەلگەن ادام بۇل اراعا نەگە وتىرعانىن، نە ماقساتپەن كەلگەنىن، قانداي ءىس اتقارارىن كۇنى بۇرىن بىلسە، مۇنداي ادامنان قايىر بولادى.

بيلىككە كەلگەن ادام قىزمەتىن قۋ قۇلقىننىڭ قامى، جەۋ، جالماۋ ماقساتىندا پايدالانسا، ءتۇپتىڭ-تۇبى وڭبايدى. سورىن تارتادى.

مۇندايلار ايگىلى اياز ءبيدىڭ وسيەتىن ۇمىتقان. «اياز بي ءالىڭدى ءبىل، قۇمىرسقا جولىڭدى ءبىل».

ومىرىمە ريزامىن. ەشكىمگە وكپەم جوق. قاتەلەسسەم، الدىمەن وزىمە ۇڭىلەمىن. «دۇرىس ىستەدىم بە، دۇرىس شەشىم قابىلدادىم با؟» دەپ…

الماتىنىڭ اكىمى بولدىم. جەككورىنىشتى جۇمىس ەدى. قىزمەتتەن كەتكەسىن پاتەرسىز قالدىم.

قالانىڭ سىرتىندا داچىمىزدە تۇردىق. ماقپالدىڭ ۇيىنە كوشىپ بارماسىم بەلگىلى ەدى. جاڭا ءۇي سالدىم. بولدى. مەنىڭ شەگىم وسى. بۇدان ارتىقتىڭ كەرەگى جوق. ءۇيىم بار، ءومىرىم بار. وتباسىم بار.

ءوزىمنىڭ قاراپايىم عانا ادام ەكەنىمدى ءتۇسىندىم. قاناعات. كەرەگى وسى ەكەن.

دايىنداعان: دۋمان بىقاي