تانىمال امەريكالىق پەداگوگ، جازۋشى، وراتور-موتيۆاتور – دەيل كارنەگيدىڭ ادام پسيحولوگياسىن تانىپ-بىلۋگە ارنالعان كىتاپتارىنىڭ مازمۇنى ءوز وزەكتىلىگىن جويماي كەلەدى. پسيحولوگيالىق كۋرستاردىڭ نەگىزىن قالاعان، پىكىر قايشىلىعىن دۇرىس پايدالانۋدىڭ قاعيداسى مەن قىزمەتتى ءسۇيۋدىڭ سىرلارى جايلى "تانىمال ادامدار جايلى جاسىرىن دەرەكتەر"، "دوس تابۋدىڭ جولدارى مەن ادامدارعا اسەر ەتۋ ونەرى"، "وتباسىلىق باقىتتىڭ قۇپياسى" اتتى ەڭبەكتەرى بۇگىندە ميلليونداعان تيراجبەن الەمنىڭ ءارتۇرلى تىلدەرىنە اۋدارىلدى. الايدا باقىتتى بولۋ مەن ءتىل تابىسۋدىڭ تەورياسىن جاساعان پسيحولوگتىڭ ءولىمى تۋرالى جالعان پىكىرلەر وتە كوپ كەزدەسەدى. Qamshy.kz اقپارات اگەنتتىگى وقىرمان نازارىنا دەيل كارنەگيدىڭ ءومىرى جايلى دەرەكتەردى ۇسىنادى.
دەيل كارنەگي ەت، سابىن، ماي ساتىپ ۇستاز بولعىسى كەلدى
دەيل كارنەگي 1888 جىلى 24 قاراشادا ميسسۋري شتاتىندا كەدەي شارۋانىڭ وتباسىندا دۇنيەگە كەلگەن. ول – دجەيمس ۆيليام كارناگي مەن اماندا ەليزابەت حاربيسوننىڭ وتباسىنداعى ەكىنشى ۇل. كارناگي وتباسى 1904 جىلى ميسسۋريدەن ۋوررەنسبەرگكە كوشىپ بارادى. 16 جاستاعى دەيل كۇندەلىكتى تاڭعى ساعات 04:00-دە سيىر ساۋىپ، ودان كەيىنگى ۋاقىتىندا ۋوررەنسبەرگ پەداگوگيكالىق كوللەدجىنەن تەگىن ءبىلىم الىپ جۇرگەن. 1908 جىلى لاتىن تىلىنەن سىناق تاپسىرماعانى ءۇشىن كوللەدجدەن كەتەدى. دەيل كارنەگي سول كەزدە "پەداگوگ بولمايمىن" دەپ شەشىم قابىلدايدى. ءبىراق كوللەدجدەن كەيىن شاعىن قالاشىقتاعى فەرمەرلەرگە ارناپ كۋرس وتكىزەدى. كەيىننەن سول ۋاقىتتاعى تانىمال "Armour & Company" كومپانياسى ءۇشىن ەت، سابىن، ماي سياقتى ونىمدەردى ساتۋمەن اينالىسىپ، 500 دوللار قارجى جيناپ، ءوزىنىڭ "ۇستاز بولامىن" دەگەن ارمانىن ورىنداعىسى كەلەدى.
دەيل كارناگي اتاقتى بولۋ ءۇشىن تەگىن وزگەرتكەن
1922 جىلى دەيل ءوزىنىڭ نەگىزگى تەگى كارناگيدى كارنەگيگە اۋىستىرادى. بۇل قادامعا ول ءوزىن جارنامالاۋ ءۇشىن بارعان. سەبەبى، سول ۋاقىتتا بۇكىل جۇرتشىلىققا ەندريۋ كارنەگي دەگەن اتاقتى ميلليونەردىڭ ەسىمى تانىمال بولاتىن. دەيل كارنەگي ءوز كىتاپتارىندا دا وسى ميلليونەردىڭ ءومىرى مەن ەسىمىن مىسال رەتىندە ءجيى جازادى.
دەيل كارنەگي كينوعا تۇسكەن
1947 جىلى رەجيسسەر ەدۆارد كلايننىڭ كومەديالىق «Jiggs and Maggie in Society» اتتى فيلمىندە دەيل كارنەگي ءوزىن- ءوزى سومدايدى.
كارنەگيدىڭ تانىمال بولۋىنا زايىبى تىكەلەي اسەر ەتكەن
دەيل كارنەگي ەكى رەت ۇيلەنگەن. ونىڭ ەكىنشى جارى – تابىستى كاسىپكەر بولعان. سونىڭ ارقاسىندا كارنەگي كوپشىلىككە تانىلادى. ايەلى كارنەگيگە مورالدىق تۇرعىدان دا، ماتەريالدىق جاعىنان دا ۇلكەن دەمەۋ كورسەتكەن.
كارنەگيدىڭ قايتىس بولۋى تۋرالى قاي اقپارات شىندىققا جاناسادى؟
عالامتوردا كارنەگيدىڭ ءولىمى تۋرالى ءارتۇرلى جالعان اقپاراتتار ءجۇر. كەيبىر دەرەكتەرگە سۇيەنسەك، ول وز-وزىنە قول جۇمساعان. الايدا، مۇنداي اقپاراتتىڭ تاراۋىنا يرۆينگ ترەسسلەردىڭ پاروديالىق شىعارماسى سەبەپ بولعان. يرۆينگ ترەسسلەر كارنەگيدىڭ كىتابى تۋرالى جازعان، شىن مانىندە، وز-وزىنە قول جۇمساعان كارنەگي ەمەس ترەسسلەر بولاتىن.
ال دەيل كارنەگي ءومىرىنىڭ سوڭعى ۋاقىتىندا "حودجكين" اۋرۋىنا شالدىققان. بۇل اۋرۋدىڭ بەلگىلەرى بويىنشا ناۋقاستىڭ ىشكى جانە سىرتقا قۇرىلىسىندا وزگەرىس پايدا بولىپ، ۆيرۋستىق بورتپەلەر مەن جوتەلگە ۇلاسادى. سوندىقتان، مۇنداي اۋرۋعا شالدىققان ناۋقاستاردى باسقا ادامداردان وقشاۋ ۇستاعان. كوپشىلىككە تانىلعان تۇلعا ءۇشىن وزگەلەردەن تىعىلىپ ءومىر ءسۇرۋ وتە قيىن بولدى. سىرقاتىنىڭ سالدارىنان كوپ قينالعان كارنەگي ءوزىن-وزى اتىپ جىبەرەدى. سول ۋاقىتتا بولەك تۇرعان ايەلى ونىڭ ءولىمىن كوپشىلىككە جاريا قىلماس ءۇشىن، جەرلەۋ ءراسىمىن دە تەك جاقىندارىنىڭ اراسىندا وتكىزەدى.. پوليسيانىڭ ەسەبىندە دە ناقتى دەرەكتەر كورسەتىلمەگەن، ءولىمنىڭ قۇپياسى تولىق جازىلماعان. كارنەگيدىڭ ايەلى نە ءۇشىن مۇنداي قادامعا باردى؟ كۇيەۋىنىڭ اتاعىنا نۇقسان كەلگەنىن قالاماعاندىقتان با نەمەسە وتباسىلىق بيزنەستىڭ بۇزىلۋىنان قورىقتى ما، بەلگىسىز...
پىكىر قالدىرۋ