پەتروپاۆلدا جۋرناليستيكاعا جارتى عاسىر ءومىرىن ارناعان، "كازاحستانسكايا پراۆدا" گازەتىنىڭ سولتۇستىك قازاقستان وبلىسى بويىنشا جەكە ءتىلشىسى ۆالەريي الەكساندروۆيچ مەرسالوۆ ۇزاققا سوزىلعان سىرقاتى سالدارىنان ومىردەن وزدى، دەپ حابارلادى Qamshy.kz اقپارات اگەنتتىگى Sputnik قازاقستان سايتىنىڭ دەرەگىن نەگىزگە الىپ.

ۆالەريي الەكساندروۆيچ 1950 جىلى چەليابى وبلىسى ۆەرنەنسكيي اۋدانىندا دۇنيەگە كەلدى. پەتروپاۆل پەداگوگيكالىق ينستيتۋتىن ءتامامداعان سوڭ 1973-1994 جىلدارى "ماياك"، "لەنينسكوە زناميا" گازەتتەرىندە ءتىلشى بولىپ ىستەدى. 1994 جىلدان بەرى "كازاحستانسكايا پراۆدا" رەسپۋبليكالىق گازەتىنىڭ جەكە ءتىلشىسى قىزمەتىن اتقارعان.

ۆالەريي مەرسالوۆ ءبىر ايدان كەيىن 69 جاسقا تولۋى ءتيىس بولاتىن. زەينەت جاسى مەن اۋىر ناۋقاسىنا قاراماستان 25 جىل "كازپراۆدا" ءۇشىن ادال ەڭبەك ەتىپ، جارتى عاسىر ءومىرىن جۋرناليستيكاعا ارناعان.

ارىپتەستەرى ونى جۋرناليستيكانىڭ اتى اڭىزعا اينالعان تىلشىلەرىنىڭ ءبىرى دەپ بىلەدى. شىندىعىندا، ۆالەريي الەكساندروۆيچ دانا دا دارا تۇلعا ءارى ءسوز شەبەرى ەدى، ءوزىنىڭ سالماقتى ساليقالى پىكىرى مەن قايتالانباس "مەرسالوۆتىك" ءستيلى بار بولاتىن. ماقالالارىندا باس كەيىپكەردىڭ تاعدىرىن اسەرلى سيپاتتايتىنى سونشا – وقىرمان دا سول جانمەن بىرگە قۋانىپ، بىرگە قايعىراتىن. كومەككە مۇقتاج جاندارعا ءاردايىم كومەكتەسەتىن ۆالەريي الەكساندروۆيچ قالالىق ءماسليحاتتىڭ دەپۋتاتى بولعان، ويتكەنى ونىڭ پىكىرىمەن قاشان دا ساناساتىن.

ۆالەريي مەرسالوۆتىڭ جارقىن بەينەسى قازاقستاندىق جۋرناليستەردىڭ ماڭگى جادىندا قالادى.