تۇركىستان وبلىستىق كامەلەتكە تولماعاندار ءىسى جونىندەگى مامانداندىرىلعان اۋدانارالىق سوتى "قورقىتىپ الۋ" جانە "ءوزىن-وزى ولتىرۋگە دەيىن جەتكىزۋ" بابىمەن ايىپتالعان مەكتەپ وقۋشىسى نۇربەك تۇرسىنحاندى كىنالى دەپ تانىپ، ءۇش جىلعا باس بوستاندىعىنان ايىرۋ جازاسىن كەستى دەپ حابارلايدى Qamshy.kz اقپارات اگەنتتىگى ازاتتىقتىڭ دەرەگىن نەگىزگە الىپ.

شىمكەنت قالاسى قاراتاۋ اۋدانى قايناربۇلاق شاعىن اۋدانىنداعى 83-مەكتەپتىڭ وقۋشىسى نۇربەك تۇرسىنحان 2018 جىلدىڭ 10 اقپانىندا ءوز ۇيىندە وزىنە قول سالىپ، قايتىس بولعان مەكتەپ وقۋشىسى ەرسۇلتان احمەتوۆتى ءوزىن-وزى ولتىرۋگە جەتكىزدى جانە وسى مەكتەپتىڭ جيىرما شاقتى وقۋشىسىنان اقشا بوپسالاپ، قىسىم كورسەتكەن دەپ ايىپتالعان.

مارقۇم ەرسۇلتان اxمەتوۆتىڭ اپكەسى ۇلجان اقىلبەكوۆا ۇكىممەن كەلىسپەيتىنىن، سوتتان ءىستى قايتا تەرگەۋگە جىبەرۋدى سۇراپ، اپەللياسيالىق شاعىم تۇسىرەتىنىن ايتادى.

باسپا ءسوز قىزمەتىنىڭ مالىمەتىنشە، ءىس اشىق قارالعان.

نۇربەك تۇرسىنحاننىڭ ءىسى سوتقا جەتكەننەن كەيىن ون وقۋشى ايىپتالۋشىنىڭ ۇستىنەن ارىز جازباعاندارىن مالىمدەگەن. ىسكە ءتوراعالىق ەتكەن سۋديا قايرات قوڭىربايەۆ ءىستى تەرگەگەن تەرگەۋشىلەردىڭ ءبىرى مۇسا الكەيەۆتەن "جابىرلەنۋشى دەپ تانىلعان كامەلەت جاسىنا تولماعان بالالاردىڭ جاۋابى مەن ولاردىڭ اتا-انالارىنىڭ ارىزىنان بولەك تاعىلعان ايىپتى دالەلدەيتىن نە بار؟" دەپ سۇراعان. تەرگەۋشى ناقتى جاۋاپ بەرە الماعان.

قايتىس بولعان وقۋشى ەرسۇلتان احمەتوۆتىڭ اتا-اناسى ارىزدى نۇربەك تۇرسىنحاننىڭ ۇستىنەن ەمەس، وزگە ءتورت وقۋشىنىڭ ۇستىنەن تۇسىرگەنىن، ولار تەرگەۋ كەزىندە جابىرلەنۋشى دەپ تانىلعانىن ايتقان.

قاراتاۋ اۋداندىق سوتى قايناربۇلاق شاعىن اۋدانىنداعى 83-مەكتەپتىڭ 11-سىنىپ وقۋشىسى نۇربەك تۇرسىنحاندى (2018 جىلى مەكتەپ ءبىتىرۋى ءتيىس بولعان) قىلمىستىق كودەكستىڭ 194-بابى ("قورقىتىپ الۋشىلىق") بويىنشا كۇدىكتى دەپ تانىپ، ەكى ايعا قاماۋعا سانكسيا بەرگەن. قىلمىستىق كودەكستىڭ "ءوزىن-وزى ولتىرۋگە دەيىن جەتكىزۋ" بابى بويىنشا ايىپ تەرگەۋ كەزىندە تاعىلعان.