ەلىمىزگە بەلگىلى جۋرناليست، «اق جايىق» باسىلىمىنىڭ نەگىزىن قالاۋشى ءابدىلدا مۇقاشيەۆ ومىردەن وزدى. بۇل جايىندا اتالمىش باسىلىمنىڭ باس رەداكتورىنىڭ كەڭەسشىسى سابىر قايىرحانوۆ مالىمدەدى، دەپ جازادى Qamshy.kz اقپارات اگەنتتىگى kaztag.kz سايتىنىڭ مالىمەتىنە سۇيەنە وتىرىپ.

ونىڭ ايتۋىنشا، جۋرناليست اتىراۋ قالاسىندا سەنبى كۇنى اۋرۋدان كوز جۇمىپتى. جەرلەۋ ءراسىمى 29 قاڭتار كۇنى وتكىزىلەدى ەكەن.

ءابدىلدا مۇقاشيەۆ – جاسى 58-دە، اتىراۋدىڭ تۋماسى. ول قازاق مەملەكەتتىك ۋنيۆەرسيتەتىنىڭ جۋرناليستيكا فاكۋلتەتىن ءتامامداپ، ەڭبەك جولىن تيپوگرافيادان باستاعان، كەيىننەن «پريكاسپييسكايا كوممۋنا» گازەتىندە ءتىلشى بولىپ قىزمەت اتقارعان.

«ول 1991 جىلى «اق جايىق» گازەتىن شىعارىپ، كەيىننەن اتالمىش باسىلىم تاۋەلسىزدىك جىلدارىندا اتىراۋ جاڭالىقتارىن شىعاراتىن جەرگىلىكتى باسىلىمعا اينالدى. سونداي-اق، ءسوز بوستاندىعى مەن قازاقستاندىقتاردىڭ قۇقىعىن قورعايتىن گازەت بولدى. «اق جايىق» گازەتى بۇگىندە رەسپۋبليكا كولەمىندە وزىندىك اۋديتورياسى مەن بەدەلى بار باسىلىمداردىڭ بىرىنە اينالعان. مۇنىڭ ءبارى، ارينە، ءابدىلدا مۇقاشيەۆتىڭ ەڭبەگىنىڭ ارقاسىندا. ونىڭ ومىردەن وزعانى – وتاندىق جۋرناليستيكادا ورنى تولماس قازا»، - دەيدى جۋرناليستەر وداعىنىڭ باسشىسى سەيتقازى ماتايەۆ.

ءابدىلدا مۇقاشيەۆ جۋرناليستەر وداعىنىڭ مۇشەسى، اتىراۋ قالاسىنداعى «ۇلتتىق پرەسس-كلۋب» فيليالىنىڭ ۇيىمداستىرۋشىسى جانە قازاقستانداعى بەدەلدى جۋرناليست بولدى.

دايىنداعان: نازەركە لابيحان