قاراعاندىدا مەكتەپ وقۋشىلارى پيسسەريادا ورىن بەرۋدەن باس تارتقان بالانى ۇرىپ-سوققان، - دەپ حابارلايدى Qamshy.kz اقپارات اگەنتتىگى Tengrinews.kz مالىمەتىنە سۇيەنە وتىرىپ.
سوققىعا جىعىلعان بالانىڭ اناسى وقيعانىڭ 26 قاڭتاردا ساعات شامامەن 15.00-دە قالاداعى پيسسەريالاردىڭ بىرىندە بولعانىن ايتتى.
"بالام 11-دە، ول پيسسەرياعا دوستارىمەن بىرگە تاماقتانۋعا بارعان. تورتەۋى. تاماقتانىپ وتىرعان كەزىندە التى-جەتى بالا كەلىپتى. ۇلكەندەرى دە، جاستىلارى دا بار. بالام وزگەلەردىڭ جانىندا ۇلكەنىرەك كورىنەدى، سپورتپەن اينالىسادى. پيسسەرياعا كەلگەندەر ونى سەمىز دەپ، ورىندى بوساتۋىن تالاپ ەتكەن. بالام تۇرماي قويعان. بۇدان كەيىن الگى بالالار ۇلىمدى شىعارىپ الىپ، توبەلەسكە شاقىرعان، بالام توبەلەسكە ۋاقىتى جوق ەكەنىن ايتقان، اتا-اناسىمەن قوناققا باراتىنىن ايتتى. ول ەشتەڭە ىستەمەي تۇردى، سوندا بالالاردىڭ ءبىرى وعان بەتىنەن كۇتپەگەن سوققى جاسادى. ول قۇلادى، قالعان ەكى بالا ونى تەپكىلەي باستادى. ۇلىمنىڭ دوستارى كىشكەنتاي، ەشتەڭە ىستەي الماي، قاراپ تۇردى"، - دەيدى ايەل.
وقيعا ۆيدەوباقىلاۋ كامەراسىنا ءتۇسىپ قالعان. ۆيدەو كادرلارىنان قۇلاعان بالانى وزگەلەردىڭ تەپكىلەپ جاتقانىن كورۋگە بوالدى. قار ۇستىنە تامعان قان انىق كورىنەدى.
"شىن مانىندە توبەلەس بولدى. بىرنەشە ءجاسوسپىرىم ءبىزدىڭ مەكەمەنىڭ الدىندا ءبىر بالانى سوققىعا جىققان. ءوزىمىز دە نە بولعانىن تۇسىنبەي قالدىق. قىزمەتكەرلەرىمىز كامەرادان بىردەڭە بولىپ جاتقانىن كورىپ، بىردەن دالاعا جۇگىرىپ شىقتى. كەلۋشىلەر مەن كوشەدەگىلەر بىزگە كومەكتەسە باستادى"، - دەيدى اۋىسىم مەنەدجەرى بەكارىس ءسابي.
قازىرگى ۋاقىتتا بالا ۇيىندە. اناسىنىڭ ايتۋىنشا، ول ابىروي بولعاندا اۋىر جاراقات الماعان، ءبىراق ءتۇنى بويى ۇيىقتاماپتى.
ۆيدەودا بەيادەپ سوزدەردىڭ بار ەكەنىن ەسكەرتەمىز.
ۇسىنعان: نازەركە لابيحان
پىكىر قالدىرۋ