فيليپپيندە كاتوليكتەر شىركەۋىندە جارىلىس بولىپ، سونىڭ سالدارىنان 27 ادام قازا تاپتى، ال 77ء-سى اۋىر جاراقات العان. بۇل جايىندا Qamshy.kz اقپارات اگەنتتىگى Bbc.com سايتىنىڭ مالىمەتىنە سۇيەنە وتىرىپ جازادى.

ءبىرىنشى جارىلىس جەرگىلىكتى ۋاقىتپەن ساعات 08:45-تە كارمەل تاۋىندا جەكسەنبىلىك كاتوليكتىك جيىن بارىسىندا بولعان. كەيىننەن وقيعا ورنىنا اسكەريلەر مەن جەرگىلىكتى پوليسيا قىزمەتكەرلەرى كەلىپ جەتكەننەن سوڭ ەكىنشى جارىلىس ورىن العان.

قازا تاپقانداردىڭ كوپشىلىگى قاراپايىم تۇرعىندار بولسا، جەتەۋى اسكەري قىزمەتكەرلەر ەكەن. "العاشىندا 19 ادام قازا تاۋىپ، 48ء-ى جارالاندى" دەگەن اقپارات شىققان بولاتىن، كەيىننەن قۇربان بولعان ادامداردىڭ سانى وسكەن.

بۇل وقيعاعا بايلانىستى ءالى ەشبىر ۇيىم وزىنە جاۋاپكەرشىلىك العان جوق.

جارىلىس بولعان جەر تۇگەلدەي قورشاۋعا الىنىپ، شىركەۋگە باراتىن جولدى جاۋىپ تاستاعان.

دايىنداعان: نازەركە لابيحان