مەملەكەت باسشىسى جاستار جىلىنىڭ اشىلۋىنا ارنالعان سالتاناتتى جيىندا جاس كاسىپكەرلەردى قولداۋعا ارنالعان باعدارلاما ازىرلەۋدى ۇسىندى. سونداي-اق، ۇكىمەتكە «بيزنەس – 2020» جول كارتاسى باعدارلاماسى اياسىندا سول جاس كاسىپكەرلەرگە بولىنەتىن قارجى كولەمىن ەكى ەسەگە ارتتىرۋدى تاپسىردى. سول ارقىلى ءۇش جىلدا شامامەن 300 مىڭعا جۋىق جاس بيزنەستىڭ قىر-سىرىن مەڭگەرىپ شىعۋى ءتيىس.

بيزنەسپەن اينالىسامىن دەگەن جاس كاسىپكەرلەر ءبىرىنشى كەزەكتە اعىلشىن ءتىلىن مەڭگەرىپ السا ەكەن دەگەن تىلەگىم بار. ويتكەنى، بۇگىنگى تاڭدا دۇنيەجۇزىندەگى قۇندى دەرەك كوزدەرىنىڭ 80 پايىزى اعىلشىن تىلىندە جارىق كورەدى. ەگەر ءبىز الەمدەگى وزىق مەملەكەتتەرمەن تەرەزەمىزدى تەڭەستىرگىمىز كەلسە، الەمدەگى سوڭعى جاڭالىقتاردان قۇلاعدار بولىپ، ۋاقىت كوشىنەن قالماي ىلەسىپ وتىرعىمىز كەلسە، ءتىلدى جەتىك ءبىلۋىمىز قاجەت.

ءبىزدىڭ حالىقارالىق بيزنەس ۋنيۆەرسيتەتى (University of International Business) – جوعارى ءبىلىمدى بىلىكتى مامانداردى دايارلاۋدا تاجىريبەسى بار، ەكونوميكانىڭ ءتۇرلى سالاسىندا بيزنەس جۇرگىزۋگە قابىلەتتى جانە كوشباسشى بولا الاتىن وزىندىك قازىرگى زامانعى بيزنەس-مەكتەپ. ءبىز ءار ستۋدەنت پەن تىڭداۋشىعا جوعارى جانە جوعارى وقۋ ورنىنان كەيىن كاسىبي ءبىلىم بەرۋ تراەكتورياسىن قۇرا وتىرىپ، ءوزىنىڭ ەڭ جوعارى مانساپتىق ماقساتتارىن جۇزەگە اسىرۋعا مۇمكىندىك بەرەمىز.

پرەزيدەنت ۋنيۆەرسيتەتتىڭ جوعارعى كۋرستارىندا وقيتىن ستۋدەنتتەردى دە بيزنەسكە باۋلۋدى دا ۇسىندى. ناقتىراق ايتساق، ءبىتىرۋشى كۋرستاردا، ۋنيۆەرسيتەتتىڭ جوعارى كۋرسىندا وقيتىن 60 مىڭعا جۋىق ستۋدەنتتى بيزنەسكە باۋلۋ قاجەتتىگىن ايتتى. ءبىز دە ءوز تاراپىمىزدان جاس كاسىپكەرلەرگە كومەكتەسۋگە، ولاردىڭ جولىن اشۋعا ءارقاشان دايىنبىز.

باحتيار سابدەنالييەۆ

حالىقارالىق بيزنەس

ۋنيۆەرسيتەتىنىڭ الەۋمەتتىك

دامۋ ماسەلەلەرى بويىنشا

باسقارۋشى ديرەكتورى