ميحايل ساكااشۆيلي ىزدەۋدە ءجۇر. بۇگىنگى گرۋزين بيلىگى وعان ايىپ تاققان. ونىڭ ۋكرايناداعى ساياسي بەلسەندىلىگى دە ناتيجەسىز اياقتالدى. پەتر پوروشەنكو ونى ەلدەن الاستاتتى. قول-اياعىن، كوزىن بايلاپ، نيدەرلاندىعا قاراي شەكارا اسىرىپ جىبەردى. ءبىراق...

ونىڭ گرۋزياعا قايتا ورالعىسى كەلەدى. دەگەنمەن، ءقازىر ءوز ەلىنە كەلۋىنە ەش مۇمكىندىگى جوق. ويتكەنى قازىرگى بيلىك وعان قاتىستى قىلمىستىق  ءىس قوزعاعان. بۇل قولدان جاسالىنعان بولۋى دا مۇمكىن. اقيقاتى، گرۋزين پرەزيدەنتىنىڭ ماڭايىنداعىلار ونىڭ ەلگە ورالۋىن قالامايدى. ال ساكااشۆيلي ەلگە ورالسا، ونى حالىق تاعى دا قولداپ كەتۋى مۇمكىن. ويتكەنى...

گرۋزيادا وتكەن بىلتىرعى قاراشاداعى پرەزيدەنتتىك سايلاۋدا بيلىكتىڭ وكىلى سالومە زۋرابيشۆيلي حانىم جەڭىسكە جەتتى. ورتالىق سايلاۋ كوميسسياسىنىڭ ەسەبى بويىنشا ول 59،52 پايىز داۋىس جيناپ، ەل پرەزيدەنتى اتاندى. ال ونىمەن باسەكەگە تۇسكەن گريگول ۆاشادزە 40،40 پايىزدان ارتىق داۋىسپەن ەكىنشى ورىن الدى. ال ۆاشادزە – ميحايل ساكااشۆيليدىڭ ادامى. سوندىقتان دا ميشا ەگەر ەلگە كەلەتىن بولسا، مىندەتتى تۇردە ونىڭ پارتياسى جەڭىسكە جەتەتىنە ءوزى دە  اسا سەنىمدى. سوندىقتان دا بولار، شەتەلدە جۇرسە دە، گرۋزين حالقىنىڭ باسىم كوپشىلىگى ءوزىن قولدايتىنىن بىلەدى. شەكارا سىرتىندا ءجۇرىپ باتىل مالىمدەمە جاساۋىنىڭ سىرى دا وسى.

–مەنى گرۋزين حالقىنىڭ باسىم بولىگى جانە وپپوزيسيا وكىلدەرى قولدايتىنىن بىلەمىن. ەگەر ەلدە ماعان ەركىن جۇرۋگە مۇمكىندىك جاسالسا، 72 ساعاتتىڭ ىشىندە بۇگىنگى بيلىكتى بەيبىت جولمەن اۋىستىرۋعا كۇشىم جەتەدى. قازىرگى گرۋزيا بيلىگى جىندىلاردىڭ جۇيكەسى بۇزىلعاندار تۇراتىن عيماراتتا  دارىگەرلەردى قاماپ ۇستاپ وتىرعانىن  ەسكە تۇسىرەدى. سوندىقتان دا ءبىز ەشقانداي قۇرباندىققا بارماي بيلىكتە جۇرگەن «جىندىلاردى» وقشاۋلاۋىمىز قاجەت، – دەدى ەكس-پرەزيدەنت رۋستاۆەلي-2 تەلەارناسىنا بەرگەن سۇحباتىندا.