لا-مانش بۇعازىنىڭ ماڭىندا ۇشاق جوعالىپ كەتتى، وسىعان بايلانىستى ءبىر اپتادان بەرى جاھان جۇرتى دابىرا كۇيدە. سەبەبى ۇشىق بورتىندا الەمدەگى مىقتى فۋتبولشىلاردىڭ ءبىرى ارگەنتينالىق ەميليانو سالا بار ەدى. 28 جاستاعى سالا وتكەن اپتادا ۆالليالىق «كارديفف سيتي» كومانداسىمەن كەلىسىمشارتقا وتىرعانى بەلگىلى.

دەرەككە جۇگىنسەك، فرانسيالىق اۆياسيالىق بيلىك «پايپەر ماليبۋ» ءبىر موتورلى ۇشاعىنىڭ بورتىندا سالانىڭ بولعانىن راستاپ وتىر. سونىمەن قاتار كارديفف اۋەجايى دا فرانسيانىڭ نانت قالاسىنان ۇشاقتىڭ كەلۋىن كۇتىپ وتىرعانىن مالىمدەگەن.

ال «كارديفف سيتي» فۋتبول كلۋبى جاعدايدىڭ ءمان-جايىن انىقتاۋعا كىرىسىپ تە كەتتى.

ۇشاق وتكەن دۇيسەنبىنىڭ كەشىندە راداردان جوعالىپ كەتتى، سوڭعى ورنالاسقان ايماعى نورماند جاعالاۋىنىڭ بىرىندەگى كاسكەت شامشىراعىنىڭ اينالاسى ەدى. تەڭىزشىلەر اراسىندا بۇل مەكەن قايعىلى وقيعالارمەن تىكەلەي بايلانىستى، سەبەبى كوبىنە ءدال وسى ايماقتا كەمەلەر اپاتقا ءجيى ۇشىرايتىن كورىنەدى.

بريتاندىق جاعالاۋ كۇزەتشىسى ۇشاقتىڭ ءدال سول شامشىراق (ماياك-رەد) ماڭىندا اپاتقا ۇشىراۋى مۇمكىن ەكەنىن ايتىپ وتىر. سونىمەن قاتار، ولار ىزدەۋ شارالارى ءۇشىن ەكى تىكۇشاقتى جىبەرگەن. الايدا بۇگىنگە دەيىن وڭتايلى ناتيجە بولعان جوق.

دۇيسەنبى كۇنى تۇندە اۋا رايىنىڭ قولايسىزدىعىنا بايلانىستى ىزدەۋ شارالارى توقتاتىلىپ، سەيسەنبىنىڭ تاڭىنا قاراي تاعى جالعاسقان بولاتىن.

"پايپەر ماليبۋ" ۇشاعى

نورماند جاعالاۋىنىڭ پوليسيا قىزمەتى ۇشاقپەن سوڭعى بايلانىستىڭ 700 مەتر بيىكتىكتە بولعانىن حابارلادى. ال بريتاندىق مەتەورولوگتار ۇشاق جوعالعان ايماقتا جاۋىن-شاشىن بولعانىن مالىمدەدى، الايدا ايتارلىقتاي قاتتى ەمەس. جەلدىڭ جىلدامدىعى دا اپاتقا ۇشىراتاتىنداي ەمەس.

ال دەرەككە جۇگىنسەك، ەميليانو سالا فۋتبول الەمىندەگى كارەراسىن تەك فرانسۋزدىق كلۋبتاردا وتكىزدى ءارى ەڭ مىقتى شابۋىلشىلاردىڭ ءبىرى بولدى.

فۋتبولشى «تۆيتتەردەگى» سوڭعى جازباسىندا «نانت» فۋتبول كومانداسىمەن قوشتاسقانىن جازعان.

ەميليانو سالانىڭ جوعالىپ كەتكەنىنە اكەسى دە قاتتى قاپالانىپ وتىر.

-سەنە الماي وتىرمىن. قولدان كەلەر شارانىڭ بولماعانىنا اشىنامىن. ەندى نە بولاتىنى تۇسىنىكسىز. جاقسى جاڭالىقتان ءۇمىتتىمىز. بىلمەي قالدىق. «كارديففكە» وتكەنى ءوزى ءۇشىن دە، وتباسى ءۇشىن دە ۇلكەن مۇمكىندىك ەدى. انىعى، ءبىز سولاي جورىدىق، ويلادىق»، - دەدى اكەسى Get French Football News باسىلىمىنا بەرگەن سۇحباتىندا.

24 قاڭتاردا بريتاندىق گەرنسي جاعالاۋىنىڭ پوليسياسى ىزدەۋ شارالارىنىڭ توقتاتىلعاندىعىن حابارلادى. سەبەبى ۇشاق جولاۋشىلارىنىڭ ءتىرى قالۋى ەكىتالاي ەدى. ال ىزدەۋ-قۇتقارۋ شارالارى ءتورت كۇنگە جالعاسقانىمەن، ەش ناتيجە بولمادى.

پوليسيادان ءۇمىتىن ۇزگەن سالانىڭ وتباسى فۋتبولشىنى ىزدەۋگە وزدەرى كىرىسىپ كەتتى.

26 قاڭتاردان باستاپ «پامپەي ماليبۋ» ۇشاعى جوعالعان ايماقتا ىزدەستىرۋ شارالارى قايتا جالعاستى. ىزدەۋ جۇمىستارىن جالعاستىرۋ ءۇشىن GoFundMe قورى اشىلدى. نەبارى ەكى كۇننىڭ ىشىندە قورعا 3،8 مىڭ ادام 300 مىڭ ەۋرو اۋداردى. اقشا اۋدارعانداردىڭ قاتارىندا الەمگە تانىمال فۋتبولشىلار دا بار. سولاردىڭ ءبىرى -  30 مىڭ ەۋرو اۋدارعان فرانسيالىق شابۋىلشى كيليان مباپپە.

وسى ورايدا ەكى كۇن بۇرىن «بارسەلونا» فۋتبول كلۋبىنىڭ كاپيتانى ليونەل مەسسي Instagram جەلىسىندەگى پاراقشاسىندا سالانى ىزدەۋ شارالارىن توقتاتپاۋدى ءوتىنىپ سۇرادى.

«ءۇمىتىمىز سونگەن جوق، ەميليانونى ىزدەۋدى توقتاتپاۋ كەرەك. وتباسى مەن دوستارىن قولداپ، سالانىڭ امان-ەسەن تابىلۋىن تىلەيمىن، دۇعا ەتەمىن»، - دەپ جازدى مەسسي.

مەسسيدەن وزگە دە تانىمال فۋتبولشىلار  بيلىكتەن ىزدەستىرۋ شارالارىن جالعاستىرۋدى سۇراپ وتىر.

ەميليانو سالانىڭ «كادريفپەن» كەلىسىمشارتى 17 ميلليون ەۋروعا باعالانعانىن ايتا كەتەيىك.