الىپ ادامنىڭ ىشكى اعزاسىنا كىرىپ كورگىڭىز كەلە مە؟ نيدەرلاندتا بۇل ابدەن مۇمكىن نارسە. سەبەبى ەلدە ادام دەنەسىنىڭ الىپ مۇراجايى بار. تابالدىرىعىن اتتاعان بويدا ءوزىڭدى ناعىز ادامنىڭ ىشىنە ەنىپ كەتكەندەي سەزىنەسىڭ. Qamshy.kz اقپارات اگەنتتىگى وقىرمانىن ادام اعزاسىنا ساياحاتتاۋعا شاقىرادى. 

مۇراجاي نيدەرلاند استاناسى لەيدەن قالاسىندا ورنالاسقان. عيماراتتىڭ بەينەسىن ادامعا ۇقساتىپ جاساعان، ال ىشىنە كىرەر ەسىگى الگى «ادامنىڭ» تىزەسىندە ەكەن. مۇراجاي بىرنەشە قاباتتان تۇرادى.

ىشىنە كىرەتىن ادامنىڭ جۇيكەسى دە مىقتى بولۋى ءتيىس. سەبەبى ادامنىڭ ءتۇرلى اعزاسىنان قۇرالعان قالالاردى كورەسىز.

ادامنىڭ سان ەتى مەن قاننىڭ اق جانە قىزىل تۇيىرشىكتەرىنەن باستالعان ساپار بۇدان ءارى قىزا تۇسەدى. ادام اعزاسى مۇراجايى جالپى 7 قاباتتان تۇرادى.

اسىرەسە، بۇل فيزيولوگيانى ەرەكشە جاقسى كورەتىن جاندار ءۇشىن تاپتىرماس مۇمكىندىك، سەبەبى ءبارى شىنايى ىسپەتتەس. ىشىنە كىرگەن ادام قاننىڭ قىزمەتى، جۇرەك سوعىسى، تامىر سوعىسىن باقىلاپ جۇرەتىن شىبىن-شىركەي سەكىلدى. ەستۋ قابىلەتى، بۇلشىق ەت جۇيەسى، دىبىس بايلانىستارى، سۇيەكتەر مەن تىستەرى – ءبارىن تىڭعىلىقتى زەرتتەپ الۋعا بولادى.

ءار اعزانىڭ جۇمىسى ارنايى مونيتوردان كورسەتىلەدى، ءتىپتى شىنايى داۋسىن دا ەستۋگە بولادى. ادام بالاسى ءوزىن الىپ ادامنىڭ ىشىنە كىرىپ كەتكەندەي سەزىنەدى. ەكسكۋرسيا ارنايى كوزىلدىرىكتەرمەن ءتىپتى قىزا تۇسەدى.  

ءبىر قىزىعى، مۇراجايداعى ادام اعزاسىنان انا جاتىرىندا جاڭا ءومىردىڭ، ياعني ءسابيدىڭ پايدا بولۋ قۇبىلىسى دا كورسەتىلەدى ەكەن. بۇل پروسەسكە، اسىرەسە ايەل ادامدار ەرەكشە قىزىعۋشىلىق تانىتاتىن كورىنەدى.

ال كىشكەنتاي بالالاردى سەكىرىپ ويناۋعا بولاتىن «ادامنىڭ ءتىلى» قىزىقتىرادى.

مۇراجاي گيدتەرى ساپار بارىسىندا ادامدارعا اعزانىڭ ءار قۇرىلىسىن، جۇمىسىن تانىستىرادى. ادام اعزاسىنا زيان كەلگەندە ءىش قۇرىلىسىندا قانداي پروسەسس ورىن الاتىنىن دا مۇراجايعا كىرىپ، بىلە الاسىز.

مۋزەي جوباسىن جاساۋعا 12 جىل كەتىپتى، ال قۇرىلىسى 2 جىلعا سوزىلعان. جالپى مۇراجاي قۇرىلىسى ءۇشىن 30 ميلليون دوللار جۇمسالعان كورىنەدى. عيماراتتىڭ ءوزى نەگىزىنەن اينەكتەن، ال ادام اعزالارى توت باسپايتىن بولاتتان جاسالعان. عيماراتتىڭ ۇزىندىعى – 35 مەتر. 

دايىنداعان: گۇلىم جاقان