قازىرگى جاستار توقتار اۋباكىروۆتەي باتىر تۇلعادان كوبىرەك ۇلگى الۋى كەرەك. قازاقتىڭ تۇڭعىش عارىشكەرى توقتار اۋباكىروۆتىڭ ءتىل مەن ەلجاندىلىققا قاتىستى ۇلاعاتتى ءسوزىن Qamshy.kz اقپارات اگەنتتىگى وقىرمان نازارىنا ۇسىنادى.

«وتان» دەگەن ارعى ۋاقىتتان كەلە جاتىر، ول انامەن تەڭ. وتان – انا. وتاندى ساتقانىڭ، اناڭدى ساتقانمەن تەڭ. وتانعا ەرەكشە ماحاببات كەرەك. ماحاببات قىزعا ەمەس، ەرگە ەمەس، اناعا قانداي ماحاببات بولادى، وتانعا سونداي ماحاببات قاجەت. سوندا تۇلعا بولىپ وسەسىڭ. «پاتريوتيزم» سودان شىعادى. "بىرەۋدى مەنىڭ وتانىمدى جاماندادى" دەپ ساباعان پاتريوتيزم ەمەس. ونىڭ ەرەكشەلىگى مىنادا جاتىر دەپ ءتۇسىندىرۋ كەرەك. ول ءۇشىن ءوز وتانىڭدى قاتتى ءسۇيۋىڭ كەرەك. ال ول قازىرگى جاستاردا بۇل ازايىپ بارادى. پاتريوتيزم قازىرگى تاڭدا ءبىراز ۇمىتىلىپ قالدى. سوۆەت ۇكىمەتى كەزىندە  پاتريوتتىق سەزىم ساياساتپەن بىرگە ەدى.

قاسىمىزداعى ۇلكەن قىتايدا ميللياردتان استام حالىق بار. سولارعا كىشكەنتاي كەزىنەن ءوز وتانىن ءسۇيۋ، ءوز جەرىن ءسۇيۋدى ۇقتىرادى، سوعان ۇيرەتەدى. ال بىزدە ول مەكتەپتە دە جوق. ءبىراز اقشامىز پايدا بولسا، جۇگىرىپ اعىلشىن، نەمىس مەكتەبىنە بالامىزدى بەرەمىز. ءوزىمىزدىڭ مەكتەپتە ءوز ءتىلىمىز جوقتاي! انا ءتىلدى ۇمىتپاۋ كەرەك. بۇرىنعى ۋاقىت ءوتتى، كەتتى. بۇرىن ايتۋشى ەدى «ورىس ءتىلىن بىلمەسەڭ، ادام بولمايسىڭ» دەپ. شىندىعىندا دا ورىس ءتىلىن بىلمەسەڭ سەنى ەشقانداي جەرگە المايتىن، قارا جۇمىس بولماسا، باسقاسى جابىق بولاتىن. قازىرگى ۋاقىتتا ءبىز ءوزىمىزدىڭ ەگەمەن مەملەكەتىمىزدە، قازاقستاندا تۇرىپ جاتىرمىز. ءبىزدىڭ سوندىقتان پاتريوتتىق سەزىمىمىز ويانۋى كەرەك. ءوز تىلىمىزبەن سويلەپ، ءوزىمىزدى ماقتاپ، قايدا جۇرسەك تە، سونى كوتەرۋىمىز كەرەك.

كوشەگە شىقساق قازاقشا سويلەۋگە ۇيالامىز. ورىسشا سويلەپ كەتەمىز، اعىلشىنشا سويلەپ كەتەمىز. ءقازىر جاستار اعىلشىن ءتىلىن جاقسى، تاماشا ۇيرەنۋدە. دۇرىس. ادام ءبىر تىلمەن ءومىر سۇرە المايدى. جەتى جۇرتتىڭ ءتىلىن بىلگەن ادام قايدا جۇرسە دە، ءوزىن-وزى ۇستاپ جۇرە الادى. ءبىز سەكىلدى بولمايدى. جاستار وزگە ءتىلدى ءبىلۋى كەرەك، ءبىراق ەڭ ءبىرىنشى ءوز ءتىلىن جاقسىلاپ يگەرۋى ءتيىس. «پاتريوتيزم» دەگەن سول!