مەن ەشكىم ەمەسپىن. تەك اداممىن. اللاحتىڭ كوركەم جاراتىلىستارىنىڭ ىشىندەگى "اقىل يەلەرىنىڭ" بىرىنەن بولعانىما مىڭ شۇكىر. جاراتقانعا سانسىز ماداق پەن ماقتاۋ بولسىن!

مەن ەشكىم ەمەسپىن. تەك ءبىر ۇلتتانمىن. سونىڭ ىشىندە - قازاقپىن. ماقتان تۇتامىن وسى ۇلتتىڭ وكىلى ەكەندىگىمدى! راس، قازاق بولۋ - ۇلكەن باقىت!

مەن ەشكىم ەمەسپىن. تەك پەندەمىن. وزگەلەر سەكىلدى بىردە وكىنىپ، وكىندىرىپ، ساعىنىپ، ساعىندىرىپ، جالىنىپ، جالىندىرىپ، مۇڭ سىيلاپ، مۇڭ جۇتىپ، ارمانداپ، ارمانداتىپ، سەزدىرىپ، سەزىندىرىپ... جۇرەتىن كوپتىڭ ءبىرىمىن عانا...

مەن ەشكىم ەمەسپىن. تەك كەنجەمىن. ءيا، بەسەۋدىڭ بەسىنشىسىمىن. الايدا ەركە ەمەسپىن. اكەم مەن انامنىڭ ءسۇت كەنجەسىمىن. مۇنى دا ماقتان ەتەمىن! ماعان دا ارتىلعان جۇك پەن ءۇمىتتىڭ سالماعىن سەزەمىن...

مەن ەشكىم ەمەسپىن. تەك دوسپىن. قالىڭ ادامنىڭ ىشىندەگى الدەبىر جانىما جاقىن جانداردىڭ دوسىمىن. سوعان شۇكىر. دوس بولۋ، دوسى بولۋ، دوسىڭ بولۋ دا - باقىت بولسا كەرەك...

مەن ەشكىم ەمەسپىن. تەك ۇستازبىن. وزگە قاراسى كوپ ماماندىقتىڭ ىشىندە مەنى تاڭداعان، مەن تاڭداعان ول - ۇستازدىق. مىڭ شۇكىر. كوزىم، ءوزىم جوق بولسام دا، بۇل جالعاندا پايداسى بار ءىزىم قالسا، سول - باقىت.

مەن ەشكىم ەمەسپىن. تەك قىزبىن. ۇققانعا ۇعىنىڭقى، تۇسىنگەنگە تۇسىنىكتى، سىيلاعاندى سىيلايتىن، جۇرەكتە ورىن العان جاندارىن جاماندىققا قيمايتىن، باردى باعالار، مىقتى بولىپ كورىنگىسى كەلەتىن، الايدا، قىز بىتكەننىڭ ءبارى سەكىلدى جانى نازىك، وكپەشىل قىزبىن...

مەن ەشكىم ەمەسپىن.  تەك... تەك  بىرەۋدىڭ باقىتىمىن... باقىتىمنىڭ باقىتىمىن... بۇيىرعان ب ا ق بار بولسا، سوعان لايىقتىمىن... بار بولماسا، بولعانى مەن ءۇشىن لايىقتى...

مەن ەشكىم ەمەسپىن. تەك جولداسىمنىڭ ماڭدايىنا جازعان جارىمىن... تاعدىر جازسا، سوڭعى دەم ۇزىلگەنشە بىرگە بولۋعا سەرتتەسكەن سەرىگىمىن... تەڭىمىن... قوساعىمىن...

مەن ەشكىم ەمەسپىن. تەك قاي جاقسىلىعىم ءۇشىن ەكەنى بەيمالىم، قۇشاعىنا ەكى بالاپان بۇيىرعان انامىن... بارىنشا جاقسى انا بولۋعا تىرىسىپ جۇرگەن جانمىن...

مەن ەشكىم ەمەسپىن. تەك بار بولعانى كوپتىڭ ءبىرى - كەلىنمىن. قىزدارىنداي بولا الماسام دا، اتا-ەنەگە قىزمەتىنە قابىلدانعان... بارىمدى سالىپ جۇرگەن جاي عانا كەلىنمىن... 

مەن ەشكىم ەمەسپىن. تەك بار بولعانى ءبىر ءتۇيىر قانمىن، اللانىڭ نۇرىنا شومىلعان...ءبىر كۇنى تانىنەن جانى اجىرار... وزگەلەردەي...

ماقپال سەمباي