باسقانى قايدام، ءوز باسىم شەنەۋنىكتەردىڭ ارسىز وتىرىكتەرىنە تويىپ كەتتىم...
جاقىندا كەزەكتى ءبىر اڭىزعا كوزىم ءتۇستى: «ءۇش جىلدان بەرى تۇرعىنداردىڭ ناقتى كىرىسى ازايىپ بارادى...» – دەپتى...
قايداعى ءۇش جىل؟ وتىز جىل بولدى عوي: قىمباتشىلىقتىڭ اسپانعا ۇزدىكسىز شاپشىپ جاتقانىنا...
ارينە، ميلليونداپ-ميللياردتاپ، تەڭگەلەپ-دينارلاپ، دوللارلاپ-ەۆرولاپ، پۇلداپ-فۋنتتاپ ۇرلاعان ءىرى ۇرى-قارى، اكىم-قارارلاردى ەسەپكە الماعاندا... ءداپ سول بارىمتاشىلاردىڭ ناقتى كىرىستەرى توقتاۋسىز، تەجەۋسىز ءوسىپ جاتىر...
ال، قاراپايىم حالىق قارا سۋ مەن قارا شامبىگە تاڭىلىپ وتىر...
دەسە دە، ۇلتتىق ەكونوميكا مينيسترلىگى «قازاقستان ازاماتتارىنىڭ ورتاشا جالاقىسى 168 220 تەڭگە بولدى» – دەپ مالىمدەپتى، «بەتتەرى» بىلش ەتپەي...
قالاي ەسەپتەپ، قانشاما قيساپقا سالساڭ دا، قىپ-قىزىل وتىرىك!

ويتكەنى، بىزدە مىسالى، بالاباقشالار مەن مەديسينالىق مەكەمەلەردە جانە جەكەمەنشىك سەكتوردا 18-20 مىڭ تەڭگەلىك جۇمىستار دا بار... سونىمەن قاتار، 10 ميلليون تەڭگەدەن دە اساتىن جالاقىلار دا بار...
سوندا بۇل وتىرىكتەن كىمگە پايدا؟ كىم ۇتادى؟..
ارينە، مەملەكەت باسشىلارى مەن يمانسىز بايلار ەكى اتتاپ، ۇتىسقا شىعادى...

سوڭعى جىلدارى اتقامىنەرلەر مىڭ ەرتەگىسىنىڭ بىرەۋىن برەندكە اينالدارىپ الدى. اندەرسون-قاراعۇسوۆا گۇلجاننىڭ مينيستر لاۋازىمى كەزىندەگى مۇراسى، بۇل. ەرتەگىنىڭ اتى – «ءوزىن-وزى جۇمىسپەن قامتاماسىز ەتۋ» دەپ اتالادى. كەزىندە اۋىل قازاقتارىنىڭ قورالارىنداعى قورازداردى تۇگەندەپ، جۇمىرتقالاردى ساناعان مينيستر-«سكازوچنيك» اندەرسون-قاراعۇسوۆا ««ءوزىن-وزى جۇمىسپەن قامتاماسىز ەتۋشى» قازاقستاندىقتار جالپى حالىقتىڭ 25 پايىزىن قۇرايدى» – دەپ سوقتى...
اندەرسون-قاراعۇسوۆا اپايعا «زور العىس»! كوپىرىپ، تۇكىرىك شاشقان اۋىزىمەن ءار قازاقتىڭ شاڭىراعىن «جارىلقاپ»، «بايىتىپ» جىبەرگەن...

قازاق بيلىگىنىڭ پارادوكسى مىناۋ:
1. مۇنايدىڭ الەمدىك باعاسى وسەدى – قازاقستاندا جانار-جاعار ماي مەن بارلىق تاۋارلاردىڭ باعالارى جانە اقش دوللارىنىڭ باعامى وسەدى.
2. مۇنايدىڭ الەمدىك باعاسى تۇسەدى – قازاقستاندا جانار-جاعار ماي مەن بارلىق تاۋارلاردىڭ باعالارى جانە اقش دوللارىنىڭ باعامى وسەدى.
3. قازاقستاندا «زەينەتاقى كولەمىنە بولماشى عانا تيىن-تەبەن قوسىلادى» دەگەن اقپارات تاراي سالىسىمەن، ينفلياسيا اسپانداپ ءوسىپ، «ۇستاتپاي» كەتەدى.

قىسقاسى، قازىرگى قازاقتىڭ كۇيى: «بۇل جالعاندا – ءشايعا جەتسە، اقىرەتتە – ماي دا جەرمىز...» – دەگەن دامەنىڭ ءداپ ءوزى. «ءۇپ» ەتىپ، ءۇمىت ءۇزىلىپ كەتپەسە ەكەن دەيمىز...

قاجىمۇقان عابدوللا