جيىرما جىل بۇرىن قايتىس بولعان بالا ءولىمىنىڭ قۇپياسى اشىلدى دەپ جازادى Qamshy.kz اقپارات اگەنتتىگى wcpo.com سايتىنىڭ دەرەگىن نەگىزگە الىپ.
1998 جىلى اقش-تىڭ سولتۇستىك كورولينا شتاتىندا 10 جاستاعى بالانىڭ ءمايىتى تابىلعان. بۇل قىلمىستىڭ شىندىعى اراعا 20 جىل سالىپ اشىلدى.
بالانىڭ ءمايىتى بۇزىلىپ كەتكەندىكتەن پوليسيا قىزمەتكەرلەرى دەر كەزىندە ونىڭ كىم ەكەنىن انىقتاي الماعان. سونداي-اق ونىڭ سىرتقى بەينەسى جوعالعان بالالاردىڭ دا سيپاتتاماسىنا سايكەس كەلمەپتى.
بيىل بەت-الپەتىن قالپىنا كەلتىرۋ تەحنولوگياسى مەن دنك-نى سالىستىرۋ ارقىلى بالانىڭ كىم ەكەنى انىقتالدى. قايتىس بولعان بالانىڭ ءاتى-جونى — روبەرت "بوببي" ادام ۋيت ەكەن. ول ميچيگاندا تۋعان، ءبىراق وگايو شتاتىنداعى وراب تاۋلى ايماعىندا وسكەن. بۇل تۋرالى سەيسەنبىدە وريندج وكرۋگىنىڭ شەريفى چارلز بلەكۆۋد مالىمدەدى. اراعا ءبىراز ۋاقىت سالىپ بالانىڭ مايىتىنەن 350 شاقىرىم جەردەن تاعى ءبىر ادامنىڭ دەنەسى تابىلدى. ول ءمايىت ءبوببيدىڭ اناسى مەنگ حۆا چو بولىپ شىققان.
تەرگەۋشىلەر بىردەن بوببي مەن مەنگتىڭ تۋعان-تۋىسىن ىزدەي باستايدى. ولاردىڭ تۋىستارىنىڭ ءبىرى جاي قىزىعۋشىلىقپەن دنك تاپسىرادى. ءبىراق ول مۇنداي سۇمدىق جايتتى ەستيمىن دەپ ويلاماعان. 20 جىل بۇرىنعى وقيعانى ەستىگەن تۋىستارى ابدىراپ قالدى. سەبەبى ولار مەنگ پەن ءبوببيدى تاريحي وتانى وڭتۇستىك كورەياعا كەتتى دەپ ويلاعان. سول سەبەپتى ەشكىم ولاردىڭ جوعالعانى تۋرالى ارىز بەرمەپتى.
"بوببي وتە سۇيكىمدى بالا ەدى. ۇنەمى كۇلىپ جۇرەتىن"، دەپ ەسكە الدى تۋىستارى.
ولاردىڭ ولىمىنە كىنالى قىلمىسكەر 20 جىلدان كەيىن تابىلدى. قاندىقول قىلمىسكەر ءبوببيدىڭ اكەسى بولىپ شىقتى، ول قىلمىسىن جاسىرۋ ءۇشىن جۇرتقا ايەلى مەن ۇلىنىڭ اياق استىنان ەلدەن كەتىپ قالعانىن ايتقان. ءقازىر ول ادام توناعانى ءۇشىن تۇرمەدە وتىر ەكەن. كۇدىكتى كىناسىن مويىندادى.
اۋدارعان: اسەل بولات قىزى
