«ەۋرازيا الەمى» پىكىر سايىس كلۋبىنىڭ كەزەكتى باسقوسۋى «ەۋرازيا ەلدەرىن بىرىكتىرۋدەگى كىتاپ فەنومەنى» اتتى تاقىرىپقا ارنالدى.
ساياساتتانۋشى ەدۋارد پولەتايەۆتىڭ ايتۋىنشا، بيىلعى جىل تمد-دا كىتاپ جىلى بولىپ جاريالانعان.
«كىتاپتىڭ قۇندىلىعى مەن كىتاپ وقۋعا دەگەن قۇشتارلىقتى ارتتىرۋ ءۇشىن جالعىز عانا كىتاپ كورمەلەرىن وتكىزگەن ازدىق ەتەدى. قازاقستاندا اۆتور مەن وقىرماننىڭ جاقىنداستىراتىن، باتىس ەلدەرىندە باياعىدان بار ءتاسىلدى جولعا قويۋ كەرەك. ءبىزدىڭ ەلدە كىتاپ قۇندىلىعىن جوعالتقان جوق، ءبىراق وعان دەگەن وقىرمان سۇرانىسى تومەندەپ بارادى. ال مۇنىڭ ارتى رۋحاني جۇتاۋعا اكەلۋى مۇمكىن...» دەدى ول.
ال ساياساتتانۋشى ايگۇل وماروۆا ءوز كەزەگىندە بىزدە تانىمال اۆتورلاردىڭ شىعارماشىلىق كەشىن ءجيى وتكىزۋ قاجەتتىگىن تىلگە تيەك ەتتى.
«تەلەديدار تولى شوۋ-بيزنەس وكىلدەرى. ارزان ءازىل كورەرمەننىڭ ساناسىن تۇمشالاپ بارادى. حالىقتىڭ قازىرگى دەگراداسيادان قۇتقاراتىن بىردەن ءبىر جول – كىتاپ. ونى قاعاز كۇيىندە مە، ينتەرنەت ارقىلى ما، اۋديوجازبا كومەگىمەن بە، قالاي وقىعانى ماڭىزدى ەمەس. وقىرمان ساۋاتتىلىعىن ارتتىرۋدا بارلىق ءتاسىل ءتيىمدى» - دەدى.
قازاقستان كوممۋنيكاتيۆتىك قاۋىمداستىعىنىڭ ديرەكتورى ءباعيلا احاتوۆانىڭ پىكىرىنشە بۇگىنگى ادەبيەتتىڭ ميسسياسى – ول وقىرماندى وزىنە بەيىمدەۋ. «وقىلاتىن، وقىرمانعان بەرەرى بار قىزىقتى شىعارما بولسا، قانشا بەت بولسا دا وقىلادى، قانشا جاڭالىعى مەن ەسكىلىگى بولسا دا جۇرت اۋزىندا جۇرەدى» - دەدى ول.
شاراعا قاتىسقان وزگە دە ساراپشىلار ءقازىر ينتەللەكتۋالدى ادەبيەتكە سۇرانىس جوعارى ەكەنىن ايتىپ، كىتاپ سالاسىن وسى باعىتقا بۇرۋدى ۇسىندى.
ۇسىنعان: نازەركە لابيحان
