قازاقستاننىڭ باس پروكۋراتۋراسى جانە ىشكى ىستەر مينيسترلىگىنىڭ قىزمەتكەرلەرى دومينيكان رەسپۋبليكاسىنان قىلمىستىق جاۋاپكەرشىلىككە تارتۋ ءۇشىن مارينا ورۋمبايەۆانى (نيەۆسكايا) ەكستراديسيالادى. بۇل تۋرالى ق ر باس پروكۋراتۋراسى حابارلادى.
ۆەدومستۆو دەرەگىنە سۇيەنسەك، مارينا ورۋمبايەۆانى شىعىس قازاقستان وبلىسىنىڭ سىبايلاس جەمقورلىققا قارسى قىزمەتى ىزدەگەن. وعان 9 ميلليون تەڭگەگە جۋىق سوماعا مەملەكەتكە زالال كەلتىرە وتىرىپ، سەنىپ تاپسىرىلعان مۇلىكتى تالان-تاراجعا سالدى دەگەن ايىپ تاعىلدى.
ورۋمبايەۆا قىلمىستىق قۋدالاۋ ورگانىنان جاسىرىنعان جانە حالىقارالىق ىزدەۋدە بولعان.
قازاقستان مەن دومينيكان رەسپۋبليكاسى اراسىندا ۇستاپ بەرۋ تۋرالى ەكىجاقتى كەلىسىمنىڭ بولماۋىنا قاراماستان، باس پروكۋراتۋرانىڭ سۇراۋىن شەتەل بيلىگى قاناعاتتاندىردى.
قازىرگى ۋاقىتتا ورۋمبايەۆا استانا قالاسىنىڭ تەرگەۋ يزولياتورىندا وتىر.
ۇسىنعان: گۇلىم جاقان
